Read Tangkhul Naga JEREMIAH 28 Bible Online

JEREMIAH 28 - Tangkhul Naga bible

JEREMIAH 28

¹ Chikum, Judahwui awunga Zedekiahna mungkhare, khamate kumwui kachāng kaphangāli Azzurwui naomayara, Gibeonwui marān Hananiahna, Khorumshimli leilakha, pāngmonbingwui kala mi saikorawui mangāli ili hithāda hānga,

²“Israelwui Vare, saikorawui PROHOna hithāda hānga: Babylon awungawui kharitphun ina sātekmihaira.

³PROHOwui shimli leikasā khorkhong saikora, Nebuchadnezzarna Babylonli khuivā kahai chi, kum khaniwui alungli apam hili ina khuiungmiluishitra.

⁴Jehoiakimwui naomayara, Judahwui awunga Jeconiahli ngasoda Judahwui eina Babylonli tukvā kahai saikorala apam hili khuiungmiluira, kaja Babylon awungawui kharitphun ina sātekmi haora da PROHOna hānga.”

⁵Chieina PROHOwui shimli nganingkasa pāngmonbing kala mi saikorawui mangāli marān Jeremiahna marān Hananiahli ngazeka;

⁶kala marān Jeremiahna hānga “Amen! PROHOna mayāmiranu; nana marānmikahai tui chi PROHOna ungshung ngasakranu, kala Babylonwui eina khorkhong kala ngaponvākahai saikora chi PROHOwui shim hili khuiungmiluishit ranu.

⁷Kha Ina nawui kala mi saikorawui mangāli kahāng tuihi khanganā milu.

⁸Achālakhawui atamli iniwui mangāli, marānbingna, ngalei kachungkhali kala kahahak wungrambingli, rai kasā, chāmrei, kala kazātkashi marānmi.

⁹Chingrikahai marānkhami marānle, marānpā chiwui tui ungkashung chitharan, PROHOna marān chili kachiholaka da theikhuira.”

¹⁰Chieina Hananiah marānna Jeremiah marānwui akahungwui eina lengkot chi khuilaga sātekmihaowa.

¹¹Kala mi saikorawui mangāli Hananiahna hānga, “PROHOna hithāda hānga: Babylon awunga Nebuchadnezzarna narkahai miyur saikorawui eina kharit otphun chi ina hithāda, kum khaniwui alungli sākhaimihaora.” Kha marān Jeremiahna awui apongshong thuihaowa.

¹²Marān Jeremiahwui lengkot marān Hananiahna sātekmi kahaiwui thili, Jeremiahli PROHOwui tui china rāhānga:

¹³“Vālu, Hananiahli hānglu, ‘PROHOna hithāda hānga: nana thingwui lengkot sātekmihaira, kha ina chiwui mahutli mariwui lengkot ngachāmira.

¹⁴Kaja Israelwui Vare, saikorawui PROHOna hithāda hānga: Babylon awunga Nebuchadnezzarli otram ngatha̱mi khavai miyur saikora hili ina mariwui lengkot ngachāmi kahaina, kaja, ramli khalei ramsā eina tangda awui pāngli horsangmi kahaina.’”

¹⁵Chieina marān Jeremiahna marān Hananiahli hānga, “Nganālu, Hananiah, nali PROHOna machihomana; kala nana mibing hili kakapikli shitsang ngasakhaowa.

¹⁶Chiwui vang eina PROHOna hithāda hānga: ‘Yanglu, ina nali okathuiwui eina khuithuihaora. Ajakum na thihaora, khikhalajila nana PROHOli ngakaikashi tui matuihaowa.’”

¹⁷Chikum, kachāng kashineli marān Hananiah thihaowa.