Read Tangkhul Naga JEREMIAH 30 Bible Online

JEREMIAH 30 - Tangkhul Naga bible

JEREMIAH 30

¹PROHOwui tui Jeremiahli rāhānga:

²“Ashangva̱wui PROHO, Israelwui Varena hithāda hānga: Ina hāngkahai tui saikora lairikphor akhali kapisanghailu.

³Kaja yanglu, iwui mibing Israel eina Judahli shimlui hanmiki kaji zimiksho chi rārāli, da PROHOna hānga, kala ina avāva̱ ngarāli mikahai lam chili athumli khuiungluishitra, kala chi athumna samphangra da PROHOna hānga.”

⁴Israel eina Judahwui pongli PROHOna kahāng tui chi hina:

⁵“PROHOna hithāda hānga: Malung tākatung khangachee, chingri makahai khavaokhon ithumna shāhaira.

⁶Arui ngahānlu, kala theikhuilu, mayarnaona nao pharāpaila? Chithākha khiwui vang mayarnao kachiva̱na kashān tuklaga naokhara̱ thāda kapamkhala? Kachiwui vang mai kachiva̱ mayirhaokhala?

⁷Iyavo! zimiksho chi hakkhamahā, chithāda maleilakranga; Jacobwui vang kakhanangwui atamna; chithalala ali chiwui eina kanshokra.”

⁸“Kala chithang hithāda rāshokra, da saikorawui PROHOna hānga, kaja akahungwui kharitphun chi ina khāngtāmira, athumwui zurthing sātekmihaida athumli yur khangateina athumwui rao masā ngasakluimara.

⁹Kha athumna athumwui PROHO Vareli kala awunga Davidli, athumwui vang ina sakāmiki kaje chili otram ngatha̱ra.

¹⁰ “Chieina mangacheealu, O iwui rao Jacob, wukla makhananglu, O Israel, da PROHOna hānga. Kaja yanglu, nathumli katāva̱wui eina kanmira, tuknar kahaipamwui eina nathumwui naongarāli ina huimira. Jacobna latungda chingri va̱ri eina ungpamra, kala khipānakha mangachee ngasakluimara.

¹¹Kaja nathumli huimi khavai ina ngasomida lei; da PROHOna hānga; Nathumli ina yaovā kahai yur saikora chili shimānchao ngasakhaora, kha nathumli mashimānchao ngasakmara. Ina nathumli ngarakzak kahai mashun eina machinra; mikhangayi tandi mira.”

¹²“Kaja PROHOna hānga: Nathumwui khamā chi marai kapaina, kala nathumwui khamā chi marlaka.

¹³Nathumli singkhāng khavai khipākha maleimana, nathumwui khamārila mangavāmana, nathumwui vang raikhavai maleimana.

¹⁴Nathumli leikashebingna nali malaiserhaira, nathumli yangsangkhami maleilui; morei hakna kahaiwui vang, kashong chungnā kahaiwui vang; yangkashena kashao thāda ina nali tandi khamina.

¹⁵Nawui sākaza̱wui vang khisāda ringkhangā? nawui khangashei maraipaimana. Khikhalajila nawui khayon hakmahālaka, khikhalajila nawui morei chungnāhaira. Ina nali hithā khangasakna.

¹⁶Chiwui vang nali sākakazamali sāshimānra, nawui yuikashi saikora, athum kachiva̱li narkahaipamli khuithuihaora; nathumli yangkashebingli raonao sāngasakra; nathumli ngaponkathuibingli ngaponzāra, nathumli sāshai thāda kasābingli sāshai sāmira.

¹⁷Kaja ina nathumli phasā kaphā mira, ina nathumwui khamā raimira da PROHOna hānga, khikhalajila nathumli athumna khamānga hohaira: ‘Khipākhana mayangsangkhami chi Zionna!’”

¹⁸PROHOna hithāda hānga: “Yanglu, Jacobwui kachonshimwui shimlui ina hanmiluira, kala awui somkhavaipamli lumashanmira; kajuipamli keinung sakāluira, konung leisa khavai apam chili khaningkāluira.

¹⁹Chiwui eina ningkashi laa sāra, lumlao kasābingwui akhonla. Ina athumli kachungkha mataisangmida athum hinaoyākha majimara; ina athumli khayā kāngasakra, kala athum teomeikha majiluimara.

²⁰Athumwui naomayarabing achālakhawui thāhaora, kala athumwui yarui kazipla iwui mangāli sākāra; kala athumli rekakharekbingli ina tandi mira.

²¹Athumwui wungnaola athum khalattawui eina shokra, athumwui khamungala athum ngachaiwui eina rāra. Ina ali rānganai ngasakra, chieina ana ili rānganaira. Kaja khalatta khipāna ili rānganailengrakhala? da PROHOna hānga.

²²Nathum iwui mi sāra, I nathumwui Vare sāra.”

²³Yanglu, PROHOwui siphan zingrot! Malungkakang siphan zingrot thāda ngathunghaira, makhayābingwui kuitungli tāra.

²⁴PROHOwui sākashi malungkhavāt chi mahanungluimara, awui ningli ngarān kahai chi makupchaoranglakha eina tangda. Khanā zimiksholi hi nathumna theishingkhuinaora.