Read Tangkhul Naga PĀNGMONSHI 8 Bible Online

PĀNGMONSHI 8 - Tangkhul Naga bible

PĀNGMONSHI 8

¹ PROHOna Mosesli hānga,

²“Aaron eina anaomayarabingli hokhuilu; kala sāribingla, neokhavai thaola, kala suihamchigatwui vang mukkā akhala, kala yaovā khani eina khawok makazanga khamuiwui luk chila khuilu.

³Kala kazip khavai kachonshimwui khāmongpheili yarui ashangva̱ katonga kazipkhuilu.”

⁴Chieina PROHOna kaso kahai thāda Mosesna yarui ashangva̱ kazip khavai kachonshimwui khāmongpheili kazip ngasaka.

⁵Kala Mosesna yarui ashangva̱li “PROHOna salu da kaso kahai chi hina” da hānga.

⁶Kala Mosesna Aaronshi vānaongarāli khuirāda athumli tara̱ eina ra̱vaimi.

⁷Kala Mosesna Aaronli phahon ngavaimida shanneira̱la neimi, kala katuma phahon chila sangmida ephod ngavaimi, kala themlāk eina phorrei phorkasang ephod khara̱ chieina khalapshānmi.

⁸Kala ana thikhom sangmi, kala thikhomli Urim eina Thummim hokthāngmi.

⁹Kala PROHOna Mosesli kakaso athishurda ana kuitei akha ngahonmi, kuiteiwui mangāshong sināhon, kathara kuihon akha pānmi.

¹⁰Kala neomi khavai thao chi Mosesna khuilaga tabernacle chili neomi kala khalalei saikora chili tharchigata.

¹¹Kala ana thao chi hanphuttungli shini shida kasirrorda hanphut eina chiwui khorkhong saikora kala khongsaila, kala chiwui apheilila tharchigat khavai thao neomi.

¹²Kala thao chi ana Aaronwui kuitungli heirorda neomilaga ali tharchigata.

¹³Kala PROHOna kakaso athishurda Mosesna Aaron kala anaomayarabingli phahon ngavaimi, kala shānneira̱ neimida kuineila neimisera.

¹⁴Chiwui thili ana suihamchigatwui mukkā chi khuirāda suihamchigat sākhavai mukkā chiwui kuitungli Aaron kala awui naomayarabingna pāng para.

¹⁵Kala chi Mosesna taithatlaga ashee chi khuida hanphutwui angachibingli pāngmareng eina kuimareida neoda hanphut chi tharmatheng ngasaka, kala ashee chi hanphutpheili heirora, kala hiwui vang tharchigatta neomiya.

¹⁶Kala Mosesna akhari athao saikora, amathinli khangathān saikora, kala amakei khani eina chiwui athao chi khuilaga hanphuttungli ana riktai.

¹⁷Kha mukkā chiwui ahui, asā, kala chiwui pai chi PROHOna kakaso athishurda rāmrah ayarli mei eina riktāhaowa.

¹⁸Chiwui thili ana rikkatā kachigatwui yaovā chi khuirāda chiwui kuitungli Aaron kala awui naomayarabingwui pāng para.

¹⁹Kala Mosesna taithatlaga hanphutungli kuimareida ashee heirora.

²⁰Kala asā chi amarimrim sāda Mosesna akui eina amarimbing kala athao chi riktai.

²¹Kala PROHOna Mosesli kakaso athishurda awuksa eina akhobing chi tara̱ eina pheolaga yaosā katonga chi Mosesna PROHOli nganamkaphā rikkatā kachigat sāda hanphutungli meili riktai.

²²Chiwui thili ana yao khangatei akha, tharkachisinwui yaovā chi khuirai, Aaron kala awui naomayarabingna yao chiwui kuitungli pāng para.

²³Kala Mosesna taithatlaga ashee ngayarda khuida Aaronwui yāshongwui khanātonli, yapāngwui pangva̱li, kala yāpheiwui pheiva̱li ashee chukmi.

²⁴Kala Aaronwui naomayarabingli khuirāda athumwui yāshongwui khanātonli, yapāngwui pangva̱li, kala yāpheiwui pheiva̱li Mosesna ashee chukmisera; kala ashee chi khuida hanphutpam kuimareida heirora.

²⁵Chiwui thili ana athao kala akhameiwui athao, kala akharibingwui thao, amathinli khangathān thao, kala amakei khani eina chiwui athao, kala yāshongwui akhaishāng chi khui.

²⁶PROHOwui mangāli khalei khawok makazanga lukwui khamui akha kala thao kazanga khamui akha, kala khamanaka khangavā khamuihāng akha da ana khuilaga athao eina yāshongwui akhaishāng tungli parhai;

²⁷kala ana saikora chi Aaronshi vānao ngarāwui pāngli sangmida PROHOwui mangāli khayitta khayitchigat sāngasaka.

²⁸Chiwui thili Mosesna athumwui pang eina khuilaga tharkachisinwui rikkatā kachigatli riktārumhaowa; hi ningyāngkhaunga nganamkaphāna, kala mei eina rikkatā PROHOli kachigatna.

²⁹Kala Mosesna asuk chi khuilaga PROHOwui mangāli khayitta khayitchigat sai; kaja PROHOna Mosesli kaso kahai athishurda tharchigat kasā yaowui asā chi Moseswui yarna.

³⁰Kala neomi khavai thao eina hanphutungli khalei ashee chi Mosesna khuilaga, Aaronlila awui sārilila, kala awui naomayarabinglila, athumwui sārilila kasirrorsera; chithāda Aaronlila, awui sārila, kala anaomayarabingla, athumwui sārila ana tharchigatmi.

³¹Kala Mosesna Aaron kala awui naomayarabingli hānga, “Asā chi kazip khavai kachonshimwui khāmongpheili hangshailu, kala ina kaso kahai thāda tharkachisinwui lukli kazang khamui chieina ngasoda shailu; kaja kaso kahai thāda, ‘Aaron kala awui naomayarabingna shaiki kajina;’

³²kala sā eina khamui katai chi nathumna mei eina riktāki kajina.

³³Kala shinithangwui alungli nathumna kazip khavai kachonshimwui khāmong makanshokpaimara, nathum tharkachisinwui zimiksho chi makupranglakha eina tangda; kaja nathumwui tharkachisin shinithang zangra.

³⁴Aja kasā thāda, nathumwui vang pheomi khavai, PROHOna sālu da kasohaira.

³⁵Chiwui vang eina nathumna ngashun ngayā shinithang kazip khavai kachonshimwui khāmongli pamda, nathumna mathi khavai, PROHOwui kakaso chi sālu; kaja chithāda ili kasohaira.”

³⁶Kala PROHOna Mosesli kaso khangasak ot saikora chi Aaron kala awui naomayarabingna sai.