Read Tangkhul Naga PĀNGMONSHI 26 Bible Online

PĀNGMONSHI 26 - Tangkhul Naga bible

PĀNGMONSHI 26

¹ “Nathum khalattawui vang meoma̱lapai, ama̱ rukkasanglapai, pakra̱ kashunlapai masāpaimana; kala nathumna khorum khavai nathumwui ngaleili azak yekkasang ngalung makhaningkāpaimana; kaja PROHO nathumwui Vare chi ina.

² Nathum iwui sabbathbing mayonlu kala iwui katharapamli khayāshilu: I nathumwui PROHOna

³ “Nathumna iwui shiyan athishurda zatta kala iwui ningkhamila mayonda ringakha,

⁴zingkum atam kharā tharan kazing rotāmira, chithāda ngaleili khamathei mataisangra, kala luiyamwui atheirong athei matheira.

⁵Kala nathumwui heiun, zāt nilala, athei-arai nilala zingkum angasut ungshungda zāpeira, thochingra kala ningtāphup eina nathumwui ngaleili okthuira.

⁶“Kala ngalei chili ina chingrihai ngasakra, nathum kakhanang maleila piphup pamphuphaira; kala apam chiwui eina ramsā kashamserhaora, kala nathumwui pam chili raighai masāvaimara.

⁷Kala yangkashebingli nathumna kashamda athum raighai eina thira.

⁸Yangkashibing shākhali nathum phangāna kharomra, kala thingtharāli shākhana kharomra, kala nathumwui yangkashibing nathumwui mangāli raighai eina thiserra.

⁹Kala ina nathumli yangmida athei chungmeida matheida mataisang ngasakra, kala iwui ngashit kahai chi ngazipmei ngasakra.

¹⁰Kala kasāngkha haikahai mācham zāra, kala kadhar ungsang khavai kachampa sānshokra.

¹¹ Kala ina nathumwui ngachaili pamda imanglāna nathumli maningkachaimara.

¹²Kala ina nathumwui ngachaili leida nathumwui Vare ngasāra, nathum iwui mi ngasāra.

¹³I nathumwui PROHO Varena, nathum raonao masā khavai Egypt ngaleiwui eina ina thānkashokna, nathumwui kharit ot sontāmihaida kashān kachot raikhangasakana.”

¹⁴ “Kha nathumna iwui kahāng manganāmada iwui ningkhami mashurakha,

¹⁵kalikha iwui shiyan-chikanli ningkachaiakha, kala nathumwui ningna iwui kagaso mashurla iwui tuingashit kaihaiakha,

¹⁶ina nathumli hithāda sāra: Kashuirak kahai khangachee rāngasakra, kala kharurlaga china mik mathei ngasakmara kala mirin shimān ngasakra. Nathumna athei-arai yaosanglala arema sāra, kaja nathumwui yangkashebingna zāra.

¹⁷Ina nathumli yangngakheihaida nathumli yangkashibingna sāthatra; nathumli ningkakachaibingna mungra, kala khipānakha makharomlala nathumna yāmzatra.

¹⁸“Kala chithālala nathumna manganāsangakha, nathumwui moreiwui vang shini shida hāngmachinra,

¹⁹kala nathumwui langso khavai pangshap chi sakhaimihaida kazingla mari thāda, ngaleila pithrai thāda sāmira;

²⁰nathumwui yang aremali shimānra, kaja luili heiun machungsangmara, kala atheirongnala athei mamatheimara.

²¹“Chieina mazatkhangayili zatta iwui tui manganaakha nathum morei kasā chiyakhawui shini shida kazāt rāngasakra.

²²Kala ina nathumli ramsābingli chihoda nanao ngarāli tukshai ngasakra, kala nathumwui sha̱keila shimān ngasakra, kala nathum kachunga thishumhaida nathumwui shongfa ngachakyāng ngasakra.

²³“Kala khamachin hi eina nathumna ili mai mangareiungla mazatkhangayili zatakha,

²⁴ila nathumwui eina kharāthuida, I khalattana nathum moreiwui vang shini shida sāshimānra.

