Read Tangkhul Naga PĀNGMONSHI 20 Bible Online

PĀNGMONSHI 20 - Tangkhul Naga bible

PĀNGMONSHI 20

¹PROHOna Mosesli hānga,

² “Israelnaobingli hānglu, Israelnao nilala, ngasokharā kha̱mi nilala kachikathāna awui nao Molechli mihaiakha ali shaothatra; ngalei chiwui mibingna ali ngalung eina horthatra.

³Kala mipa chili ina mamayāmara, kala ali awui mibingwui eina katathaora, kaja Molechli awui nao mida iwui katharapam kala iwui katharaming makhao ngasakhaowa,

⁴Kala mi china awui nao Molechli khami chi ngalei chiwui mibingna thatheilaga mikningda ali mashaothatakha,

⁵ina mipa chili, kala awui shimkhurli mamayāmara, alila awui thi shurda Molechli pha̱khayorli kazangbing saikoralila athumwui miyurwui eina katathaora.

⁶ “Kala sha̱ khangasobing, mitrangbingli shurthuida pha̱khayorli kazanga chili ina mamayāmara, kala ali awui miyurwui eina katathaora.

⁷ Chiwui vang eina nathum khalatta tharchigatta tharlu; kaja I PROHO nathumwui Varena.

⁸Kala iwui ningkhami mayonlu, kala chi sālu; nathumli tharkhangasaka PROHO chi ina.

⁹“Avāva̱li nilala, ava̱va̱li nilala khonkashi mi kachiva̱li shaothatra; ana avāva̱li, lah ava̱va̱li khonkashiwui ashee awuitungli lei.

¹⁰ “Mi akhana khongnai preiva̱li phophaakha, mayaralila, preiva̱lila shaothat thathuira.

¹¹ Avāva̱wui preiva̱li ngasokapipā china avāva̱wui khayā khalānna; khaninili shaothatra, ashee chi aniwuitungli lei.

¹² Kachikathāna arihāva̱li ngasopiakha, khaninili shaothatra; ani shokhalāna, aniwui ashee aniwuitungli lei.

¹³ Mi akhana mayarnao akhali sha̱naoli ngasokapi thāda saakha ani ningkakachaiya ot sāhaira, anili shaothatra, aniwui ashee aniwuitungli tāra.

¹⁴ Mi akhana ngalā khuilaga apreiva̱wui ava̱va̱lila ngakumakha, chi makaphā makhayā otna; nathumwui alungli makaphā makhayā malei khavai, mayaralila, preiva̱, khaninili mei eina thottāra.

¹⁵ Mi akhana sāyurli ngalātakha ali shaothatphalungra, kala sā chila shaothatra.

¹⁶Sha̱naona sāyurli pimiakha, alila, sā chila shaothatra, anili shaothatra, kala aniwui ashee aniwuitungli lei.

¹⁷ “Mi akhana azarva̱, avāva̱wui naongalāva̱ nilala, ava̱va̱wui naongalāva̱ nilala, awui khayā theiakha, kala sha̱nao china mayarawui khayā theiakha, chi khayā khamalā otna, kala shimkhur naongarābingwui mikyanwui eina anili katathaora; ana azarawui khayā lānhaira, awui khayon chi ana phungra.

¹⁸ Mi akhana shānrāt kazat sha̱naoli ngasopiakha, kala awui khayā lānakha, ana sha̱nao chiwui ura̱ mahong ngasakhaira, kala sha̱naopa china awui asheewui ura̱ lānhaira; ani khaninili yaruiwui eina katathaora.

¹⁹ “Nana nava̱wui agatuiva̱ nilala, navāwui azarva̱li nilala khayā malānpaimana, chi nganailak kahai theisāli khayāmalā khangasakna; khayon chi anina phungthathuira.

²⁰ Mi akhana avāgato preiva̱wui khayā lānakha, avagatowui khayā khalān kathāna, khayon anina phungra, ani nao mapharāla thira.

²¹ Mi akhana achinā pareiva̱li khangakum hi makathar otna; achināli khayāmala khangasakna, nao maleimara.

²²“Chiwui vang eina nathumna shiyan-chikan kala kaso kahai saikora mayonda sālu; kaja nathumli thānzangki kaji ngalei china nathumli maloshokhaipaishina.

²³Kala nathumwui mangāli yāmshokhaoki kaji yurbingwui zatkhanābing chili mashurlu, kaja athumna hikathāmāng kasāwui vang ina athumli ningkakachaina.

²⁴Kha ina nathumli hānghaira, ‘Nathumna athumwui ngalei khuira, kala khuira̱ eina seina̱ khalong lam chi nathumwui ngasā khavai chi nathumli mira.’ Mibingwui eina ngatei khangasaka I nathumwui PROHO Varena.

²⁵Chiwui vang eina kathara sā eina makathara sā, kathara vānao eina makathara vānao ngatei ngasakphalungra; sā nilala, vānao nilala, ngaleitungli khalei ayur nilala, makatharabing ina ngatei ngasak kahai chiwui eina nathum khalatta mamakhaophalungmara.

²⁶ Nathum tharphalungra; kaja PROHO I katharana, kala iwui mi sākhavai yur kateibingwui eina nathumli ngatei khangasakna.

²⁷ “Sha̱ khangasoa, lah mitrang kasaa mayarnaoranu lah sha̱naoranu, a chili shaothatra; athumli ngalung eina horthatra, athumwui ashee athumwuitungli leira.”