Read Tangkhul Naga PĀNGMONSHI 16 Bible Online

PĀNGMONSHI 16 - Tangkhul Naga bible

PĀNGMONSHI 16

¹Aaronwui naomayara khanina, PROHOwui mangāli rānganaida thikahaiwui thili PROHOna Mosesli hānga,

² “Nachinā Aaronli hānglu, kathara apam mairārlungli kānzangda, ningkhami okowui atungli khalei lukhamashan pamkhong chiwui mangāli marānganaiching ngasaklu, a thipaishina; kaja ina muiyālungli lukhamashan pamkhong chiwuitungli rāra.

³ Kha Aaronna katharapamli, suihamchigatwui vang mukkānao akha kala rikkatā kachigatwui vang yaovā akha eina ngasoda zangki kajina.”

⁴Ana awui phasāli kathara khamanaka katuma phahon, kala khamanaka kongkarao, khamanaka shānneira̱, kala khamanaka kuinei neira; hi tharkhamathenga sāribingna. Ana phasā ra̱vaihailaga ngavaiki kajina.

⁵Kala ana Israel ashangva̱wui eina suihamchigatwui vang mevā khani, rikkatā kachigatwui vang yaovā akha da khuira.

⁶Kala Aaronna suihamchigatwui vang mukkānao chi akhalattawui vang chigatra, kala awui shimkhurwui vangla pheomira.

⁷Chiwui thili ana mevānao khani khuilaga kazip khavai kachonshimwui khāmongli PROHOwui mangāli rāchigatra;

⁸kala Aaronna khani chiwui ngachaili kalā yangra; akhana PROHOwui vang kala khangatei akhapāna Azazelwui vangna.

⁹Kalā yanglaga PROHOwui yar ngasa kahaiya me chi Aaronna khuilaga suihamchigat sāda chigatra;

¹⁰kha Azazelwui vang kalā tākahaiya me chi PROHOwui mangāli kharing eina chigatta pheomi khavai sāra, kaja mi makhalei lamhāngli Azazelli chihovāhaora.

¹¹Aaronna akhalattawui vang mukkā chi suihamchigatwui vang khuirāra, kala a eina ashi shimkhurwui vangla pheomi khavai sāra; awui vang mukkā chi suihamchigat sāda ana taithatlaga chigatra.

¹²Kala ana meisharkhongli PROHOwui mangāli khalei hanphutwui eina meithā pemda sanglaga nganamkaphā ot manaktak kahai panghom khani eina ngasoda mairārlungli khuizangra,

¹³kala nganamkaphā chi PROHOwui mangāli khalei meili sangda, meikhut eina ningkhamitungli kahai lukhamashan pamkhong chili ngaphuiphin ngasakra; chi maningakha ala thipai;

¹⁴kala ana mukkāwui ashee ngayarda khuilaga apāng eina lukhamashan pamkhong mangāli kala lukhamashan pamkongli shini shida kasirrorra.

¹⁵ Chiwui thili ana mibingwui suihamchigatwui me chi taithatra, kala chiwui ashee chi mairārwui alungli khuizangra, kala mukkāwui ashee kasirkharor tākam eina lukhamashan pamkhongtungli kala mangāvāk kasirrorra.

¹⁶Chithāda sāda Israel mibingwui makathar kala athumwui khayonkhamāng, athumwui morei kasā saikorawui vang, katharapam chi ana pheomira; athumwui makathar alungli khaleiwui vang, kazip khavai kachonshimwui vangla chithāda sāra.

¹⁷Awui vang, ashi shimkhurwui vāng kala Israel yaruikazip katongawui vang, katharapamli ana pheomi khavai kazang chitharan, kala ana kazip khavai kachonshim eina mashokranglakha eina tangda mi khipākha chili maleisāpaimara.

¹⁸Chiwui thili ana PROHOwui mangāli khalei hanphutpamli zangda chiwui vang pheomira, kala mukkāwui ashee eina meshee ngayarda khuida hanphutpamwui angachibing chili neora.

¹⁹Kala chili apāng mareng eina ashee chumkhuilaga hanphutungli shini shida kasirrorra, Israelnaobingwui makathar chi sāmathāda tharngasakra.

²⁰Kala katharapam, kazip khavai kachonshim kala hanphutpam chi pheomi kahaiwui thili, ana kharinga me chi PROHOwui mangāli khuirāra;

²¹kala Aaronna apāng khanini mekuili parhaida, Israelnaowui makaphā saikora, khayonkhamāng sākahai, kala moreibing saikora hāngphatra; hāngphatta saikora chi mekuili phungngasakra, kala ngaranping kahai mi akhawui pāngli horsangmida ana me chi lamhāngli vachihohaora.

²²Me china morei saikora, mi makhalei ngachakyang kahaipamli phungvāhaora, kala ana lamhāngli me chi thuingasakhaora.

²³ Chieina Aaronna kazip khavai kachonshimli ungkazang chitharan, katharapamli khangavai khamanaka kachon chi raihaora;

²⁴kala aphasā katonga tara̱ eina ra̱vaihailaga awui sāribing ngavaikhuida awui vangla, yaruiwui vangla rikkatā chigatta pheomira.

²⁵Kala suihamchigat sakahaiwui athao chi hanphuttungli riktāra.

²⁶Kala me chi Azazelli vatha kahai china awui kashankachonbing ngasa̱haida tara̱ eina ra̱vailaga rāmrahlungli ungzangpaira.

²⁷ Kala suihamchigatwui vang mukkā, me, chiwui ashee khuilaga katharapamli pheomi khavai khuirā kahai chi rāmrahwui ayarli khuishokra; kala ahuila, paila mei eina riktāhaora.

²⁸Kala chi riktā kahaiwui thili mi china awui kashankachonbing ngasa̱haida tara̱ eina ra̱vailaga rāmrahlungli zangnaora.

²⁹ Kala kashine kachāngwui katharāthang nathumla, nathumli ngasokharā kha̱mibingla, nathum khalatta ngarinphalungra, chithang ot masāpaimara, kala shiyan chi nathumna mayonchingra;

³⁰kaja chithang nathumwui vang tharkhavai nathumli pheomira; PROHOwui mangāli nathum morei saikorawui eina tharngasakra.

³¹Hi nathumwui vang chingri kahai ngasāmkakhui zimikshona; nathum khalatta ngarinda shiyan hi mayonchingra.

³²Kala avāva̱wui mahut neomida kala tharchigatmi kahai pāngmon china, kathara khamanaka sāribing shaksāda pheomira;

³³ana katharapamwui vang pheomira, kala ana kazip khavai kachonshim kala hanphutpamwui vāng pheomira, kala ana pāngmonbing kala yarui kazip kahai katongawui vang pheomira.

³⁴Kala hi nathumwui vang katang makhavai shiyan chikan sāra, kaja Israelnaobingwui moreiwui vang kum kachida pheokhami sāra kala PROHOna kakaso athishurda Mosesna sai.