Read Tangkhul Naga JEREMIAH 14 Bible Online

JEREMIAH 14 - Tangkhul Naga bible

JEREMIAH 14

¹Kazing kakāngwui pongli PROHOwui tui Jeremiahli rākahāng:

²“Judahna chapngachāda awui ngaveili ngahuipama; awui mibingna chapngachāda ngaleili mashunzanga, kala Jerusalemwui khavaokhon shavāsera.

³Awui khangambingna raobingli tara̱ sokkhavai chihovai, athumna ra̱khongli vai, tara̱ masamphangmada tara̱ham khamasai eina hanunga. Athum vaishida ningrākhaida kuirunhaowa.

⁴Ngalei chili kazing marotāmithuda ngalei ngachakkhaiserhaowa, lui khavābing khayakhaoda kuirunhaowa.

⁵Khawo mashokthuda ramwui seichui eina tangda pharādhadhar naoli nothahaowa.

⁶Ramwui gadhāna khangaili nganingda masiwui vang ramfa thāda kha̱shan-shanpama; athumwui mik matheirarthumana, khikhalajila chili thingnā-ra̱hā maleithuwa.

⁷“Ithumwui khayonkhamāngna jisālala, O PROHO, namingwui vang ngachonmilu. Kaja ithumna sa̱na̱thui kahai chungnāhaira, ithumna nali morei sāhaira.

⁸O, Israelwui kachihana, kachot atamli huikhuikhame; na khisāda ngalei hili ramkazata kha̱mi katha, thangngayākha ngasāmkhui khavai phakazata kathā ngasāpairakhala?

⁹Khisāthuda na pa̱khangapā, makanmikharara kapanga mi thāpairakhala? Chithālala O PROHO, na ithumwui alungli leida lei, kala ithumli nawui ming eina hoi, ithumli horkahai masāmialu.”

¹⁰Mibing hiwui apongli PROHOna hithāda hānga: “Athumna hithāda ngaruikazatli leishihaoda, athumna athumwui phei mangasāmana; chiwui vang PROHOna athumli makhuikasangna, ara ana athumwui khayonkhamāng phaningungra kala athumwui moreili tandi mira.”

¹¹PROHOna ili hānga, “Mibing hiwui phākhavaiwui vang seiha masāmialu.

¹² Athumna kakhum eina pamlala ina athumwui khavao mashāmimara, rikkatā kachigat, theishirai chigatlala ina makhuisangmimara; kha ina raighai eina, chāmrei eina, kazāt eina chithitra.”

¹³Chieina ina hānga, “Iyavo, Proho VARE, yangmilu, marānbingna athumli, ‘Nathumna raighai matheimara, chāmreila matheimara, kha apam hili ngashit kahai chingri kahai ngasāra da hānga.’ ”

¹⁴Chieina PROHOna ili hānga, “Marānbingna iwui ming singlaga kapikta marānphāphā kajina. Athumli ina machihomana, athumli kakasola makasomana, kahāngla mahāngmana. Athumna kakapika khamahā, masā khavai khanong, kala athum khalattawui ningli phaningphāphā kaji tui kahāngna.

¹⁵“Chiwui vang eina ina machiholala, iwui ming singlaga, raighai eina chāmrei ngalei hili marāmara da khamarānbing chi, raighai eina kala chāmrei eina thira da PROHOna hānga.

¹⁶Kala athumna kahāng tui chi kashābingli Jerusalemwui eina kashamshokhaora, raighai eina kala chāmrei eina thira, athumli chifa khavai mi maleisāmara—athumla, apreiva̱̱ ngarāla, naomayara kala ngalāva̱ ngarā saikorali chifa khavai mi maleisāmara. Kaja athumwui makhayā otsak chi athumwuitungli ina heirorra.”

¹⁷“Athumli tui hi nana ahāngra: ‘Ngashun ngayā mateila imikli chāra̱ tāshon tāthairanu; kala athum mangasāmaranu, kaja iwui mibingwui kachingva̱ naongalāva̱li marlak eina shaomida khamā haklak eina za̱haira.

¹⁸Luili ayang, raighai eina kathibingwui angun thei! Keinungli zang chāmrei kazāt eina kathi pemting! Kaja marān eina pāngmonbingna theithangkhamei maleila ngalei chili athumwui ot sāzata.’”

¹⁹Nana Judahli khalanchao kahaila? Zionli namanglāna sānchaohaola? Khisāthuda nana ithumli khanang ngasakta ithumwui vang kharai maleithu? Ithumna chingri kahai phai, kha kaphā mashokmana; raikhavai atamwui vang phai, kha yanglu, khangachee khangachāmang.

²⁰O PROHO, ithum makhayā morei sāhaira, kala ishāvā ngarāna khayonkhamāng; ithumna nawui mangāli morei sāhaira kaji ithum mayai.

²¹Naming wui vang ithumli machinkāmialu. Nawui tekhamatei wungpamkhong mamaishi ngasakalu; ithumli nawui tuingashit makaimila kaphaningungmilu.

²²Yurbingwui makhamashunga varebingwui ngachaili kazing romishapa khipā lei? Lha kazingramna zingrot romishapla? A chi na maningmalā, O PROHO ithumwui Vare? Ithumna nali chihāna, kaja ot saikora hi nana sai.