Read Tangkhul Naga PĀNGMONSHI 14 Bible Online

PĀNGMONSHI 14 - Tangkhul Naga bible

PĀNGMONSHI 14

² “Phārrei kakazā ali tharngasakthang, ain chi hithāda sāki kajina. Ali pāngmonli khuivāra;

³kala pāngmonna rāmrah ayarli shokta munlak eina yangra. Chiwui thili phārrei kakazā chi raihairasaakha,

⁴tharki kajipa chiwui vang kathara vānao khani; cedarthing akha, hungshi kahai kazaira̱ kala maharnā khuirā khavai pāngmonna kasora;

⁵kala vānao akha ngaleihamli sanglaga longkazat tara̱tungli sāthat ngasakra.

⁶Kala kharing vānaoli ngasoda, cedarthing, hungshi kahai kazaira̱ kala maharnā chi, longkazat tara̱tungli sāthat kahai vānao chiwui asheeli chumkhuira;

⁷kala ana tharki kajipawuitungli shini shida kasirrorda tharhaira da chishātra, kala kharinga vānao chi khamashā apamli chihohaora.

⁸Kala tharkahai mipa china awui kachon ngasa̱ra, awui sam sitāra kala ra̱vaira, chieina a tharhaora. Chiwui thili ana rāmrahlungli ungpamra, kha awui kachonshim ayārli shinithang pamra.

⁹Kala kashinethang kui sihaida morhāla, mikphunghāla, kala ahā saikorala sitāra. Chiwui thili kashankachon ngasa̱da ra̱vailaga tharhaora.

¹⁰“Kachishatathang achuk kapei yaovā khani kala kumkhawui achuk kapei yaolā akha kala tharāzātchigatwui vang manaktak kahai mathir khuiluiwui sharuk tharawui kathum thao eina manātta chi ana khuirāra.

¹¹Kala tharkhame pāngmon china mipa chilila otbingla kazip khavai kachonshimwui khāmongli PROHOwui mangāli haira.

¹²Kala pāngmonna yaovā akha khuida thaokhong chieina ngasoda khayonchigat chigatra, khayitta PROHOwui mangāli khayitchigat sāra;

¹³suihamchigat kala rikkatā kachigatwui vang sāthat khavai katharapam chili yao chi ana taithatra; kaja suihamchigat thāda khayonchigatla pāngmonwuina, hi tharmathengmeikap kaje otna.

¹⁴Khayonchigatwui ashee ngayarda khuilaga tharki kajipawui yāshongwui khanātonli neomira, yāshongwui pāngva̱, kala yāshongwui pheiva̱lila neomira.

¹⁵Chiwui thili pāngmonna thaokhong chiwui eina thao ngayarda khuida uishongwui pāngmayāli heisangra,

¹⁶kala yāpāng eina uishongwui thao chumkhuida PROHOwui mangāli apāng mareng eina shini shida yikrorra.

¹⁷Thao kala yaoshi apāngli katai chi pāngmon china tharki kajipawui khanāton yāshong kateokha neomira, yāpāngva̱, kala yāshongwui pheiva̱lila neomira;

¹⁸kala pāngmonwui pāngli katai thao saikora chi tharki kajipawui kuili neomira. Chithāda sāda PROHOwui mangāli pāngmonna awui vang pheomi khavai sāra.

¹⁹“Pāngmon china suihamchigat chigatmira, awui makathar chiwui eina tharhaoki kajipali pheomida ali tharmira. Kala chiwui thili ana rikkatā kachigat sā taithatra.

²⁰Kala pāngmon china rikkatā kachigat eina tharāzāt kachigat chi hanphuttungli chigatmira. Chithāda awui vang pāngmon china pheomira, kala a tharhaora.

²¹“Kha a chāmhaida chiyākha mashokrarakha, ana khayonchigat sākhavai, awui vang pheomi khavai yaovā akha, kala tharāzat kachigatwui vang khamanaka mathir khuiluiwui sharuk tharāwui kathum thao manātta thaokhong akhala khuirāra;

²²kala kha̱na̱nao khani, lah nasha̱nao khani awui mikashap chi khuirāra; akhava suihamchigatwui vang, khangatei akhapāna rikkatā kachigatwui vang khuirāra.

²³Kala kachishatathang awui tharkhavai PROHOwui mangāli kazip khavai kachonshimwui khāmongpheili pāngmonli khuirāmira;

²⁴kala pāngmonna khayonchigatwui yaovā chieina thaokhong chi khuida PROHOwui mangāli khayitta khayitchigat sāra.

²⁵Kala pāngmonna khayonchigat sā taithatlaga ashee ngayarda tharki kajipawui yāshongwui khanātonli, yāpangva̱li, kala yashongwui pheiva̱li neomira.

