Read Tangkhul Naga JEREMIAH 3 Bible Online

JEREMIAH 3 - Tangkhul Naga bible

JEREMIAH 3

¹“Mi akhana apreiva̱li pānghaida awui eina thuihailaga mi khangatei akhali aleihaiakha khare gaharana preiva̱ chili khuiluirala? Chikathā ram chi hakmahālak eina mamakhaomarala? Nana khayorva̱wui ot sāda kachungkhali ngasohaira; laga nana ili ungluipairala? da PROHOna hānga.

²Namik khangangaili kapeivāserlu, kala yanglu, nana mapimirang kaji kali leikhala? Lamhāngli Arabnao kapam thāda, shongfaphapheili nana mayarnaoli ngaraipama. Nawui makaphā shām kasāna ngalei hi sāmakhao ngasakhaira.

³Chiwui vang zingrot ngasām ngasakhaira, kala mayo kachāng zingrotla marothura; nava khayorva̱wui azakla thahaoda kakhayakla marāpeithumana.

⁴Nana aruicham, ‘Ishāvā, na I nganuilakhawui khavāknaona—

⁵ana malungvātchingrala?’ ana katang eina tangda mapenmarala? da nana mangakaomala? Yanglu, nana hānghaira, kha nana makaphā ot nawui sākhangai eina tangda sai.”

⁶ Awunga Josiahwui atamli PROHOna ili hānga: “Shitkasang makhaleiva̱, Israel, ana kajuiya phungrā kachiva̱wuitungli kālaga khamateka thingphei khaya̱li khayor otsak kasā chi na matheihaira?

⁷Ina phaningsai, ‘Ana saikora hi sākahaiwui thili ana ili latungra’ kha malatungmana, kala makhamashungva̱ achināva̱ Judahna thei.

⁸Shitkasang makhaleiva̱, Israelwui phokaphā saikorawui vang ina kapāngwui lairik kapimida chiho kahai chi makhamashungva̱ achināva̱ Judahna thatheilaga mangacheela ala vālaga khayorva̱wui ot sāzata.

⁹Khikhalajila khayorwui otsak hi awui vang kapai ot sāthuihaoda, thing ngalungli ngashāmzatta ngalei hi ana sāmakhao kahaina.

¹⁰Saikora hi thatheilaga makhamashungva̱ achināva̱ Judahna ili ningtongda malatungmana, kha sākhaninga, da PROHOna hānga.”

¹¹Kala PROHOna ili hānga, shitkasang makhaleiva̱ Israel khalattana makhamashungva̱ Judahli khayon suitāmei da chitheihaira.

¹²Vālu, atungshong shangda tui hi vaomalānmilu, kala hānglu, shitkasang makhaleiva̱ Israel, latunglu, da PROHOna hānga. Ina nali malungvātta mayangmara, kaja I lumashantheilaka, da PROHOna hānga; I malung mavātchingmara.

¹³Na nawui Vare PROHOli ngakaishihaira, nawui ningkachāng khamateka thingphei kachida kha̱mibingli chaizathaira, kala na iwui akhon manganāthuwa, kaji himang mayālu, da PROHOna hānga.

¹⁴Latunglu, O shitkasang makhalei nao ngarābing, da PROHOna hānga; kaja I nathumwui akhavāna; keinung akhawui eina akha, shimkhur akhawui eina khani khuida nathumli ina Zionli khuiungmira.

¹⁵“‘Kala iwui kaphaningli ngaraikachā yaokahomabing ina mira, athumna nathumli theithangkhamei kala theikhuikathei eina ngasoda phauira,

¹⁶Ngalei chili nathumna chungsangda mataisang kahai tharan, “PROHOwui tuingashit oko” da mahāngluimara da PROHOna hānga. Chi ningli marāza̱luimara, kaphaningla maphaningungluimara; kasāla masāvailuimara.

¹⁷Chiwui atamli, Jerusalem hi PROHOwui wungpamkhong hohaora, kala Jerusalemli PROHOwui mangāli mi saikorana akazipra, kala athumna ngakaishitingtingda khalattawui makaphā ning mashurluimara.

¹⁸Chitharan Judahna Israelli ungngashikluira kala ani ngarumda atunshongwui ngalei eina, ina navāngarāli shimluikat sāda mikahai ngalei chili apamra.

¹⁹“‘Inaomayarabingwui alungli nali kathāda khamathā lam akha milaga chipamsikhala kala, miyur saikorawuili mathāmeikap kaji shimlui nali kathāda haimirakhala da ina machuka. Kala nathumna ili iwui Ava hora; kala ili kashurwui eina mangareithuimara da phaningsai.

²⁰Kachangkhatta, shitkasang makhaleiva̱ preiva̱na gaharali horkahai thāda, nanala ili shitkasang maleimana, O Israelwui shimkhur, da PROHOna hānga.’”

²¹Kaphung khangaili akhon akha shai, Israelwui mibingwui khavao kala kachapkhon; khikhalajila athumna khangui pongli zathaida, athumwui Vare PROHOli malaihaowa.

²²“Latunglu, shitkasang makhalei naomayara ngarā, nathumwui mashitkasang chi ina raimira.” “Yanglu, ithumna nali rāli, kaja na ithumwui PROHO Varena.

²³Kachangkhatta kaphungtungli ithumna meoma̱li khorumkazat china ithumli mangachonmana. Kachangkhatta Israelwui huikhami hiya ithumwui PROHO Varemangli lei.

²⁴“Kha ithumna mayarngalālakhawui eina thuida khayā khamalā otna ishāvā ngarāna mathuisang kahai, ngarānsang kahai athumwui yaola, seila, naomayara, naongalāva̱ ngarāla saikora kānmihaira.

²⁵Ithumwui maikashili ngayaisangsa, kala ithumwui khayā khamalāna ithumli farorranu; kaja ithumwui PROHO Vareli ithumna morei sāhaira, ithum kala ishāvā ngarāna aja rāshungda ithumna ithumwui PROHO Varewui akhon manganāmana.”