Read Tangkhul Naga PĀNGMONSHI 21 Bible Online

PĀNGMONSHI 21 - Tangkhul Naga bible

PĀNGMONSHI 21

¹Kala PROHOna Mosesli hānga, “Aaronwui naomayara pāngmonbingli hānglu, kaja athumwui mi thihaida kathi chili vazanglaga athum khalatta masākhamāngpaimara.

²Kha ali nganaimeikap kaje shimkhurwui mi kaja, ava̱va̱wui vang, avāva̱wui vang, anaomayarawui vang, anaongalāva̱wui vang kala achināwui vang,

³lah mafakathuiva̱ azarva̱wui vang (agahara makhalei, ali nganailak kaji awui vanga sākhamāngpai).

⁴Awui mibingwui ngachaili gahara akha thada a khalatta masākhamāngpaimana kala masāmakhaopaimana

⁵ “Athum kui masipaimana, lah morhāla makhanitpaimana, kala pha̱la mara̱paimana.

⁶Athum athumwui Varewui mangāli tharphalungra, athum Varewui ming masāmakhaopaimana; kaja athumna, athumwui Varewui khamui kachigat chi mei eina PROHOli chigata; chiwui vang athum tharmathengphalungra.

⁷Athumna khayorva̱ sha̱nao lah sākhamāng kahaiva̱ sha̱naoli makhuipaimana; gaharana pāngkahai preiva̱lila mangakumpaimana; kaja pāngmon hi awui Varewuili ava katharana.

⁸Ali nathumna tharchigatra, kaja ana nathum Varewui khamui chigatmi; a nathumwui mangāli thara; kaja nathumli tharkhame, PROHO I katharana.

⁹Kala kachikathā pāngmonwui naongalāva̱na khayorva̱wui otsak sāda makhao ngasakakha avāva̱lila makhao khangasakna, ali mei eina thottāra.

¹⁰“Chinao ngarāwui ngachaili pāngmon hakmeithui kajewui kuili neomi khavai thao heirormi kahai, kala sāribing ngavai khavai tharchigat kahaipā chi akuisam phungyir mahaipaimara lah awui kachonla maserkhākpaimara;

¹¹khamāng kahon mavāpaimara, avāva̱wui vang nilala, ava̱va̱wui vang nilala akhalatta masākhamāng ngasakmara;

¹²katharapamwui eina kathuila mathuipaimara, Varewui katharapamla mamakhao ngasakpaimara; kaja tharchigat khavai Varewui thao awui kuitungli lei: I PROHOna.

¹³Ana apreiva̱ sākhavai kachingva̱ ngalānao khuira.

¹⁴Ra̱meinao, lah pāngkahai sha̱nao, sākhamāng kahai sha̱nao, khayora sha̱nao hikathāthābingli mangakumpaimana; kha awui yurwui kachingva̱ sha̱nao khuiki kajina,

¹⁵kaja yurwui ngachaili awui naongarā mamakhao ngasakmara, kaja I nathumli tharkhame PROHOna.”

¹⁶Kala PROHOna Mosesli hānga,

¹⁷“Aaronli hānglu, nawui ara̱-azā thot peida, khangakhai khangarai khalei mi china awui Vareli kashakazā khamui pha̱phayā khavai marānganairanu.

¹⁸Kaja khangakhai-khangarai khalei mina nganaida marāpaimara, khangapeo, lah katek, lah mai khangakhai, lah pheimareng-pāngmareng khangapheng,

¹⁹lah aphei apāng khamā za̱kahai,

²⁰lah khumkakon-khumkatek, mithang, mikkashi, khamuirai kala raiji, akhā vātkahai,

²¹kachikathā khangakhai khangarai khalei Aaron pāngmonwui ara̱-azā khipānakha PROHOli rikkatā chigat khavai marānganaipaimana; khangakhai khaleiwui vang a Varewui khamui chigat khavai marānganaipaimara.

²²Ana tharmathengmeikap kaji kala kathara Varewui kashakazā zāpai;

²³kha mairārli mavānganaipaimana, lah hanphutpamli mavāpaimana, kaja a achuk makapeiana, ana iwui katharapambing masāmakhaopaimana; kaja athumli tharkhangasaka PROHO chi ina.”

²⁴Chieina Mosesna Aaronlila, anaomayarabinglila kala Israel mi saikorali hāngsera.