Read Tangkhul Naga JEREMIAH 23 Bible Online

JEREMIAH 23 - Tangkhul Naga bible

JEREMIAH 23

¹“Iwui yaohomphungwui yaonaobingli kashamkakhayāng kala sakakhayānga yaokahomabing kakhanang ngasāranu!” da PROHOna hānga.

²Chiwui vang eina iwui mibingli yangkhame yaokahomabingwui pongli Israelwui Proho VAREna hithāda hānga: “Iwui yao mahomla nathumna chipenserhaira kala kashamserhaira. Yanglu, nathumwui makhayā otsak chiwui vang ina nathumli mahaimara da PROHOna hānga.

³Chiwui thili ngalei khangatateili ina kashamvā kahaibing saikorawui eina shāk kahai athum saikora kazipkhuiluira, kala athumwui yaoshimli khuiungmiluishitra, kala athei kachungkha matheida mayāsangra.

⁴Ina athumli yangmi khavai yaokahomabing phāsangmira, kala athumna mangacheeluimara, kaphaning masuitāluimara, kashimānla mashimānmara, da PROHOna hānga.

⁵ “Yanglu, Davidwui vang ina khangaronga Aphāng akha shokngasaki kaji atam chi rārāli, kala ana awunga sāda mungra kala thangmeilak eina sāra, kala ngalei hili mashun kala khangarong eina bichar sāmira.

⁶Awui thotli Judahli kanmira, kala Israel chingri eina okthuira. Kala ali hoki kaji aming chi hina: ‘PROHO hi ithumwui khamashung khangarongana.’

⁷“Chiwui vang eina yanglu, zimiksho chi rārāli; da PROHOna hānga, chitharan mibingna, ‘Israelwui mibingli Egypt ngaleiwui eina thānkashoka PROHOwui ming singda kahāngna’ da mibingna mahāngluimara,

⁸kha ‘Israel shimkhurwui ara̱-azābingli atungshongwui ngalei eina kala ana kashamvā kahai ngalei saikorawui eina thānkashoka PROHOwui ming singda kahāngna’ da hāngra; chiwui thili athum khalattawui ngaleili pānra.”

⁹Marānbingwui pongli: Imalung ngawokkhaihaira, ara̱-arā tachokhaira. I khamaripa mi thāhaira, zamkhorna minkahaia thāda, PROHO wui vang kala awui katharatuiwui vang.

¹⁰Kaja ngalei hi phokaphāna pema; khonkashiwui vang ngaleina sifay, lamhāngwui seihomphungla ngaikhokhaira. Athumwui otsak makaphāna, kala athumwui pangshap mamashungmana.

¹¹“Marānla, pāngmonla Vareli kathei malei; iwui shimli eina tangda athumwui makhayā otsak sai, da PROHOna hānga.

¹²Chiwui vang athumwui shongfa khanganaili ngayāshong kazat thāhaora, chili kashamvāda kongluira; kaja athumli tandi mikum ina athumwuitungli zakkashi khuirāra, da PROHOna hānga.

¹³Samariawui marānbingli ina mamayākhangai otsak thei; athumna Baalwui ming eina marāna, kala iwui yur Israelli thānnguiya.

¹⁴ Kha Jerusalemwui marānbingli ina zakkashi otsak thei; athumna shām sai kala kakapiklungli zata; makaphā kasā mibingli kasatsangda khipākha makhayāwui eina malatungmana, iwui mangāli athum saikora Sodom thāserhaira, kala chiwui mibing Gomorrah thai.

¹⁵“Chiwui vang marānbingwui pongli saikorawui PROHOna hithāda hānga: yanglu, athumli ina thingkhā akha chishaira, kala mangkhavai kathiri kasanga tara̱ mira; kaja Jerusalemwui marānbingwui eina makathara saikorali shivāthaira.”

¹⁶Saikorawui PROHOna hithāda hānga: “Makakachanga otli chihān khavai marānkhame athumwui tui makhuisangalu; PROHOna kahāng maningmana, athum khalatta phaningkakhui tui kahāngna.

¹⁷PROHOwui tuili chinkakā athumli ‘Nathum khikha mathālakmara’ da athumna hangchinga; kala kachichā khalattawui ningli ngakaishitingtingda kazatabingli athumna, ‘Nathumwuitungli kalākashi marāza̱lakmara’” da hānga.

¹⁸“Kaja athumwui ngachaili khipāna PROHOwui kaziplungli awui tui shākhui khavai kala theikhui khavai vānganinghairakhala? lah khipāna awui tui khuisangda nganāhairakhala?

