Read Tangkhul Naga PĀNGMONSHI 9 Bible Online

PĀNGMONSHI 9 - Tangkhul Naga bible

PĀNGMONSHI 9

¹Kachishatathang Mosesna Aaron kala awui naomayarabingli kala Israelwui ararbingli hokhui;

²kala ana Aaronli hānga, “Suihamchigatwui vang achuk kapei mukkā akha kala rikkatā kachigatwui yaovā akha da khuilaga PROHOwui mangāli khanini chi chigatlu.

³Kala Israelnaobingli hithāda hānglu, nathumna suihamchigatwui achuk kapei mevā akha kala rikkatā kachigatwui achuk kapei kumkhawui seinao akha, yaonao akha da khuilu,

⁴kala ningyatchigatwui vang mukkā akha, yaovā akha PROHOwui mangāli pha̱phayālu, kala thao eina manāt kahai tharāzāt kachigatla khuilu; kaja aja PROHOna nathumli rāchitheira.”

⁵Kala athumna Mosesna kakaso athishurda kazip khavai kachonshim mangāli khuirai, kala yarui rānganaida PROHOwui mangāli rānganinga.

⁶Kala Mosesna hānga, “Nathumna sāphalungki kaji PROHOna kaso kahai ot chi hina; kala PROHOwui tekhamatei chi nathumli rāchitheira.”

⁷ Chieina Mosesna Aaronli hānga, “Hanphutli rānganaida nawui suihamchigat kala rikkatā kachigat pha̱phayālu, na kala nawui mibingwui vang pheomi khavai sālu, kala PROHOna kakaso athishurda mibingwui kachigat chi khuirāda athum moreiwui vang pheomi khavai sālu.”

⁸Chithāda Aaronna hanphutli vanganailaga akhalattawui suihamchigatwui vang seinao chi taithata.

⁹Kala Aaronwui naomayarabingna ashee chi ali khuirāmi, chieina ana pāngmareng eina chumkhuilaga hanphutwui angachibing chili neoda ashee chi hanphutpheili heirora.

¹⁰Kha PROHOna Mosesli kakaso athishurda suihamchigatwui athao, amakei khani kala amathinli khangathān thao chi hanphuttungli riktāhaowa.

¹¹Kala asā eina ahui chi rāmrahwui ayarli mei eina riktāhaowa.

¹²Kala rikkatā kachigatwui sā chi ana taithata, kala Aaron kala awui naomayarabingna ashee chi ali khuirāmida ana hanphut kuimareida heirora.

¹³Kala rikkatā kachigat chi amarimrim eina sālaga, akui eina ngasoda athumna Aaronli khuirāmi, chieina ana chi hanphutli riktai.

¹⁴Kala akhari-akharā eina apheibing chi pheohailaga rikkatā kachigat eina ngasoda hanphutli riktai.

¹⁵Chieina mibingwui kachigat chi ana khuirai, kala mibingwui suihamchigatwui me chi ana khuilaga taithata, kala kharewui suihamchigat kachigat thāda chigathaowa.

¹⁶Chiwui thili rikkatā kachigat chi khangachā athishurda ana chigata.

¹⁷Kala ana tharāzāt kachigat chi homkha khuilaga ngathorshong rikkatā kachigat chili lāngda riktai.

¹⁸ Ana ningyatchigatwui pha̱kaphayā chila mibingwui vāng mukkā eina yaovā chi taithata; Aaron kala awui naomayarabingna ashee chi ali khuirāmida ana hanphut kuimareida kasirrora.

¹⁹Kala mukkā eina yaovā chiwui athao, akhameiwui athao, akharibingli khaluikaphina athao chila, amakeibing kala amathinli khangathān athao chila,

²⁰kala athumna athao chi asuktungli parda, athao chi hanphutli riktai,

²¹Mosesna kakaso thāda asuk eina yāshongwui akhaishāng chi Aaronna PROHOwui mangāli khayitchigat sai.

²² Chiwui thili Aaronna mibingwuishong apāng khāngkāda athumli somi; kala ana suihamchigat, rikkatā kachigat, kala ningyatshar kachigatwui eina tunga.

²³Kala Moses eina Aaronna kazip khavai kachonshimlungli zanglaga hankashok tharan mibingli somi, kala PROHOwui tekhamatei chi mi saikorali rāchithei.

²⁴Kala PROHOwui eina mei tāda rikkatā kachigat kala athao chi hanphuttungli chuitamihaowa; chi mibing saikorana kathei eina vaoda athumwui kui mashunzanga.