Read Tangkhul Naga JEREMIAH 2 Bible Online

JEREMIAH 2 - Tangkhul Naga bible

JEREMIAH 2

¹PROHOwui tui chi ili rāhānga,

²“Vāda Jerusalem katongana shākhavai vaomalānlu da PROHOna hānga, ina phaningunga, mayar-ngalā sālakha nawui ningkasang, mākkhām kahaiva kathawui leikashi, khikha mayaokasang ngalei, lamhāngli nathumna ili kathāda shurzatsakhala kaji chi.

³Matheikhare heithei Israel hi PROHO wui mangali kathara ngasāsai. chi kashaia saikora yomphungda kalākashi athumwuitungli tai da PROHOna hānga.”

⁴PROHOwui tui nganālu, O Jacobwui shimkhur, kala Israelshi shimkhur saikora.

⁵PROHOna hithāda hānga: “Nashāvā ngarāna ili khi khayon samphanghaoda iwui eina katāva̱li thui kahaikhala, kala makānkhanāli shurzatta makankhanā sathuihaokhala?

⁶Athumna, ‘Egypt ngaleiwui eina khuikashoka, lamhāngli thankazata, siwukwui lamli, khorchopli, kazing kakāng lamli, kala tangmangting kahaipamli, mi makakān khipākha makasompamli thankazatapa PROHO chi kali leilikhala?’ da maphāmana.

⁷Athei-arai kala khamathā otyurbing eina ringphā khavai, khavāt makhalei lamli ina nathumli thānsangmi. Kha nathumna chili vākashung tharan iwui ram sākhamānghaowa, kala iwui shimlui ningkakachai ot ngasa ngasakhaowa.

⁸Pāngmonbingna, ‘PROHO kali leili?’ da mangathingmana. ain kasingbingna ili matheimana; khamungbingna ili ngakaishi, marānbingna Baalwui ming eina hāngmarāna, kala makānkhanā ot chi phāzata.”

⁹“Chiwui vang eina ina nathumli ngahātchingda lei, da PROHOna hānga, nanao ngarāwui naongarālila ina ngahātra.

¹⁰Kaja Cypruswui kongphei kānkāda ayanglu, maningakha Kedarlila chihovāda munlak eina ayangkhui ngasaklu; hikathāthā ot maleihairakhala da.

¹¹Yur akhana athumwui varebing akachang maninglala, athumwui varebing khangachei leihairala? Kha iwui mibingna khikha makankhanāwui vang athumwui tekhamatei ngacheihaira.

¹²Chili ngacheelu, O kazingram, matakhakhaida kashuilu, da PROHOna hānga.

¹³Kaja iwui mibingna makaphā khani sāhaira: longkazata tara̱ khame ura̱ ili malaihaowa, kala mangarungki kaji ra̱khong athumna khonkhui.”

¹⁴“Israel raonaola? Raonaona kapharā naola? Maningakha kathāda miwui sāshai sāthuihao?

¹⁵Kazingkha̱na ali nirhaira, athumna panglak eina nihaira. Athumna awui lam ramphomihaira, awui keinungla sākathānmihaida mi akhala maleithura.

¹⁶Chili lāngda Memphis eina Tahpanheswui mina nawui wungkuihon shaokhaimihaira.

¹⁷Ana nali apong chili thānkazat tharan, nawui Vare PROHOli malaihaida nathum khalattawuitungli hi khuikharā maningmala?

¹⁸Nathum Egyptli khavāwui tongkazā khi lei, Nilewui tara̱ amang khavaila? Assyriali khavāwui tongkazā khi lei, Euphrateswui tara̱ amang khavaila?

¹⁹Nathumwui makhayāna nali machinra; kala nawui shitkasang kahat china nali machinra. Nawui Vare PROHOli horkahai hi nawui vang makaphā kala kakhā otna kaji yangda theikhuilu; ili khangachee nathumwui alungli maleimana,” da saikorawui PROHO VAREna hānga.

