Read Tangkhul Naga PĀNGMONSHI 22 Bible Online

PĀNGMONSHI 22 - Tangkhul Naga bible

PĀNGMONSHI 22

¹Kala PROHOna Mosesli hānga,

²“Aaronshi vānaongarāli hānglu, Israelnaobingna ili kachigat kathara otbing chi pāng masāza̱lu, chithakha athumna iwui kathara aming masāmakhaomara; I PROHOna.

³Athumli hānglu, nathumwui ara̱-azāwui ngachaili thot kachida, kachikathā akhana makathar laleida, Israelnaobingna PROHOli tharchigat kahai kathara otbing chili anganaiakha, chipali iwui eina katathaora: I PROHOna.

⁴“Aaronwui ara̱-azāwui ngachaili phārrei kazāt nilala, zaizai khangaya̱ nilala matharranglakha eina tangda iwui kathara ot mashaipaimara. Kachikathāna makathar ot saza̱da kaja kathili sākaza̱, lah pha̱ra̱ khaung,

⁵ngawokazat ot saza̱da sāmakhao kahai, lah mi khangatei akhawui makathar mankakhui,

⁶makathar yur saikora sakaza̱ mi chi matharmara, kala ngazin eina tangda ngarangra, kala mara̱vairanglakha eina tangda kathara ot mashaipaimara.

⁷Zimik katun eina a tharhaora, kala chiwui thili kathara ot shaipaira; kaja hikathā hi awui kashakazāna.

⁸Akhalatta masāmakhao khavai, khalatta kathi sāla, khazur sāla mashaipaimara: I PROHOna.

⁹“Chiwui vang eina athumna iwui kakaso mayonphalungra, chi maningakha athumna makathar kasā chitharan athum hiwui vang morei phungda thira; athumli tharkhangasaka PROHO chi ina.

¹⁰“Ayarwui mina kathara ot mashaipaimara; pāngmonwuili rākazanga kha̱mi lah khamasā raona kathara ot mashaipaimara.

¹¹Kha pāngmonna awui raonao sākhavai pheisā eina lokakhuiakha, chikathā raonao kala awuili pharākasangbingna chi shaipai.

¹²Kalikha pāngmonwui naongalāva̱na ayarwui mili fathuihaiakha, a kathara kachigat ot chi mashaipaimana.

¹³Kha pāngmon akhawui naongalāva̱ ra̱meipamda, lah pānghaida naola manganaola, nganuilakhawui thāda avāva̱wui shimli latungakha, avāva̱wui kashakazā zāpaira; kha ayarwui mina mazāpaimana.

¹⁴“Kalikha mi akhana matheimada kathara ot shaihaiakha, ana chiwui aman akhum phangāwui akha mataida sanglaga kathara ot chi pāngmonli mira.

¹⁵Israelnaobingna PROHOli kachigat kathara otbing chi pāngmonna masāmakhaopaimana,

¹⁶chithāda athumli kathara otbing shaingasakta china athumli khayon chiphunra; kaja athumli tharkhame PROHO chi ina.”

¹⁷Kala PROHOna Mosesli hānga,

¹⁸Aaronshi vānaongarāli kala Israelnao saikorali hānglu, kachikathā Israel shimkhurwui mi nilala, ngasokazat kha̱mi nilala athumna kachigat chitharan, khangashit kharun nilala, thāda kachigat nilala, PROHOwui vāng rikkatā kachigat saakha,

¹⁹khuisang khavai, seiranu, yaoranu, meranu, achuk kapei avā chigatra.

²⁰ Achuk makapei ot machigatpaimana, kaja chi makhuisangmimara.

²¹Kala kachikathāna PROHOli ningyatchigat kachigat tharan khangashit ungkashungwui vang, lah thāda kachigatwui vang chi khuisangmi khavai seishangwui eina nilala, yaoshangwui eina nilala, achuk kapei kapong khayang chigatra.

²²Sāyur amik khangapeo, pheipāng katek, zaizai khangaya̱, raiji, lah khamui kashok, lah khangaphār, PROHOli machigatpaimana, kala hanphuttungli rikkatā kachigat PROHOli mamipaimana.

²³Mukka nilala lah yaonao nilala, phasā sangnā kahai, sha̱na kahai leisālala lemmet kachigatwui vang khuirāpai; kha khangashitwui vang chikathā makhuisangpaimana.

²⁴Sāyur akhā ngakhai kahai, vātkahai, katattā kahai leiakha, PROHOli machigatpaimara, kala nathumwui ngaleili kapha̱la mapha̱paimara.

²⁵Yur khangateiwui eina hikathā sā samphanglala nathumna Varewui kashakazāna da machigatpaimara. Khamā khangakhai khangarai khaleiwui vang chikathā makhuisangmimara.

²⁶Kala PROHOna Mosesli hānga,

²⁷“Sei nilala, yao nilala, me nilala, anao kapharā tharan, anao chi ava̱li shinithang pamrumra kala kachishatathang eina thuida PROHOwui vang rikkatāwui kachigatli khuisangpai.

²⁸Kala chikathā sei nilala, yao nilala, ava̱ eina anao chi thangkhali mataithatpaimana.

²⁹Kala PROHOli pha̱phayāda ningkashiwui pha̱kaphayā ot saakha, chi khuisangpai khavai pha̱phayālu.

³⁰Kala hi chithang shaingakānserphalungra, ngathorshongwui vang mataipaimana: I PROHOna.

³¹“Chiwui vang nathumna iwui ningkhami mayonlu kala chi sālu; I PROHOna.

³²Kala iwui katharaming masāmakhaopaimana, kha Israelnaobingwui alungli iming tharngasakphalungra; nathumli tharkhame PROHO chi ina,

³³kala nathumwui Vare ngasāda Egypt ngaleiwui eina thānkashokana: I PROHOna.”