Read Tangkhul Naga PĀNGMONSHI 24 Bible Online

PĀNGMONSHI 24 - Tangkhul Naga bible

PĀNGMONSHI 24

¹PROHOna Mosesli hānga,

²“Thaomei shārkhavai olivewui eina shungkakhui kashenga thao khuirālu da Israelnaobingli kasolu, kaja kazip khavai shim chili kahor chi leishon ngasakra.

³Ngazin kachida Aaronna kazip khavai kachonshimwui ningkhami oko haikhavai mairār ayarli thaomei sharhaida PROHOwui mangāli ngathor eina tangda thaomei kahor chi leishon ngasakra. Hi nathumwui thot-thot vāshungda mayonki kaji shiyan-chikanna.

⁴Aaronna thaomeibing chi sinā eina kasā thaomeishong tungli ngachamlak eina haida PROHOwui mangāli kahor chi leishon ngasakra.

⁵ “Kala ephah akhawui akhum khani khuida manaktak kahai mathir eina khamui tharāda khani shokngasaklu.

⁶Kala chi sinā kachanga eina sākakhui tabletungli tharukruk eina ngaherda ngaher khani eina haira.

⁷Kala nathumna khamui ngaherherli kashenga frankincense sanglu, kaja chi phaningung khavai yar sāda khamui eina ngasoda PROHOwui mangāli meina rikkatā chigatki kajina.

⁸Katang mavaila tuingashit sākhavai Israel mibingwui mathun eina PROHOwui mangāli sabbath zimiksho kachiva̱li Aaronna chi ngachamda haira.

⁹ Kala chi Aaron eina anaomayarabingwui yarna, kala athumna katharapamli shaira; kaja hi meina rikkatā PROHOli chigatki kaji saikorawui eina tharmathengmeikap kaji awui yarna.”

¹⁰Thangkha, Egyptnao akhawui naomayara, Israel sha̱naona kapharā akhana Israelnaowui rāmrahli vai, kala rāmrah alungli Israelnao akhali kharar ngaroka;

¹¹kala Israelpava̱na kapharā nao china Aming chili mashātta khonshi. Chieina athumna ali Moseswui mangāli khuivai. Ava̱va̱li Shelomith hoi, Dan shangwui Dibriwui naongalāva̱na.

¹²Kala PROHOwui kaphaning machishātranglakha eina tangda athumna ali narhaisai.

¹³PROHOna Mosesli hānga,

¹⁴“Khonkashi mi chili rāmrahlungwui eina ayarli khuishoklu, kala kashā mi saikorana akuili pāng rāparranu, kala mi katongana ngalung eina ali horthathaolu.

¹⁵Kala Israelwui mibingli hānglu, awui Vareli khonkashe mi china morei chi phungra.

¹⁶PROHOwui mingli khonkashe mi chili shaothatra; mi ashangva̱na ngalung eina ali horthatra; kha̱mila, ramnaola, Amingli khonkashe mi chili shaothatra.

¹⁷ “Mi shaokathata ali shaothatra.

¹⁸Kachikathā akhana sha̱kei shaothatmihaiakha, manglāwui vang manglā runra.

¹⁹ “Mi akhana khongnainaoli sheikashi-sheikakai leingasakakha, ana kasā thāda alila sāra,

²⁰Katekwui vang katek, mikwui vang mik, hāwui vang hā, ana mili sheikashi-sheikakai leikhangasak thāda alila sheikashi-sheikakai leingasakra.

²¹Sha̱kei shaokathata mi china runra, kala mi shaokathata mi chilila shaothatra.

²² Kha̱minaoranu, ramnaoranu, nathumna ain akhamāng eina zatra, nathumwui PROHO Vare chi ina.”

²³Chithada sāda Mosesna Israelnaobingli hānga, kala khamashātapa chili rāmrahwui eina khuishokta ali lunggui eina horthathaowa. PROHOna Mosesli kakaso athishurda Israelnaobingna chithāda sai.