¹⁹Yanglu, PROHOwui siphan zingrot! Malung kathui sur kakhaning thāda; makhayāwui kuili chi ngawokkhaira.

²⁰Awui ningli sāki kaji sāda makupranglakha eina tangda PROHOwui malungkhavāt masuitālakmara. Naoda nathum chi theishingkhuinaora.”

²¹“Marānbingli ina machihomana, athum khalatta kazatna; athumli ina mangazekmana, chithālala athumna marāna.

²²Kha athumna iwui tui khuisāsi kaje, athumna iwui mibingli iwui tui vaomalānhairara, kala athumna athumwui makaphā apongwui eina, kala athumwui makaphā otsakwui einala ngareiunghairara.

²³“Vare I, himāngli leimala, apam khangatateili makhaleia Varela? da PROHOna hānga.

²⁴Makathei apamli mi akhana ngathumhaowa da ina matheirarmarala? da PROHOna hānga. Okathuilila kazingramlila ina kachipem maningmala? da PROHOna hānga.

²⁵Marānbingna iming singlaga kapikta, ili mangli mahāmihaira, ili mangli mahāmihaira! da khamatui ina shāhaira.

²⁶Athum khalattawui wuklungli mikhanam khamarān kala kakapik khamarāna marānbingna karankha kapikpamrakhala?

²⁷Avāva̱ ngarāna Baalli khokharumwui vang iming malai kahai thāda, iwui mibinglila athumwui mang hangkhangarok eina ili malai ngasakshapra da athumna phaninga.

²⁸Mang kashimana marān china mang chi hāngranu, kha iwui tui kashāpa china iwui tui peichaoda hāngmiranu. Mā eina lanji ngaraikachā khi leikhala? da PROHOna hānga.

²⁹Iwui tui mei mathāmala? Kala ngalung shaokhai khavai rishaolung mathāmala? da PROHOna hānga.

³⁰Chiwui vang eina, yanglu, iwui tuina da athum eina athum leekhui khangaroka, marānbing chili ina mamayāmana da PROHOna hānga.

³¹Yanglu, athumwui male eina, PROHOna kahāngna da kahāng marānbing chili ina mamayāmana da PROHOna hānga.

³²Yanglu, kakapika mang khamarānbingli ina mamayāmana da PROHOna hānga, ina kasoda makachiho athumna iwui mibingli athumwui kakapik-kakhayāng eina thankhanguia athumli ina mamayālakmara” da PROHOna hānga.

³³“Kachikathā mi akhana nilala, marān nilala, pāngmon nilala, ‘PROHOwui kharit otphun chi khikhala?’ da ngahānakha, nana athumli ‘Otphun chi nana, kala ina nali katathaora da PROHOna hānga’ jilu.

³⁴Kala marān nilala, pāngmon nilala, maningkha kachikathā mi akhana ‘PROHOwui kharitphun,’ jiakha chipāli kala awui shimkhurlila ina tandi mira.

³⁵Chithāda sāda, mi kachiva̱na khongnaili kala achināli ngahān ngaroklu kaja, ‘PROHOna khi ngahānkākhala?’ lah ‘PROHOna khi matuihairakhala?’ da nana hāngra.

³⁶Kha ‘PROHOwui kharitphun’ kaji hi nana mahangluimara, kaja kharit otphun hi mi khalattawui tuina, kala nana kharinga Vare saikorawui PROHO, ithumwui Varewui tui mashongachei ngasakhaowa.

³⁷Chithāda sāda nana pāngmonli hāngra, ‘PROHOna nali khi ngahānkākhala?’ lah ‘PROHOna khi hānghairakhala?’ da hānglu.

³⁸Kha nana kalikhada, ‘PROHOwui kharit otphun’ da hāngakha, PROHOna hithāda hānga, ‘Khikhalajila, PROHOwui kharit otphun, kaji tui hi nana hāngkahai wui vang, ina nali kachiho chitharan, “PROHOwui kharita otphun” kaji hi mahangpaimara chihaokada,’

³⁹chiwui vang eina yanglu, nathumli, navā ngarāli ina mikahai keinung hiwui eina kachangkhatta ina nathumli khāngkhuilaga iwui ngalemwui eina katāva̱li horhaora.

⁴⁰Kala ina nathumwuitungli mamalailaki kaji katang makhavai makhamayā kala katang makhavai maikashi chi khuirāra.”