Read Tangkhul Naga PĀNGMONSHI 19 Bible Online

PĀNGMONSHI 19 - Tangkhul Naga bible

PĀNGMONSHI 19

¹Kala PROHOna Mosesli hānga,

² “Israel yarui ashangva̱li nathum tharphalungra; kaja PROHO nathumwui Vare iya katharana da hānglu.

³ Nathum mi kachiva̱ nava̱ navāli khayāshilu, kala nathumna iwui sabbathbing mayonlu; kaja I PROHO nathumwui Varena.

⁴ “Nathum meoma̱li mangareithuihaialu, lah nathum khalattana langkakhui varebing masemkhuilu: I PROHO nathumwui Varena.

⁵“Kala nathumna ningyatchigatwui pha̱kaphayā PROHOli chigatakha, nathumna chi nathumli khuisangmi khavai chigatlu.

⁶Hi nathumna chigatthang shaira, lah akhama kathāla shaipai; kala kakathumathang taihaisaakha chi meili riktāki kajina.

⁷Kalikha kakathumathang shaisaakha, hi ningkakachai otna; chi makhuisangmimara,

⁸kala kashaiya mi kachiva̱ khayon phungra, kaja PROHOwui kathara ot chi makhao ngasakhaowa; kala mi chi awui miyurwui eina katathaora.

⁹ “Kala nathumna mā kahāt tharan luipheili khalei chi mahātsangalu, māhāwui thili māthambing chila mangamuivaalu.

¹⁰Kala drakhātheila maphākhuiserhaialu, kala tātung kahai chila mamanākhuialu; chi kachāmabing kala ramkazat kha̱mibingwui vangna: I PROHO nathumwui Varena.

¹¹ “Nathum maleepaimana, lah maminampaimana, lah akha eina akha makapikpaimana.

¹² Kala nathumna iwui ming eina nguida khangashit masāpaimana, kala chithāda nathumwui Varewui ming mamakhao ngasaklu: I PROHOna.

¹³ “Nawui khongnainaoli marekharekpaimana, lah awui otla mangapaipaimana. Ngalang holaga chithang ngayā aman mamila kazing mathangnampaimana.

¹⁴ Khanā khangakhokali makhonshipaimana, lah khangapeowui mangāli ngaphok khavai mahaimipaimana, kha nawui Vareli ngacheelu; I PROHOna.

¹⁵ “Bichar atamli mamatuikhayeialu; kachām-khangai, lah kharei-khangam mangakheilu, kha nawui khongnainaoli khamashung-khangarong eina bichar sāra.

¹⁶Nathum eina nathumwui mibing mamashātzat ngarokpaimana. Kala nakhongnaiwui khamashung bichar chili manganingkhampaimana; I PROHOna.

¹⁷ “Nachināli maningkachaipaimana, kha nawui khongnainaoli ngachamkhuilu, chi maningakha na awui vang morei phungra.

¹⁸ Nathumna athut makhuipaimana, lah ram khalattawui naobingli mayuishi ngarokpaimana, kha nakhalatta leikashi chithāda nawui khongnainaoli leishilu; I PROHOna.

¹⁹ “Nathum iwui shiyan mayonlu. Nathum sei ayur khangatei khani mangalāt ngasakalu; nathum lui akhali athā khani mayaorumlu; kala kachon raklala kazaira̱ yur khani mamanātlu.

²⁰“Kalikha mi akhana khāmkahai rao sha̱naoli awui akhavāna ngasopihailala raopava̱li mangatangkhuirangsaakha, lah ali ningkhān mamirangsaakha, ngathingkhuira. Ani khanili masāthatpaimana, kaja raopava̱ ningkhān masamphangranga;

²¹kha mipā china akhalattawui vang khayonchigat yaovā akha kazip khavai kachonshim khāmongli PROHOli khuirāra.

²²Kala mi china awui morei pheomi khavai PROHOwui mangāli khayonchigat yaovā khuikharāwui vang pāngmon awui morei pheomi khavai sāmira; kala awui morei sākahai chi pheomihaora.

²³“Nathumna ngalei chili vāshungda kala lingsang kahai atheirong ayur-ayāwui athei chi mashaipaimana; shānlaga kum kathum eina tangda athei mashaipaimara.

²⁴Kala khamate kum atheibing chi kathara ngasāda PROHOli masot khamiwui kachigatna.

²⁵Kha kaphangā kum nathumna chiwui athei chi shaipaira, hithakha arongna chungmeida athei mataisangmira: I PROHO nathumwui Varena.

²⁶“Nathumna ashee eina ngasoda asā mashaipaimana. Khamachut nilala kakhara̱ nilala masāpaimana.

²⁷ Nachee kuimareida masipaimana, lah morhā makhanitpaimana.

²⁸Kathibingwui vang na phasāli khānkazamda pha̱ mara̱paimana, I PROHOna.

²⁹ “Naongalāva̱li khayorva̱wui otsak sāngasakta mamakhao ngasaklu, chithākha ngalei chi pha̱ khayorli zangda makaphā makhayāna pemtinghaora.

³⁰ Nathumna iwui sabbath mayonra, kala iwui kathara shimli khayāshilu. I PROHOna.

³¹ “Sha̱ khangaso lah mitrang kathemli mashurthuihaialu; athumli maphāzatlu; athumna sākhamāngpaishina: I PROHO nathumwui Varena.

³²“Khararnao mangāli nganingkālu, kasarawui mai yangda khayāshilu, kala nathumwui Vareli ngacheelu; I PROHOna.

³³ “Nathumwui ngaleili kha̱mi khangatei ngasokhara leiakha, athumli khalāng ot masālu.

³⁴Nathumli ngasokazata a chi nathum kathāna da phaninglu, kala nakhalatta leikashi thāda alila leishilu; kaja nathumla Egypt ngaleili kha̱mi sāda leisai: I PROHO nathumwui Varena.

³⁵ “Bichar atamli khalāng ot masālu, asanliranu, kharitliranu lah kachungliranu,

³⁶nathumna onkhavai khānbing, ngalungbing, khuilui kala lengkhor tāzakta haiphalungra: Egypt ngaleiwui eina thānkashoka, I PROHO nathumwui Varena.

³⁷Kala nathumna iwui shiyan-chikan kala sharphahor saikora mayonda chi sālu: I PROHOna.”