Read Tangkhul Naga JEREMIAH 21 Bible Online

JEREMIAH 21 - Tangkhul Naga bible

JEREMIAH 21

¹Malchiahwui naomayara Pashhur eina Ma-aseiahwui naomayara pāngmon Zephaniahli Zedekiah awungana Jeremiahwuili chihokhava chitharan PROHOwui tui rakahāng chi hina; kaja,

² “Babylonwui awunga Nebuchadnezzarna ithumli rai sākida ngarāndalei; PROHOna awui matakhak kahai otsak saikorawui athishurda ithumwui vang ngararmilapai, kala ithumwui eina ali latung ngasakhaolapai, PROHOli ngahānmilu.”

³Chieina Jeremiahna athumli hānga:

⁴“Israelwui PROHO Varena hithāda hānga: ‘Zedekiahli nathumna hithāda unghānglu: Yanglu, nathumna Babylon awungali, kala nathumwui phākho ayar rākuinam kahaia Chaldeanaobingli ngarar khavai nathumwui pāngli singda khalei zeighai chi ina masho-ngacheimihaora; kala athumli ina kazemkhuida nathumwui keinung alungli rākazip ngasakra.

⁵I khalatta pāng katingda pāngthei kharei eina, malungvāt eina, kala sāshāt eina nathumli ngararra.

⁶Kala ina keinung hili khaleibing, mila sha̱keila shaothatra; athum hakkhamahā kazāt eina thira.

⁷Chiwui thili Judahwui awunga Zedekiah, kala awui raobing, kala keinung hiwui mibing kazāt, chāmrei, kala raighai eina mathikhangakān athumli Babylonwui awunga Nebuchadrezzarwui pāngli, kala athumwui yangkashebing, manglā khuikida kasā athumwui pāngli horsangmiserhaora. Ana athumli raighai eina sāthatra, athumli malumashanmara, kashākla mashākhaimara, huikhamila mahuimimara.”

⁸“Kala mibing hili nana hithāda hāngra: ‘PROHOna hithāda hānga: Yanglu, kharingwui apongla, kathiwui apongla, ina nathumli chitheimihaira.

⁹Keinung hili kapamabing raighai eina, chāmrei eina kala kazāt eina thira; kha nathumli kuinam kahaia Chaldeanaobingli ayāmsangda hamkasangbing mathimara, athumwui manglā raiman sāda kahai samphangra.

¹⁰Kaja keinung hili ina mamayākhangai, kaphāwui vang maningla makaphāwui vang ngarānkuphaira da PROHOna hānga: Babylon Awungawui pāngli horsangmida ana mei eina thottāhaora.’”

¹¹Kala Judah awungashi shimkhurli hānglu, “PROHOwui tui nganālu.

¹²O Davidwui shimkhur! PROHOna hithāda hānga: Ngathor mashun bichar sāmilu, kala phama̱shaomi kahaipali kashaopāwui pāng eina kankhuimilu, maningkha iwui malungkhavāt mei thāda tāra kala chuida khipānakha masāshimitrarmara, nathumwui makaphā kasāwui vangna’”.

¹³“Yanglu, O tampākli kapambing, ina nathumli mamayāmana, O tampākwui lunghār da PROHOna hānga; nathumna hānga, khipāna ithumli tāngasungshaprakhala? Khipāna ithumwui shimli rāzangshapkhala?

¹⁴Nathumwui kasā athei athishurda, ina nathumli tandi mira da PROHOna hānga; awui ngahongli ina mei thotra, kala china kuikhamareili khalalei saikora chuitāserhaora.”