Read Tangkhul Naga JEREMIAH 29 Bible Online

JEREMIAH 29 - Tangkhul Naga bible

JEREMIAH 29

¹ Jerusalemwui eina Babylonli Nebuchadnezzarna tukvā kahai raithā kahaia ararbing pāngmonbing, marānbing, kala yarui katongali marān Jeremiahna kachiphun chithi chiwui tui chi hithai.

²Hi, awunga Jeconiah, ava̱va̱ awungva̱, ahongabing, Judah eina Jerusalemwui wungnaobing, pāngthem kathemabing, mari kasābing Jerusalemwui eina thuikahaiwui thilina.

³Chithi chi, Shaphanwui nao Elasah eina Hilkiahwui nao Gemariahwui pāngli Judahwui awunga Zedekiahna Babylonwui awunga Nebuchadnezzarli amikhavai kachiphunna. Kala hithāda kapi:

⁴“Jerusalemwui eina Babylonli Ina raithā ngasakkahaiya mi saikorali, Israelwui Vare, saikorawui PROHOna hānga:

⁵Chili shim sāpamserlu; yāmgui sāsangda chiwui kashok chi shailu.

⁶Ngalāla khuilu, naola pharākhuilu; naomayarali ngalā khuimilu, kala fakathuila fathui ngasakta naomayara kachungkha mataisangranu, masuitāaranu.

⁷Kha nathumli ina raithā ngasak kahai keinung chiwui reisang khavai sālu, chiwui mathun eina seihāla sāmilu; kaja chiwui ringkaphā alungli nathumla ringkaphā samphangra.

⁸Kaja Israelwui Vare, saikorawui PROHOna hithāda hānga: Nathumwui marānbing kala phongkhamibingna nathumli maminam ngasakalu, athumwui mangtui makhuisangalu,

⁹kaja, iwui ming singlaga athumna khamarān chi kakapikna; athumli ina kachiho maningmana da PROHOna hānga.”

¹⁰ “Kaja PROHOna hithāda hānga: ‘Babylonli apamda kum hangshini kāshung kahai tharan, ina iwui tuingashit sākahai chi ungshung ngasakra kala apam hili khuiungmiluira.

¹¹Kaja nathumwui vang ina ngarān kahai chi ina thei, da PROHOna hānga, zakkashi sākhavai maningmana, kha ringkaphāwui vāngna, naodawui mirin kala kachihān chi nathumli mikhavaina.

¹²Chitharan nathumna ili ngakaora kala ili seihā sāra, kala ina khuisangmira.

¹³Nathumna ningtonglak eina kaphā chitharan, ili samphangra,

¹⁴samphangda nathumwui shimlui hanmiluira, kala ina kashamvā kahai apam saikorawui eina, kala yur saikorawui eina nathumli ina kazipkhuida apam hili khuiungmiluishitra’ da PROHOna hānga.”

¹⁵“Khikhalajila nathumna, ‘Ithumwui vang PROHOna Babylonli marānbing shokngasakhaira’ da hānghaira.

¹⁶Davidwui wungpamkhongli kapama awungawui pongli, kala keinungli somkapam saikorawui pongli kala raithā kahaili makazanga nachinā ngarāwui pongli PROHOna hithāda hānga:

¹⁷‘Saikorawui PROHOna hithāda hānga, Yanglu, ina athumli raighai, chāmrei, kala kazātkashi chihorāra, athum saikora, khaorāthei shuihaida mashaikapai thāngasakserhaora.

¹⁸Ina raighai, chāmrei, kazātkashi eina kharom ngasakra, kala okathuiwui wungram saikorali kasham khavāvā papamli athum hi ngacheekapaia, khonkashi, ngashimkashi kala ningkakachaiya ngasā ngasakra,

¹⁹khikhalajila athumna iwui tui manganāsangmana, da PROHOna hānga, ina nathumli iwui marānbingli chihorāchinga kha nathumna manganāsangmana, da PROHOna hānga.

²⁰PROHOwui tui nganālu, Jerusalemwui eina Babylonli ina raikathāli chihovā kahaia nathum.’”

²¹“Israelwui Vare, saikorawui PROHOna hithāda hānga, Kolaiahwui naomayara Ahab eina Ma-aseiahwui naomayara Zedekiahwui pongli kahāngna, anina iwui ming singda kakapik tui marānmi: Yanglu, anili ina Babylonwui awunga Nebuchadnezzarwui pāngli horsangmida nathumwui miktāli shaothatra.

²²Aniwui vang eina Judah eina Babylonli raithā kahai saikorana kalākashi kharā tharan, anili chānjam sāda, ‘Zedekiah eina Ahabli Babylon awungana meifali horkasang thāda samiranu’ da hāngra,

²³kaja anina Israelwui alungli mangkhama̱ otsak sāhaira; anina khongnainaowui preiva̱̱ ngarāli ngashāma; kala ina makakasola iwui ming singlaga anina kakapik tui matui. Katheiya chi ina, kala shākhi chi ina da PROHOna hānga.”

²⁴Nehelamwui Shemaiahli nana hithāda hāngra:

²⁵Israelwui Vare, saikorawui PROHOna hithāda hānga: Jerusalemli kapambingli, pāngmon Ma-aseiahwui naomayara Zephaniahli, kala pāngmonbingli nana nawui ming eina chithi hithāda kapihaira,

²⁶“Jehoiada pāngmonwui mahut PROHOna nali pāngmon sanghaira, kala PROHOwui shimli khalei kapā marānbingli zurthing sangda narhai khavai kasohaira, da hānga.

²⁷Laga Anathotwui Jeremiahna nawuitungli marānkhami chili khisāda ali mahāngmachinmakhala?

²⁸Kaja ana, nathumwui raithā kahai kasāngkhara, shimla sāpamlu, yāmgui sāsangda chiwui kashok chi shailu da Babylonli kapama ithumli pao chiphuntai.”

²⁹Zephaniah pāngmonna Jeremiahwui miktāli chithi chi pāchithei.

³⁰Chitharan PROHOwui tui china Jeremiahli rāhānga:

³¹“Tukthui kahai saikorali chiphunvāda hānglu, Nehelamwui Shemaiahwui pongli PROHOna hithāda hānga: Khikhalajila ina makachiholala Shemaiahna nathumli kakapikli shitsangkhavai kasāwui vang,

³²PROHOna hithāda hānga: Nehelamwui Shemaiahli kala awui ara̱-azābingli ina tandi mira; iwui mibingli kapha sāmiki kaji chi awui mi akhanala kathei masamphangmara, da PROHOna hānga; kaja ana PROHOli ngakaikashi tui matuiya.”