²⁵Kala ngashit kahaiwui athut hāngsang khavai ina raighai khuirāra; kala nathumna nathumwui keinungli kazipakha, kazātkashi chihorāra, kala yangkashebingwui pāngli horsangmira.

²⁶Ina nathumwui chum masingrā khangasak chitharan, sha̱nao tharāna meiphung akhali khamui sāda onlaga mishonlala nathumna zāda katho mavaimara.

²⁷“Kala hi eina tangdala ili manganāsangla zatkhangayili mazatakha,

²⁸ila malungvātta nathumwui eina kharāda zatra, kala nathumwui morei chili shini shida hāngmachinra.

²⁹Nathumna nanao mayara kala nanao ngalāva̱ ngarāwui asā shaira.

³⁰Kala nathumwui khorum khavai kajuipam katathaida nganamkaphā hanphutla sākazamhaora, kala nathumwui kathingun meoma̱tungli ngashomda herhaira, kala imanglāna nathumli ningkachaira.

³¹Kala nathumwui keinung sakathānhaida, kala katharapam ngachakyanghai ngasakta, nathumwui ningyāngkhaung nganamkaphā chi manganamluimara.

³²Kala nathumwui ngalei sākathānmihaida yangkashebingna rāpānda matakhak ngasakhaora.

³³Kala nathumli yur khangateiwui ngachaili chaiyāng ngasakra, iwui raighaina nathumli yunzatra; nathumwui ngalei ramchohaora, keinungla sakathānserhaora.

³⁴Chitharan nathumna yangkashiwui pāngli leida ramcholakha eina tangda, ngalei china ngasāmkhuida sabbathwui ringkaphā chi samphangra.

³⁵Nathumna ngalei hili pānlakha sabbath maleisalak kaji chi ramcholakha eina tangda ngasāmkhuira.

³⁶“Kala nathumwui ngachaili notha kahaibingli athumwui yangkashebing ramli malung kashamkhai ngasakra, thingnākao phankazatkhon shālaga yāmngasakra kala raighaili khangachee thāda yāmra, khipānakha makharomlala yāmda kongluisangra.

³⁷Khipānakha makharomlala raighaiwui eina athumna yāmkazat thāda akha eina akha ngaphok ngarokra kala yangkashibingli ngarar khavai pangshap maleimara.

³⁸Kala nathumna yangkashibingwui pāngli thisangra, kala yur khangateiwui alungli thirumra.

³⁹Kala nathumwui ngachaili notha kahaibing chi, athum moreiwui vang yangkashibingwui ngaleili chāngkharenglak eina thira, kala avāva̱ ngarāwui moreiwui vang athumwui thāda chāngkharenglak eina thira.

⁴⁰ “Kha athumwui morei hāngphatta, kala avāva̱ ngarāwui khayonkhamāng kala mahengkasangwui vang kala iwui zatngasak khangaili makazat,

⁴¹chiwui vang inala kharāthuida yangkashebingwui ngaleili khuivāra, kala athumwui makaphāwui eina ning ngareiungda moreiwui eina kaphā saluiakha;

⁴² ina Jacobli tuingashit kasā chi phaningungra, kala Isaacli tuingashit kasa chi phaningungra kala, Abrahamli tuingashit kasā chi phaningungra, kala ngalei chila phaningungra.

⁴³Kha lam chi athumna chihohaora, kala athum makhalei atamli ngasāmkhuisāchingra, athumna athumwui moreiwui vang hāngsangphalungra, kaja iwui shiyan-chikan mamayonla ningkachaihaowa.

⁴⁴Chithālala athumna yangkashibingwui ngaleili leilakha ina mahorhaimara, shimānchao khavai maningkachaimara kala iwui tuingashit makai khavai kachinla machinmara; kaja I PROHO athumwui Varena.

⁴⁵Kha athumwui Vare sākhavai yur khangateiwui miktāli Egypt ngaleiwui eina ina thānshok kahaiya avāva̱ ngarābingwui mangā eina athumwui tuingashit chi ina phaningungra; I nathumwui PROHOna.”

⁴⁶PROHO eina Israel mibingwui ngachaili Mosesna Sinai phungreili sākhami shiyan-chikan, kaso kahai kala ainbing hi hibing hina.