Read Tangkhul Naga JEREMIAH 26 Bible Online

JEREMIAH 26 - Tangkhul Naga bible

JEREMIAH 26

¹ Josiahwui naomayara, Judah awunga Jehoiakimna mungkhare kum, PROHOwui eina tui hi rāhāngna,

²“PROHOna hithāda hānga: PROHOwui shim kayāngli nganingda Judahwui keinungbing eina PROHOwui shimli khorumkida kharā athum saikorali, ina nali kasoda kahahāng saikora hi hāngmiserlu, tui akha nida mathumhaipaimara.

³Athumna tui hi khuisangda makaphā kasāwui eina ning ngateilapai, chieina athumna makaphā kasā chiwui vang ina makaphā sākida khangarān kasā chi yangmihaora.”

⁴Nana athumli hānglu, PROHOna hithāda hānga: “Nathumli mikahai iwui ain chi mashurmara jiakha

⁵kala thaklāk eina iwui rao marān chihokharā hiwui tui makhuimara jiakha, nathumna makhuipapamana,

⁶ chieina shimkhur hi Shilohli kasā thāda sāmira, kala okathuili khalei saikorawui mangāli keinung hi khonkashi sāngasakra.”

⁷PROHOwui shimli Jeremiahna kahāng tuibing hi pāngmonbing kala marānbing kala mi saikorana shāsera.

⁸Kala mibingli hānglu da PROHOna Jeremiahli kakaso saikora hāngkahai tharan pāngmonbing, marānbing kala mi saikorana ali tukkhuida hānga, “Na thira!

⁹Khisāda, ‘Shimkhur hi Shilohli kasā thāda sāmira, keinung hili mi mapamla ngachakyāng ngasakhaora’ da PROHOwui ming singda nana khamarānkhala?” Kala PROHOwui shimli mi saikora kazipta Jeremiahli kuinamhaowa.

¹⁰Judahwui wungnaobingna hi kashā eina, awungawui shim eina PROHOwui shimli vai, kala PROHOwui shimli zangkhavai kadhara Ngaveiwui pamkhavaili apama.

¹¹Chieina pāngmonbing kala marānbingna wungnaobing kala mi saikorali hānga, “Mi hina kathi tuitak samphangngayi, khikhalajila keinung hili makhamayā khamarān nathumwui khanā einala shāser kahaina.”

¹²Chieina Jeremiahna wungnaobing kala mi saikorali hānga, “Shimkhur hili kala keinung hiwuitungli nathumna shākahai tuibing chi marānmi khavai PROHOna ili kachihona.

¹³Chiwui vang eina ara nathumwui apong kala otsakbing mashungkhuilu, kala nathum Vare PROHOwui kahāng nganālu, chithākha PROHOna nathumwuitungli makhamayā kalākashi ana matuishok kahai chi ngachei ngasakra.

¹⁴Kha iwui vang, yanglu, I nathumwui pāngli khaleina. Nathumna kaphā kala khamashung chi sālu.

¹⁵Kha hi theishingkhuilu, kaja, ili nathumna shaothatakha, khayon makhalei ashee chi nathum khalattawuitungli, keinung hiwuitungli, kala hili kapambingwuitungli tāra, kaja khamashung eina nathumwui khanāli hāngkahai tui saikora hi hāngmi khavai ili PROHOna kachihona.”

¹⁶Chiwui thili wungnaobing kala mi saikora china pāngmonbing kala marānbingli hānga, “Mi hi kathi danti masamphang ngayimana, kaja ana ithumli ithumwui Vare PROHOwui ming singda hāngkhamina.”

¹⁷Athumwui ngachaili ram chiwui kachikathā khararnao kāikhana nganingkāda yarui kazip chili hāngsanga,

¹⁸ “Moreshethwui Micahna Judahwui awunga Hezekiahwui atamli Judah mi saikorali marānmi: ‘Saikorawui PROHOna hānga, Zionli seiot kakhui thāda khuira, Jerusalem ngayānghaida khorkazam kahai ngasāra, Khorumshim sāhaida khalei phungrei hi ngahong ngasāhaora.’

¹⁹Judahwui awunga Hezekiahna kala Judahwui mi saikorana ali shaothathaola? Ana PROHOli ngacheeda PROHOwui lukhamashan mapomala? Kala PROHOna athumli makhamayā kalākashi chi mangacheimihaomala? Kha ithumna khalatta kahaka kalākashi khuirāki jihaira.”

²⁰PROHOwui ming singda marānkhame mi akhala leisai; Kiriath-jearimli khalei Shemaiahwui naomayara Uriahna. Jeremiahwui tui thāda anala keinung hiwuitungli makhamayā marānmihaidalei.

²¹Chieina awunga Jehoiakimna, kala awui raimibing eina wungnao saikorana shālaga awungana shaothat khavai phai. Kha Uriahna kashā chitharan ngacheehaoda Egyptli yāmvāhaowa.

²²Chieina awunga Jehoiakimna, Achborwui naomayara, Elnathanli ngasoda mi khani kathum Egyptli chihovai,

²³kala athumna Uriahli Egyptwui eina atukkhuilaga khuiungda Awunga Jehoiakimna raighai eina yorthathaowa kala awui asa yaruiwui chikhurpamli chifahaowa.

²⁴Kha Jeremiahli, Shaphanwui naomayara Ahikamna nganingmihaida shaothat khavai yaruiwui pāngli masangmithuwa.