Read Tangkhul Naga JEREMIAH 11 Bible Online

JEREMIAH 11 - Tangkhul Naga bible

JEREMIAH 11

¹PROHOwui eina Jeremiahli kharā tuina:

²“Tuingashit hiwui tui nganākhuilu, kala Judah eina Jerusalemli kapambingli hānglu.

³Nana athumli ahāngra, Israelwui PROHO Varena hānga: Tuingashit hiwui tui makhuikasang a chili khonkashi ngasāranu;

⁴kaja nashāvā ngarāli Egyptwui eina kala mari sharkha̱wui eina thānkashok tharan, iwui khon nganālu kala kakasoso saikora sālu. Chithakha nathum iwui mi sāra, kala ina nathumwui Vare sāra, da ningmi kahaina,

⁵chithāda nashāvā ngarāli ngashit kahai seina̱ eina khuira̱ khalong lam aja nathumna pamda khalei chi mira kaji chi ina ungshung ngasakmira.” Chieina ina, “Chitharanu, PROHO!” da ngahānkai.

⁶Kala PROHOna ili hānga, “Judahwui keinungbing kala Jerusalemwui chānreibingli tui saikora hi chishātlu: Ngashitkahai tui hi khuisangda chiwui athishurda sālu.

⁷Kaja Egypt ngaleiwui eina nashāvā ngarāli ina thānkashok tharan athumli ina hāngkharik kahaina; iwui tui nganālu da aja eina tangda hāngmathinching kaji hina.

⁸Kha athumna kahāng manganāmana, kala manāshungmana, kha ichichāwui makhayā ningmāngli ngakaishitingting zathaowa. Kahāng makhanganāwui vang tuingashitli hāngsang kahai saikora chi ina athumwuitungli tāngasaka.”

⁹Latluida PROHOna ili hānga, “Judahwui mibing kala Jerusalemli kapambingwui alungli ili ngakaikashi mi leili.

¹⁰Iwui tui makhuisangngaimada avāva̱ ngarāwui khayonkhamāng kasā chili hanungluishithaida khangatei varebingli khoruma; Israelshi shimkhur kala Judahshi shimkhurna avāva̱ ngarāli ina tuingashit sākahai chi kaihaowa.

¹¹Chiwui vang, PROHOna hithāda hānga, Yanglu, athumna mayāmshokrarki kaji shāt ina athumwuitungli khuirāra; athumna ili ngakaolala ina manganāsangmimara.

¹²Chitharan Judahwui keinungbing kala Jerusalemli khaleibing athumna nganamkaphā rikkatā varebing chili ngakaora, kha athumwui kakhanang atamli athumna mahuimirarmara.

¹³Kaja nathumwui varebing keinung ngayāhaira, O Judah; kala homahā khavai, kaja Baalli thao riktā khavai hanphut, Jerusalemwui shongfa chārinda peihaira.

¹⁴Chiwui vang eina yurbing hiwui vang seihā mapomialu, athumwui vang mavaomialu, seihāla masāmialu, kaja athumwui kakhanang atamli athumna khangakao tharan ina makhuisangmiluimara.”

¹⁵“Iwui ngahānkhangaiva̱na jilala, ana sokhamasāp ot sālaga, iwui shimli awui mashun khi lei? Kapha̱ sā eina khangashit kasā china nawui shimānhaoki kaji ngalanthui ngasakpairala? Chithakha na mathān khavai leila?

¹⁶PROHOna atam akhali, khamateka olive thingrong, khamathā athei-kapanga da hosai; kha kapanga siphan-zingrot khangathung eina ngasoda ana mei eina sa̱tāra, kala aphāngbing chuitup tāhaora.”

¹⁷“Nathumli lingkasang saikorawui PROHOna, Israel eina Judahwui shimkhurna makaphā kasāwui vang, Baalli nganamkaphā riktāda ili malung thuikhangasakwui vang nathumli makaphā makhamayā vaoshokhaira.”

¹⁸PROHOna ili chitheimida ina theikhui; chiwui thili athumwui makhayā otsak nana ili chitheimi.

¹⁹Kha iva ngahuiri kahaia taithatki kaje apamli thankhavā yaonao kathā ngasāsai. Athumna shimān khavai arah sāda khangazek chi ilina kaji I matheisāmana, chiya, “Thing hi athei eina ngasoda ta̱tekhaosa, ale kharingabingwui ramwui eina katathaosa, chithāda awui mingla maphaningungluimara.” da kahāng chi.

²⁰Kha “O saikorawui PROHO, miwui ning eina wuklung tamkhayang kala mashun eina bichar sakhame, athumwuitungli nawui angathut hāngkasang ili kathei ngasakmilu, kaja ina iwui ngalang nali mikahaina.”

²¹Chiwui vang eina nali sāthatkida, PROHOwui ming singda mamarānalu, maningakha ithumwui pāngli thisangra da kahāng Anathotnaobing chili—

²²saikorawui PROHOna hithāda hānga: “Yanglu, ina athumli tandi mira; yaronnaobingna raighai eina thira; athumwui naomayara kala naongalāva̱ ngarā kakhum eina thira;

²³athum akhala mashākmimara. Kaja Anathothwui mibingli ina shāt khuirāra, athumwui tandiwui atam kharā tharan.”