Read Tangkhul Naga JEREMIAH 27 Bible Online

JEREMIAH 27 - Tangkhul Naga bible

JEREMIAH 27

¹ Josiahwui naomayara, Judahwui awunga Zedekiahna mungkaphokwui atamli Jeremiahli PROHOwui tui rāhānga:

²PROHOna ili hithāda hānga: lāngkon akha kala ra̱phek akha da nakhalatta sākhuilaga akahungli ngachālu.

³Kala Jerusalemli Judah awunga Zedekiahli rāsamkaphang wungnaobingwui paophungmebingwui pāngli sangmida Edomwui awunga, Moabwui awunga, Ammonwui naomayarabingwui awunga, Tyrewui awunga kala Sidonwui awunga, athumli pao chiholu.

⁴Athumwui akhavābingwui vang kakaso hi unghāngranu: Israelwui Vare, saikorawui PROHOna hānga: Nathumna nathumwui akhavābingli hi hāngki kajina:

⁵“Okathuili khalei mila, sāyurla, iwui pangshap eina kala ipāng eina sākakhuina, kala hina mashunga kajiwui athishurda ina mikhangai chili mi.

⁶Ara ngalei saikora hi iwui rao Babylonwui awunga Nebuchadrezzarli mihaira, kala ramsāla ali otram ngatha̱mi khavai ina mihaira.

⁷Miyur saikorana ali, anaomayarali, ara̱li, awui ngaleiwui atam maungranglakha eina tangda otram ngatha̱mira; chiwui thili miyur kachungkhana kala kahaka awungabingna ali athumwui raonao sāngasakra.

⁸“Kachikathā yurna maningkha wungramna Babylonwui awunga Nebuchadnezzarli otram mangatha̱akha, kala Babylon awungawui kharitphunwui azingli akahung mahaisaakha, chikathā yur chili raighai eina, chāmrei eina, kala kazātkashi eina awui pāng eina ina mashimān ngasakranglakha eina tangda ina tandi mira da PROHOna hānga.

⁹Chiwui vang eina, nathumwui marānbing, khanongbing, mang hangkhamebing, khara̱katheibing, kala laivā kathembingna nathumli ‘Babylon awungali otram mangatha̱lu,’ da kahāngbingli makhuisanglaklu.

¹⁰Kaja nathumli athumna marānda khalei hi kakapikna, hiwui athei nathumli katāva̱li khuithuihaora, kala ina nathumli kashamshokra, kala nathum chili shimānhaora.

¹¹Kha kachikathā yurna Babylon awungawui kharitphun azingli akahung haida kala ali otram ngatha̱akha, ina chibingli kachichāramli lui vazāda okthui ngasakra, da PROHOna hānga.”

¹²Judahwui awunga Zedekiahli ina hithāda hānga: “Babylon awungawui kharitphun azingli nakahung hailu, ali kala awui mibingli otram ngatha̱laga okthuilu.

¹³Babylon awungali otram makhangatha̱ miyurwui pongli PROHOna hāngkahai thāda chāmrei eina, kazātkashi eina, kala raighai eina na kala nawui mibing khisāda thingasakrakhala?

¹⁴‘Babylon awungali nana otram mangatha̱paimara’ da marānbingna kahāng tui manganāsangalu. Kaja athumna nali marānmida khalei chi kakapik tuina.

¹⁵Athumli ina kachiho maningmana da PROHOna hānga, kha athumna iming singda marānphāphā kajina, chiwui vang nathumli kashamhaida, nathum kala nathumli marānmida khalei marānbingla shimānra.”

¹⁶Chiwui thili pāngmonbingli kala mi saikorali ina hānga, “PROHOna hithāda hānga: Nathumli marānmida khalei nathumwui marānbingli manganāsanglu, ‘Yanglu, PROHOwui shimli kahai khorkhongbing chi ara Babylonwui eina thākta khuiunghaora’ da hānga. Kaja nathumli khamarān chi kapiklaga khamarānna.

¹⁷Athumli manganālu; Babylonwui awungali otram ngatha̱laga okthuilu. Khiwui vang keinung hi ngachakyāng ngasakrakhala?

¹⁸Athum marānbingakha, kala athumli PROHOwui tuina ngasomiakha, PROHOwui shimli haikahai, Judah awungawui shimli haikahai kala Jerusalemli haikahai khorkhong chi Babylonli makhuivā khavai, athumna saikorawui PROHOli pomiranu.”

¹⁹Kaja saikorawui PROHOna pakra̱bing, pithrai khongsai, khaning khavai, kala keinungli taihaida khalei khorkhongbingwui apongli hithāda hānga,

²⁰Jehoiakimwui naomayara, awunga Jeconiahli ngasoda Judah eina Jerusalemwui khangamabingli Babylonwui awunga Nebuchadnezzarna Jerusalemwui eina raithā kahai tharan, makhuithuikhanar otbing chiwui pongli—

²¹“PROHOwui shimli, Judah awungawui shimli, kala Jerusalemli taimi kahai khorkhongwui pongli, Israelwui Vare, saikorawui PROHOna hithāda hānga:

²²Chibing chi Babylonli khuivāhaora, kala ina mayangmiranglakha eina tangda chili haisāra da PROHOna hānga. Chiwui thili ina khuiungluishitta apam hili haimira.”