²⁰“Kaja nathumna nathumwui langkon sāshatta, nar kahaiwui eina shok kahai atam kasāngkhahaira; kala nathumna, ‘I otram mangatha̱luimara’ da hānga. Mha, kaphung kajuitung kachiva̱li, khamatek thingrongphei kachiva̱li khayorva̱ thāda khoruma.

²¹Chithālala ina nathumli mathāmeikap kaje arongwui vang kashenga athāmāng hākhuilaga lingsanga. Chithākha kathāda hiyākha makākashunga kharar-ngahongwui drakhārong sāthuihaokhala?

²²Nathum khalatta lye eina ra̱vailala kala sāpon tarākha singlala, nathumwui khayonwui chukkhara̱ iwui mangali mavānranga da Proho VAREna hānga.

²³Nana kathada ‘I mamakhaomana, Baalwui thi I mashurmana’ da hāngpairakhala? tampākli kathada zatsākhala kaji phaningunglu, nana khi sāhailikhala theilu— utlāva̱na mathangkazat thāda,

²⁴kharar-ngahongwui gadha alāna ngalātkachāng lamhāngli masi kasimkazat thāda! Awui khamathang khipāna khamrarra? Ali phākazat athum khanang khavai maleimana, awui atamli athumna ali samphangra,

²⁵pheihop masangla naphei zatung zatvā masālu, nakharokla matheng ngasakalu. Kha nana, ‘Aremana, kaja azak makathei kha̱mibingli ina leishihaira, kala athumli I shurzatra’” da hānga.

²⁶“Khaleli tukkhuihaiakha maishi khangasak thāda, Israelwui shimkhurla maishira: athum, athumwui awungabingla, wungnaobingla, pāngmonbingla, marānbingla,

²⁷thingrongli, ‘Na ishāvāna’ kajibing, ngalungli ‘Nana ili pharai’ kajibingna. Kaja athumna ili khanuk eina ngareimi, amai eina mayangmana. Kha athumwui kakhanang atamli, ‘Ngakarthuida rāhuimilu!’ da hānga.

²⁸“Kha nathum khalattana sākakhui varebing chi kali leili? Nathumwui kakhanang atamli, athumna shapakha, athum ngakarthuiranu; O Judah, nathumwui keinung chiyākha khalei thāda nathumwui varebingla ngayāda lei.

²⁹Nathumna khisāda iwuitungli khamatuikhala? Nathum saikora ili ngakaishiya da PROHOna hānga.

³⁰Nanao ngarāli aremali ina shaowa, athumna mashungkakhui malei; kazingkha̱ sākashi thāda, nathum khalattawui raighaina nathumwui marnbingli mayuisanga.

³¹O mithot, nathum PROHOwui tui nganākhuilu. I Israelwui vang lamhāng lah tangmangting kahai ngalei ngasāhaola? Maningakha kathāda iwui mibingna, ‘Ithum ningkhānhaira, ithum nali maungluilakmara’ da hāngkhala?

³²Ngalānaona awui sāri lah ngalā khām kahaiva̱na awui sāri khongnāng malaihaipaila? Kha iwui mibingna mashānkharar zimiksho ili malaihaowa.

³³Leikashinao phākhavai nathumna kayākha mathāda apong pha! Chiwui vang makhayā sha̱naobingli eina tangda nathumwui apong chi tamchithei.

³⁴Kala nathumwui kachonlila, khayon makhalei, kachāmabingwui ashee kāda lei; athumna shaokhai kazang nathumna matheimana. Kha saikora hi sāhailaga nathumna,

³⁵‘I khayon makhaleiana; kachangkhat eina awui malungvāt iwui eina ngareithuichaohaira’ da hānga. Yanglu, ‘I morei masāmana’ da kahāngwui vang, ina nali bichar pamli khuivāra.

³⁶Nawui apong ngacheilaga nana kayākha paida zatnganaoli! Assyriana nali maishi khangasak thāda, nali Egyptna maishi ngasakra.

³⁷Hiwui einala nathum pāng kuitungli parda nathum zatthuihaora, kaja, nathumna ning horkasangabing chili, PROHOna mamayāmana. kala athumwui eina nathum mamataisangmara.”