Read Tangkhul Naga JEREMIAH 19 Bible Online

JEREMIAH 19 - Tangkhul Naga bible

JEREMIAH 19

¹PROHOna hithāda hānga, ham kasemawui eina ngaleiham akha alokhuilu, kala kha̱wui kathānabing kaikha, pāngmon kaikha da hokhuilaga,

² Hinnomwui naomayarawui tampākli vāda Hamkāi Ngavei zangkhavai chili ina kahāng tui chi vaomalānlu.

³Nana hāngra: “PROHOwui tui nganālu, O Judahwui awungabing, kala Jerusalemwui mibing. Israelwui Vare, saikorawui PROHOna hithāda hānga, Yanglu, apam hili ina chiyākha zakkashi ot shokngasakki kaji hi kashābingna khanā mathakra.

⁴Khikhalajila mibingna ili horhaowa, avāva̱ ngarāna makathei, Judahwui awungabingna makathei kala athum eina tangda makathei varebingli nganamkaphā ot riktāda apam hi sāmakhaohaira; khiwui vangkhala kaja khayon makhalei miwui asheena apam hi pemhaira.

⁵Athumna Baalli khorum khavai kajujuipamli hanphut sākhui, kala ina makakaso lah iwui ningli maleisālak kaji ot sāda athumwui naomayarabingli Baalli pha̱khavai hanphutli riktai.

⁶Chiwui vang eina yanglu, da PROHOna hānga, apam hili Topheth, maningakha Hinnomwui naowui tampāk maholuila Shaokathatwui tampāk hoki kaji atam rārāli.

⁷Apam hili Judah eina Jerusalemwui khangarān saikora khikha makhaning ngasā ngasakra; kala athumwui mibingla yangkashibingwui mangāli raighai eina thingasakra, kala manglā khuikida khangarān athumwui pāngli thisang ngasakra. Athumwui angun khamasaili yongkazat vānaoli kala ramsāli shaingasakra.

⁸Kala ina keinung hi khangachee ngasā ngasakra, kasirorki kaji ot, rākakān kachiva̱na ngacheera kala kasirorra khikalajila kalāshāt shokkahai saikora chiwui vāngna.

⁹Kala athumwui naomayara eina ngalāva̱ ngarāwui asā ina athumli shaingasakra, kala athumwui manglā khuikida kasā athumwui yangkashibingna kuinam kahaiwui kakhanang atamli khongnainao eina khongnainao shaingarokra.”

¹⁰Chiwui thili nali ngasokazatbingwui mangāli ngaleiham chi sakhailaga,

¹¹athumli nana hāngra, saikorawui PROHOna hithāda hānga: “Ham kasaawui ngaleiham sakakhai thāda mibing hili kala athumwui keinung hi ina sākhaira, kaihaida masākhuiluipaimara. Tophethli chifara, khikhalajila chifa khavai apam katei maleisāmara.

¹²Apam hi kala chiwui mibingli ina hithāda sāmira, kala keinungla Topheth thāda sāmira.

¹³ Jerusalemwui shimbing kala Judah awungabingwui shim, shimtung saikorali, kazingramli khalei saikorali nganamkaphā ot rikkatā kala varebing khangateili ra̱khalekkasā shim saikora chi Topheth thāda sākhamānghaora,” da hānga.

¹⁴PROHOna marān khavai chihokhavāpam Tophethwui eina Jeremiahna latungda PROHOwui shimwui kayāngli nganingda mi saikorali hānga:

¹⁵Saikorawui PROHO, Israelwui Varena hithāda hānga, “Yanglu, keinung hiwuitungli, kala kha̱ saikorawuitungli, ina hāngtā kahai makaphā saikora chi tāngasakra; khikhalajila athumna ngakaishitingting iwui tui makhuisangthuwa.”