Read Tangkhul Naga JEREMIAH 18 Bible Online

JEREMIAH 18 - Tangkhul Naga bible

JEREMIAH 18

¹PROHOna hānga:

²“Ham kasemawui shimli tālu; chili ina nali iwui tui hāngra.”

³Chieina ina ham kasemawui shimli katā thara a ham semsai.

⁴Semkakhui ham chi mathāda mashok kachida ana leikhon chi khuida khangatei ham sāluishita.

⁵Chiwui thili PROHOna ili hānga:

⁶Ham kasaana leikhon eina kasem thāda nathum Israel yurli ina sāki kajiwui mashun maleimala? Ham kasemana awui pāngli leikhon kasing thāda nala iwui pāngli leida lei.

⁷Kachikathāthā atamli ina kachikathā yur akhalilapai, wungram akhalilapai, sākazamhaorada vaoshokhailala,

⁸yur china makaphā kasāwui eina ngareiungakha, ina sāra da hānghaikasā chi ina masāmara.

⁹Lākhashong, yurlapai, wungramlapai ina sakāmira kala lingkāmira da hanghailaga,

¹⁰yur china iwui kahāng manganāmada makaphā saakha, ina sārada hanghaikasā chi ina masāmara.

¹¹Chiwui vang eina, ara, Judahwui mili kala Jerusalemwui mibingli hānglu: Yanglu, PROHOna hithāda hānga, Ina nathumli makapha sākhavai machukta lei kala ngarānda lei. Kachichāwui makaphā chiwui eina latunglu, kala nawui apong kala otsak mashungkhuilu jilu.

¹²“Kha athumna ngahānkāi, ‘Aremana! kachichāwui sākhangai sāra; kala makaphā sākhangai athishurda zatra.’”

¹³“Chiwui vang PROHOna hithāda hānga: Miyurbingli ngathingyanglu, khipāna hikathā kashāhairala? Kachingva̱ Israelna zakshilāk kahai ot sāhaira.

¹⁴Lebanonwui horam kathak Sirionwui lungkai eina thuila? Phungreiwui eina longkatā khamakui tara̱ thengpairala?

¹⁵Kha iwui mibingna ili malaihaira; athumna makhaninga varebingli nganamkaphā riktai; achālakhawui shongfabing chili athum phei ngaphokhaowa, chānrei horhaida shongchonli thuihaowa.

¹⁶Athumwui ngalei khangacheena pem ngasaka, katang mavaila kasiror khavai ngasāhaowa. Chili khamakāna kachiva̱na ngacheenāhaida kui khayita.

¹⁷Yangkashebingwui mangāli zingshoshongwui masi thāda ina athumli phankhayāngmihaora. Athumwui ringkashi atamli, athumli mai mangareivāla khana̱rorhaora.”

¹⁸Chiwui thili athumna hānga, “Rālu, Jeremiahli sāmihaosa; ithumli ngachonmi khavai pāngmonla, hāngchitheimi khavai thangkhamabingla, shokki kaji tui hāngmi khavai marānla leichingra. Mamatuilak khavai khangarān akha sāsa, awui tui kakhuila makhuiluiasa.”

¹⁹O PROHO, ili khanganāsangmilu, iwui kapo khuisangmilu.

²⁰Kaphāwui sāman makaphā ngasāpairala? Kha imanglā khuikhavaiwui vang athumna chom chuihaira. Phaningungmilu, ina kathāda athumwui vang kaphā hāngmikhavai, athumwui eina nawui malungkhavāt khuithuimi khavai nawui mangāli nganingkhala kaji.

²¹Chiwui vang eina athumwui naomayarabing chāmreili horsangmihaolu; raighaiwui pangshapli mihaolu, apreiva̱̱ ngarā nao maleila ra̱meipamranu. Athumwui mayarnaobing kazātkashishi eina thiranu, athumwui yaronnaobing raili raighai eina maseiranu.

²²Nana kashuirak athumwuitungli sakathatabing khuikharā tharan athumwui shimli ringkhangākhon ngaunlophaoranu! Kaja athumna ili khuikhavai chom akha chuihaira, kala ipheiwui vang khalen sanghaira.

²³Chithālala, O PROHO, athumna thumsak eina ili sāthat khavai khangarān saikora nana thei. Athumwui khayon mapheomialu, nawui maiyan eina athumwui morei pheokhamila mapheomialu, nawui mangāli athum pitāranu, nawui malungkhavāt atamli sāmihaolu.