Read Tangkhul Naga PĀNGMONSHI 5 Bible Online

PĀNGMONSHI 5 - Tangkhul Naga bible

PĀNGMONSHI 5

¹Kachikathā mi akhana moreikasa theilaga maningakha shālaga chi shākhi sākhavai yaruina kasolaga masāthurakha chiwui khayonkhamāng ana phungra.

²Lha kachikathā akhana makathara ot, makathara ramsāwui angunranu, sha̱keiwui angunranu, ngawokazat yurwui angunranu saza̱hailaga, chi ana thumhaiakha, a matharthura, kala a yonhaira.

³Lha ali makhao ngasakkapai mikumowui makathara otli saza̱hailaga chi ana thumhaiakha, ana chi kathei tharan a khayona ngasāra.

⁴Kachikathā akhana kashilapai, kaphālapai sāra da tuingashit sāphāphahailaga, mina sāphāphā kaji tuingashit akhalala, akhalala chi awui eina thumhaiakha, naoda rākathei tharan apong hibing hili a nguihaira.

⁵Hāngkahaibing hili mi akhana yonkahai tharan awui morei sākahai chiwui vang ana hāngphatra.

⁶Kala PROHOwui mangāli awui sayon kahai chiwui vang suihamchigat sākhavai yaoshangwui eina yao nilala, me maningakha yaonao alānao akha khuirāra, chieina pāngmon china awui moreiwui vang pheomi khavai sāra.

⁷Kha ana yaonao mashokrarakha, awui suihamchigatwui PROHOli kachigat sāda, kaja awui morei sākahai chiwui vang khana̱nao khani khuirāra, akhana suihamchigat sākhavai, akhapāna rikkatā kachigat sakhavaina.

⁸Ana pāngmonli khuikharā eina khare china suihamchigat sāra; akahung shireitekra, kha asāwui eina akui mangatei ngasakmara,

⁹kala ashee ngayarda khuida chi hanphutwui ayarli yikrorra, katei kataibing chi hanphutpheili ngayiror ngasakra, hi suihamchigat kasāna.

¹⁰Chiwui thili ana kakhanepā chi sharphahorwui athishurda rikkatā kachigat sālaga, pāngmon china awui moreiwui vang pheomi khavai sāra, kala ali pheomihaora.

¹¹Kha ana kha̱na̱nao khani, lah nāsha̱nao khani machigatrarakha awui morei sākahai chiwui vang, manaktak kahai mathir epha tharāwui akhum akha khuirāra; chili thaola frankincensela masangmara, kaja hi suihamchigatna, theishirai kachigat maningmana.

¹²Ana pāngmonli khuivāmida, ana phaningung khavai panghomkha khuilaga PROHOwui mangāli mei eina kachigat hanphutli riktāra; hi suihamchigat kasāna.

¹³Hithāda ana morei sākahaiwui vang pāngmon china awui moreiwui vang pha̱phayāmida ali pheomira. Kala katai saikora chi tharāzāt kachigatwui thāda pāngmonwui yar sāra.

¹⁴PROHOna Mosesli hānga,

¹⁵PROHOwui kathara otli kachikathāna yonda sānguihaiakha, awui suihamchigat sākhavai PROHOli achuk kapei yaoshangwui eina yaovā akha chigatra, chiwui aman shekel lupāsā, kathara shimwui shekel athishurda nana khuilu; hi khayonchigatna.

¹⁶Chili lāngda ana kathara ot sashimānmi kahai chi ana runphalungra, chiwuitungli sharuk phangāwui akha mataida pāngmonli mira; kala pāngmon china suihamchigat yaovā chieina ngasoda ali pheomi khavai sāra, kala ali pheomihaora.

¹⁷PROHOna masālu da kaso kahai chi sāda kachikathāna morei sahaiakha matheimada sahailala a yona, kala khayonwui vang ana morei phungra.

¹⁸Ana achuk kapei yaoshangwui eina yaovā akha pāngmonli khuirāra, kala suihamchigatwui thāda nana aman chākkhuilu, chieina pāngmon china awui khayon chiwui vang pheomi khavai sāra, kala ali pheomihaora.

¹⁹PROHOwui mangāli mi china yonkahaiwui vang hi suihamchigat kasāna.