Read Tangkhul Naga JEREMIAH 24 Bible Online

JEREMIAH 24 - Tangkhul Naga bible

JEREMIAH 24

¹ Jehoiakimwui naomayara, Judahwui awunga Jehoiachinli ngasoda Judahwui wungnaobing, pāngthem kathembing, mari kasābingli Babylonwui awunga Nebuchadnezzarna Babylonli tukvā kahaiwui thili PROHOna awui khamahā ili rāchithei: Yanglu, PROHOwui shimli khaorāthei luk khani haikasā thei.

²Luk akhali kazang khaorāthei chiya khamathāmānga, minkhare khaorathei thai, kha akhapali kazanga chiya zakkashi mashaikapaimānga.

³Kala PROHOna ili hānga: “Jeremiah, nana khi theikhala?” Ina ngahānkai, “Khaorāthei thei; khamathā khaorathei chiya mathālaka, kala makhamathā khaorathei chiya zakshishuna, zakshināhaida chibing chiya mashaipaimana.”

⁴Chiwui thili PROHOwui tui china ili rāhānga:

⁵“Israelwui Proho VAREna hithāda hānga: Judahwui eina raitha kahaibing, Chaldea ngaleili chihovā kahaibing chi khaorāthei khamathābing katha thāda ina shānkhuira.

⁶Athumwui phākhavai imikna yangmida lam hili ina khuiungluishitra. Athumli ina semkāra kala masākhaitāmara; athumli ina lingsangra, kala maphurshokmara.

⁷I PROHOna da theikhui khavai athumli ning sangmira, kala athumna iwui mibing ngasāra kala ina athumwui Vare sāra kaja athumna ningtongda ili hanungra.

⁸“Kha PROHOna hithāda hānga: Judahwui awunga Zedekiah, awui wungnaobing, Jerusalemli shākhaida ngalei hili kapambing kala Egypt ngaleili kapambing chili, zakkashiya khaorāthei zakshināhaida mashaikapai thāda ina khuira.

⁹Athumli ina kashamkhavāpam kachida, okathuiwui wungram saikorali, ngachee-ngacha khavai, yangkharing khavai, tantakli ngazek khavai, mana̱shi khavai kala khonshi khavai sāngasakra.

¹⁰Kala ina athumli kala avāva̱ ngarāli mikahai ngalei hiwui eina shimānchao majiranglakha eina tangda, raighai, chāmrei, kazātkashi chihorāra.”