Read Tangkhul Naga JEREMIAH 16 Bible Online

JEREMIAH 16 - Tangkhul Naga bible

JEREMIAH 16

¹PROHOwui tui china ili rāhānga:

²“Apam hili na ngalā makhuipaimara, naola mapharāpaimara.

³Kaja apam hili kapharā naobing, athumli pharākakhui ava̱va̱ kala avāva̱ ngarāwui pongli PROHOna hithāda hānga:

⁴Athum zakkashi kazāt eina thira. Athumwui vang chapkhangachāla machapngachāmara, kachifala machifamara; athum paih thāhaora. Athum raighai kala chāmrei eina thira, athumwui angun khamasaili yongkazat vānaobingwui kala ramsāwui kashakazā ngasāhaora.

⁵“Kaja PROHOna hithāda hānga: Wukhanangda khalei shimli mazangalu, machapngachaalu, masifarumalu; kaja mibing hiwui eina iwui chingri kahai, makhangachei leikashi kala lukhamashan athumwui eina khuishok kahaina da PROHOna hānga.

⁶Apam hiwui kharei kateo mateila thiserra; athumli machifamara, kala athumwui vang sam chichāpta lah sitāda chapngachā khavai khipākhala maleisāmara.

⁷Kathiwui vang sifada khalei athumli ning ringphā khavai khipānakha khong makhaisangmimara; kala ava̱ avā kathiwui vang ning lumkhavai mamimanglakmara.

⁸“Nana morkasong shimli vāda phāshak phazā khavai athumli mapam ngarumpaimara.

⁹ Kaja Israelwui Vare saikorawui PROHOna hithāda hānga: Yanglu, nathumwui miktāli kala nathumwui atamli, apam hili ringkaphākhon khamathānkhon, kala shakazā mayara eina ngalāva̱wui khamathānkhon tang ngasakhaora.

¹⁰“Nana tui saikora hi mibingli kahāng tharan, kala athumna, ‘Khiwui vang PROHOna ithumli mamayāla hiyākha kharit tui hanghao? Ithumwui morei khi leihao? Ithumwui Vare PROHOli ithumna khi morei sāhaokhala?’ da hāngsaakha,

¹¹chitharan nana athumli hithāda ngahānkāra: PROHOna hānga, ‘Khikhalajila nashāvā ngarāna ili horhaida vare khangateibingwui thi shurthuihaowa kala otram ngatha̱da athumli khoruma, kala ili horchaohaida iwui ainla mamayonmana,

¹²kala nashāvā ngarāli nathumpāna zakshimeida sākahaiwui vang, kaja yanglu, nathum kachichāwui makaphā kaphaning chili shurthuihaida ili manganāsangthuwa.

¹³Chiwui vang ngalei hiwui eina ina nathumli katāva̱li, nathumnalapai lah nashāvā ngarānalapai matheikasapamli kahaivāhaora, kala chili nathumna vare khangateili ngashun ngayā otram ngatha̱ra; kaja nathumli ina lukhamashan machitheiluimara.’”

¹⁴“Chiwui vang eina yanglu, zimiksho chi rārāli, da PROHOna hānga, chitharan Egypt ngaleiwui eina Israelwui mibingli thānshokkhame PROHOwui ming singda kahāngna da mahāngla,

¹⁵kha Israelwui mibingli atungshongwui ngalei eina kala ana kashamvā kahaipampamwui eina thānshokkhame PROHOwui ming singda kahāngna jira. Kaja athumwui avāva̱ ngarāli ina mihaikasā athum khalattawui apam chili khuiungluishitra.

¹⁶“Yanglu, ina khai kaphā mi kachungkha hohaira, da PROHOna hānga, kala athumna phākhuira; chiwui thili ina sākharenga kachungkha chihora, kala athumna phungrei-phungrā pam kachida kala lungkai kachida athumli rengzatra.

¹⁷Kaja, imikna athumwui kasāsā apong saikora thei; athum iwui eina mathumhaimana, athumwui khayonkhamāng kasāla imikwui eina kathumla mathumhaimana.

¹⁸Kala ina athumli khanishida athumwui khayonkhamāng eina moreiwui vang angathut hāngsangra; khikhalajila athumna iwui ngalei ningkakachai meoma̱bing eina sāmakhaomihaira, kala ningkakachai otsakna iwui shimlui chipemmihaira.”

¹⁹O PROHO, iwui pangshapa kala iwui ngayin khavaipam, kakhanang atamli iwui ngayin khavaipam, okathui vākatangwui eina yur kachiva̱na nali rāhāngra: “Ishāvā ngarāna kakapik maningla khangatei akhala mamathuisanghaimana, makankhanā tongkazā makhalei otmānga.

²⁰Mina akhalattawui vang varebing sākhuipaila? Chikathā chiya varebing maningmana!”

²¹“Chiwui vang eina yanglu, ina athumli iwui pangshap eina yāng akha shida theingasakra, kala iwui ming PROHOna da athumna theikhuira.”