Read Tangkhul Naga JEREMIAH 25 Bible Online

JEREMIAH 25 - Tangkhul Naga bible

JEREMIAH 25

¹ Josiahwui naomayara, Judahwui awunga Jehoiakimna mungda khamate kum, Judahwui mi saikorawui pongli Jeremiahli rakahāng tuina (hi Babylon awunga Nebuchadnezzarna mungkhare kumna).

²Tui hi Judahwui mi saikora kala Jerusalemli khalei saikorali marān Jeremiahna hānga:

³“Kum maga̱da kathumwui vang Amonwui naomayara Judahwui awunga Josiahna mungda tharāda kakathum kum eina thuilaga aja rāshungda PROHOwui tui kahahāng chi ina nathumli hāngchinga, kha nathumna manganāsangmana.

⁴PROHOna awui rao marānbing kachungkha chihorāchinglala nathumna manganāsangmana, kala manāshungmana.

⁵Athumna hānga, nathum kachichāwui makhayā apongwui eina kala khangui otsakwui eina latunglu, kala nathumli kala navā ngarāli khare eina katang mavaila mikahai ngalei chili ungpamlu;

⁶khangatei varebingli otram ngatha̱ khavai kala khorum khavai mashuralu, kala nathumwui pāngthem einala I malungvāt khavai masālu. Chithakha ina sākashi masāmara.

⁷Chitha-ilala nathumna ili manganāsangmana, da PROHOna hānga, chithāda nathumwui pāngthemna ili malungvāt ngasakta nathum khalatta kalāshāt phākhui.”

⁸“Chiwui vang saikorawui PROHOna hithāda hānga: Khikhalajila nathumna iwui kahāng makhanganāwui vang,

⁹yanglu, ‘Ina ngalei kala hili kapamabing, kala hili kuimareida khalei yurbing hili makhamayāwui vang atungshongwui yur saikora, kala Babylonwui awunga iwui rao Nebuchadrezzarli ina chihorālaga athumli zakshilāk eina shimān ngasakra, khangachee-khangachā, kasiror khavai, kala katang makhavai maikashi ngasā ngasakra.

¹⁰ Chili lāngda, athumwui eina ringkaphā khamathānkhon, shakazā mayara eina ngalāva̱wui akhon, mā kashireiwui kakhaningkhon, kahora thaomei katāva̱li khuithuihaora.

¹¹Ngalei katonga sakazamserhaora, khikha masāvailuimara; kala yurbing hina Babylonwui awungali kum hangshini otram ngatha̱ra.

¹²Kum hangshini kāpei kahaiwui thili, Babylonwui awungali kala yur chili, Chaldea ngaleili athumwui moreiwui vang tandi mida athumwui ngalei shimānchang ngasakra da PROHOna hānga.

¹³Jeremiahna yur saikorawuitungli marān kahai, ina hāngkahai tui saikora, kala lairik hili kapisang kahai kachiva chi ina ngalei chiwuitungli khuirāra.

¹⁴Kaja miyur kachungkhana kala kahaka awungabingna athumli raonao sāngasakra; kaja athumwui otsak kala pāngot athishurda ina sāman mira.’”

¹⁵ Chithāda Israelwui PROHO Varena ili hithāda hānga: “Iwui malungkhavātwui tengkot hi khuilu, kala ina nali kashivāt miyur saikorali hi shimanlu.

¹⁶Athumna chi mangda athumwui alungli chihorāki kaji raighai china athum yuichachanghaida pāhaora.”

¹⁷Chithāda ina tengkot chi PROHOwui pāng eina khuiya, kala ana ili kashivāt yur saikorali mang ngasaka:

¹⁸Jerusalem eina Judahwui keinung saikorali, chiwui awungabing eina wungnaobingli, aja thāda ngachakyāng kala horyāng kahai, khonkashi ngasākhavai;

¹⁹Egyptwui awunga Pharaoh, awui raobing, awui wungnaobing, kala awui mi saikora,

²⁰kala aramli rākapama kha̱mi katonga; kala Uz ngalei saikorawui awungabing eina Philistine ngalei saikorawui awungabing (Ashkelon, Gaza, Ekron kala Ashdodwui shākkahaibing);

²¹Edom, Moab kala Ammonwui naomayarabing;

²²Tyrewui awungabing, Sidonwui awungabing kala shamadru makānda ngayipheiwui awungabing;

²³Dedan, Tema, Buz, kala athumwui sam kachichāpabing;

²⁴Arabiawui awungabing eina yur kachungkha manātromda siwukli khalei yurbingwui awunga saikora;

²⁵Zimriwui awunga saikora, Elamwui awunga saikora, kala Mediawui awunga saikora;

²⁶katālila khanailila khalei atungshongwui awunga saikora, akhawui thili khangatei akha, kala apuk-apagali khalei wungram saikora, kala athumwui thili Babylonwui awungana mangra.

²⁷“Chieina nana athumli hāngra, ‘Israelwui Vare, saikorawui PROHOna hithāda hānga: Manglu, mariplaga malolu; pitālaga mangakarthuiluilu; ina chihorāki kaji raighai chiwui vangna.’

²⁸Athumna tengkot chi nawui pāng eina mamangmara jiakha, nana athumli hithāda hānglu, ‘Saikorawui PROHOna hānga: Mangphalungra!

²⁹Kaja yanglu, iwui ming eina phok kahaiya keinung hili ina makaphā ot sāphokhaira, laga nathum tandi maphungla kathāda yāmshokpairakhala? Kaja okthuili okthuida khalei saikorali ngasung khavai raighai akha ina kasohaira, da saikorawui PROHOna hānga.’

³⁰“Chiwui vang, tui saikora hi athumli nana marānlu, kala athumli hithāda hānglu: ‘PROHOna atungshong eina khangangtāra, kala awui katharapam eina matuira; awui mili ana mamayāmada khangangra, kala drakhāra̱ kasurbingna khavao thāda, okathuili okathuiya saikorali makhamayāwui vang vāoshokra.

³¹Okathui akatang vāshungda khavaokhon chi shāvāra; kaja, PROHOna yurbingli makhamayā kaphen lei, kala ana phasā khavaia saikorali bichar sākhavai sāda lei, kala makhayā saikorali ana raighai eina shaothatra,’” da PROHOna hānga.

³²Saikorawui PROHOna hithāda hānga: Yanglu, makaphā ot china miyur akhawui eina akhali zatta lei, kala okathui akatangwui eina hakkhamahā siphan zingrot ngatha̱phokhaira!

³³Kala chithang PROHOna shaokathat chi okathui ungshung vāshungra. Athumli machapngachāsangmara, makazipkhuimara, machifamara, leimaili paih thāda khorhaora.

³⁴Chapngachālu, nathum yaokahomabing, kala vaolu, hotlātungli ngaleolu, yaoshangwui akhavābing, kaja nathumli shaokathat kala chaiyāng kahai atam rāhaira; mathāmeikap kaje yaovā pikatā thāda pitāra.

³⁵Yaokahombing ngathum khavai maleisāmara; yao akhavābingwui vangla yāmshok khavai masamphangmara.

³⁶Nganālu, yaokahombingwui khavao, yao akhavābingwui chapkhangachā chi nganālu! Kaja athumwui seihomphung PROHOna sākathānmiserhaira,

³⁷kala chingri kahai yaobing sashimānmi haira, PROHOwui sākashi malungkhavātwui vang.

³⁸Kazingkha̱ thāda awui akhur chihoda shokhaira, kaja athumli rekakharekawui raighai kala awui sāshilak kahai malungkhavāt chiwui vang athumwui ngalei arema sāhaira.