Read Tangkhul Naga JEREMIAH 22 Bible Online

JEREMIAH 22 - Tangkhul Naga bible

JEREMIAH 22

¹PROHOna hithāda hānga: Judah awungawui shimkhurli vāda tui hi ahānglu,

²Davidwui wungpamkhongli kapama O Judahwui awunga, raobing kala ngavei eina kazanga saikora PROHOwui tui nganālu, da hānglu.

³PROHOna hithāda hānga: “Mashun kala khangarong eina bichar sāmilu, kala phama̱shaomi kahaipali kashaopāwui pāngwui eina kankhuimilu. Kha̱mili, marānaoli, kala ra̱meinaoli khayon sākashila masālu, kala apam hili khayon makhalei miwui ashee matā ngasaklu.

⁴Kaja nathumna tui hi khuisang kachangkhatakha, keinung hili Davidwui wungpamkhongli kapama awungabing sigui kala siguigari tonglaga zangra, athumla, athumwui raobingla, mibingla kazang samphangserra.

⁵ Kha nathumna tui hi manganākha, I khalattana shākhi sāda kahāng hina, kaja shim hi machohaora da PROHOna hānga.”

⁶“Judah awungawui shimkhurwui pongli PROHOna hithāda hānga: Iwui vang na Gilead kathāna, Lebanonwui kaphungton kathāna; chithālala mi maokkathui keinung, siwuk akha sāngasakra.

⁷Ina nali sāshimān khavai ngarānra, athum ava̱va̱li zeighai chisinra; kala athumna nathumwui mathāmeithui kaje cedarthing ta̱tekra, kala chibing chi meili horsanghaora.”

⁸“Kala miyur kachungkhana keinung hi rāmakānra, kala mi kachiva̱na awui khongnaili khiwui vang PROHOna hiyākha kahaka keinung hili hithāda sāmikahaikhala? da ngahānra.

⁹Kala athumna ngahānkāra, khikhalajila athumna athumwui Vare PROHOwui tuingashit horhaida vare khangateili phaningda khorumhaowa.”

¹⁰Kathe chiwui vang machapalu, kala awui vang sikafala masifalu; kha tukthui kahaipa chiwui vang soso chapngachālu, kaja ava awui ramli ungyang khavai maungluimara.

¹¹ Kaja Josiahwui nao, Judahwui awunga Shallum, avāva̱ Josiahwui mahut shinda munglakha apam hiwui eina thuikahaiapā chiwui pongli PROHOna hithāda hānga: “A hili malatungluimara,

¹²kha ali tukvā kahai apam chili athisangra, kala a ngalei hi maungtheiluilakmara.”

¹³Makhangarong eina awui shim kala makhamashung eina khamato kābing sakakāpā chi kakhanang ngasāranu; awui khongnainaoli khikhala mamila ot sākhangasaka, awui ngalangmanla makhame;

¹⁴“shim kahakva̱ akha ina sākhuira, khamato kā mashāchā eina sākhuira,” charfala cedarthing eina sāsangra, ari kahunga neomithaora, da kahānga chi.

¹⁵Cedarthing kachungkha khaleiwui vang na awunga akhana da phaningla? Nashāvāna mangzālala mashun eina khangarong masāmala? Chieina awui vang kaphā ngasasai.

¹⁶Ana kachāma kala khavātabingli mashungrik eina sāmi, china awui phākhavai ngasāsai. Hi ili katheiwui vang maningmala? da PROHOna hānga.

¹⁷Kha namik kala naning khalei hiya, nawui ning makatharwui tongzā khavai, khayon makhaleili ashee tākhavai, rekharek khavai, ngashaokhavaiwui vangmānga.

¹⁸ Chiwui vang eina Josiahwui nao, Judahwui awunga Jehoiakimwui pongli PROHOna hithāda hānga: “Khipānakha, ‘Iyavo, ichinā!’ lah ‘Iyavo izarva̱!’ da ali machapsangmimara. Khipānakha ‘Iyavo PROHO!’ lah ‘Iyavo nawui reikhamatai!’ da ali machapsangmimara.

¹⁹Gadhā akha kaphum thāda alila phumra, Jerusalem ngavei kānda shimenshoklaga horhaora.”

²⁰Lebanonli kālu, kala vaolu, Bashanli angavaolu; Abarimwui eina ngakaolu, kaja nali leikashebing sāshimānserhaira.

²¹Na nganantāp eina leilakha ina hānga, kha I manganāsangmara, da nana hānga. Iwui kahāng makhanganā hi na nganuilakhawui einana.

²²Nawui yao kahomabingli masina homra; nawui leikashebing tukthui haora; chiwui thili nawui makhayāwui vang na maishira kala pa̱ngapāra.

²³O Lebanonli kapānabing, cedarthinglungli vānaothip thāda kapamabing, nawuitungli kachot kharā tharan nathum kathāda ngahuira̱khala, sha̱naona naokhara̱ kachot thāda!

²⁴ “PROHOna hānga, ina katheina, Jehoiakimwui nao, Coniah Judahwui awunga hi iwui yāpangwui mahor namkhavai khutopna jilala, ina sershokhaora

²⁵kala nathumwui manglā khuikida kaphā, nathumna khangachee, Babylonwui awunga Nebuchadnezzar, kala Chaldean mibingwui pāngli horsangmira.

²⁶Nali, kala nali kapharāva̱ nashāva̱li, nali mapharākasang ram khangatei akhali ina kahaivāhaora; kala chili na athisangra.

²⁷Kha athumna kahaoda hanungkhangai ngalei chili athum malatungluimara.”

²⁸“Coniah kaho mi hi yangkakharinga, hamkai, mi khipākhana mayangsangkhami ham kathāla? Ali, kala awui naomayarali kahaithuihaida athumna makathei ramli khisāda raithāhao?”

²⁹O ngalei, ngalei, ngalei, PROHOwui tui nganālu!

³⁰PROHOna hithāda hānga: “Hipa hi nao makhaleia mina, da kapisanglu; awui thotli maikhayā masamphangki kaji mina; kaja, awui naotun khipanakha Davidwui wungpamkhongli pamlaga, Judahli mamungluimara.”