²⁶Kala pāngmon china thao chi ngayarda awui uishongwui pāngmayāli heisangda,

²⁷kala yāpāngmareng eina uishongli khalei thao chi khuilaga PROHOwui mangāli shini shida yikra;

²⁸kala pāngmonna awui yāpangli khalei thao chi tharki kajipawui yāshong khanātonli, yāshongwui pangva̱li, yashongwui pheiva̱lila khayonchigat ashee neokhavai pam chili neomira.

²⁹Kala PROHOwui mangāli awui vang pheokhami sāda pāngmonwui pāngli khalei thao saikora chi tharki kajipawui kuili neomira.

³⁰Kala ana khuirākashap kha̱na̱nao nilala nāsha̱nao nilala chi ana chigatra,

³¹akhana suihamchigatwui vang, khangatei akhapāna rikkatā kachigatwui vang, tharāzāt kachigat eina ngasoda chigatra; chithāda PROHOwui mangāli pāngmon china tharki kaje awui vang pheomira.

³²Phārrei kazāt khalei mi, tharmi khavai kachigat makhuirākathuka awui vang hi ningkhamina.”

³³PROHOna Moses eina Aaronli hānga,

³⁴“Ina nathumli mikahai Canaan ngaleili khavā chitharan, nathumna kapapam chiwui shimli ina phārrei kazā ngasakakha,

³⁵shimva̱ china rāda pāngmonli, ‘Ishi shimli kachikathā kazāt akha khalei thāli’ da rāhāngphalungra.

³⁶Chieina pāngmon china mavāyangranglakha shim chi masai khavai hāngra, chi maningakha shimlungli khalei saikora makatharana jihaora; chiwui thili pāngmonna chi yangkhavai vāra.

³⁷Kala kazāt chi ana munlak eina vāyanglaga phākholi matekrisi, lah hungrisi da amaili thukmeida theiakha,

³⁸pāngmon china shim khāmongwui eina ayar shokta shinithang khāmong shunghaora.

³⁹Kala kashinethang pāngmon china vāyangluishitlaga; kazāt chi phākholi manvāhairasaakha,

⁴⁰kazāt kakā ngalungbing chi khuishoklaga keinungwui ayar makatharpam akhali ahorhaolu da pāngmon china kasora.

⁴¹Kala shimlung kuimareida waitei kahai chi seokhuilaga keinungwui ayār makatharpam akhali vahor ngasakra.

⁴²Chiwui thili athumna ngalung khangatei akhuida khuishok kahai ngalung chiwui mahut shinsangra, kala wai kadhar teiluishitra.

⁴³“Kha ngalungla khuishokhai; kaseola seoda wai teilui kahaiwui thili kazāluishitakha,

⁴⁴pāngmon china ayangluira, kala kalikhada kazāt chi shim chili manmaronhairasaakha, shim chili kalā shikapaiya phārrei leihaira; chi makatharna.

⁴⁵Kala ana shim chi pheilaga ngalungla thingla kala shim chiwui wai teikahaibingla katonga shaokhaitāda keinungwui ayar makatharpam akhali ahorhaora.

⁴⁶Chili lāngda shim shunghaida khalei chili akazanga mi chi ngazin eina tangda ngarangra.

⁴⁷Kala shim chili kapi mi, kala shim chili phakazā mi chi kachon ngasa̱serphalungra.

⁴⁸“Kha pāngmon china rāda munlak eina rāyanglaga wai teikahai shim chili mankhamaron maleisaakha shim chi thara da chishātra, kaja kazāt chi raihaira.

⁴⁹Kala shim tharkhamiwui vang ana kateoa vānao khani khuira, chili ngarumda cedarthing akha, hungshi kahai kazaira̱ kala maharnā khuirāra,

⁵⁰kala vānao akha ngaleihamli sanglaga longkazat tara̱tungli sāthatra,

⁵¹kala cedarthing, maharnā kala hungshi kahai kazaira̱ chieina ngasoda kharinga vānao akha, kala longkazat tara̱tungli sāthat kahai vānao chiwui asheeli rurkhuida shim chili shini shida yikra.

⁵²Chithāda sāda vānaowui ashee, longkazat tara̱, kharinga vānao, cedarthing, maharnā kala hungshi kahai kazaira̱ chieina shim chi tharngasakra.

⁵³Kala kharinga vānao chi keinungwui ayar khamashā apamli chihohaora; chithāda ana shim chi pheomida tharra.”

⁵⁴Hi phārrei kazāt ayurbingwui ainna, ahui khamuiwui vang,

⁵⁵kachonli nilala shimli nilala, phārrei kakazāwui;

⁵⁶kala khawor nilala, khavāt nilala, lah kachuk nilala,

⁵⁷kathakha tharra, kala kathakha matharmara kaji chithei khavaina. Hi phārreiwui ainna.