Read Tangkhul Naga JEREMIAH 31 Bible Online

JEREMIAH 31 - Tangkhul Naga bible

JEREMIAH 31

¹“Atam chitharan, da PROHOna hānga, ina Israel shimkhur saikorawui Vare ngasāra, kala athum iwui mi sāra.”

²PROHOna hithāda hānga: “Raighaiwui eina ringkashoka mibingna lamhāngli lukhamashan samphanga; Israelna khangasām samphang khavai kaphā chitharan.

³PROHOna ali khalāda rāchitheiya. Ina nali makhangachei leikashi eina leishihaira; chiwui vang eina Ina nali ningtongching kajina.

⁴Latluida ina nali sākāra, kala nali semkāluishitra, O kachingva̱ Israel! Latluida na khalatta phungkhon ngasoda; khamathānbingwui pheichak kasālungli na azangra.

⁵Latluida Samariawui kaphungtungli drakhāthei yāmgui vāsangluishitra; khalingbingna arong lingsangda chiwui athei kashai samphangra.

⁶Kaja raikānbingna Ephraimwui kaphung ngaleili, ‘Thuilo, ithum Zionli PROHO ithumwui Vareli vāusa.’ kaji atam rārāsāra”

⁷Kaja PROHOna hithāda hānga: “Jacobwui vang mathānda panglāk eina laa sālu, kala miyurbingwui kathānawui vang vaoshoklu; vaomalānlu, masotmilu, ‘PROHOna awui mi, Israelwui shāk kahaiali huimihaira.’ da hānglu.

⁸Yanglu, atung ngaleiwui eina, tāmeikap kaji okathuiwui apamwui eina, athumli ina kazipkhuira; athumwui alungli khangapeola katekla, nao khavai kala ra̱da khalei zangserda kachungkha khangaruma athumna hili latungra.

⁹Athumna chapsasui eina ungra, ningkhalem khangasak eina ngasoda ina thānungra; ina tara̱ khalei kongrāpamli zatung ngasakra, athumna phei mangaphokki kaji apong khangatarli; kaja I Israelwui avāva̱na, kala Ephraim iwui naochizaina.”

¹⁰“O yurbing PROHOwui tui nganālu, kala chi katātāva̱ ngayiphei vāshungda vaochitheilu; ‘Israelli chaiyāngmi kahaia china kazipkhuiluira; kala yaokahoma thāda ana awui yaobingli hommira’ da hānglu.

¹¹Kaja PROHOna Jacobli ngatangkhuihaira, ali pangmeikhar kaji khayuia chiwui eina ana ngatangkhuihaira.

¹²Athumna ungda Zionwui kajuitungli laa sāra; kala PROHOwui kaphākasā chiwui vang athumna mathānra, athei-arai, drakhāra̱, thao hiwui vang, yaonao kala seinaowui vang; athumwui mirin tara̱ chaikhami yāmgui thāra, kala athumna makhanangluimara.

¹³Ngalanaobingna mathānda pheichak sāra; khararnao kala yaronnaobingna mathānra. Ina athumwui chapkhangachā chi khamathān onmira, ina athumli ning lum ngasakra, kala wukakhanangwui vang athumli ning ringphā ngasakra.

¹⁴Ina pāngmonbingwui manglāli makhavāta kashakazā mizāra, kala iwui kaphākasāwui vang iwui mibing ningyangungra, da PROHOna hānga.”

¹⁵ PROHOna hithāda hānga: “Ramahli malungringlak eina chapkhangachākhon akha shai, Rachelna awui naongarābingwui vang chapta lei; naongarābingwui vang ning nganung khavai hānglala makhuisangmana, khikhalajila athum maleithuwa.”

¹⁶PROHOna hithāda hānga: Kachapkhon chi ngasāmhaolu, kala namikli chāra̱ matā ngasakluialu; kaja nali sāman mira, da PROHOna hānga, athumna yangkashebingwui ngaleiwui eina latungluishitra.

¹⁷Naodawui vang nawui kachihān lei, da PROHOna hānga, kala nanao ngarāna athum kachichāramli latungluira.

¹⁸Ephraimna khangahui ina shai, makharāk seinao thāda, nana ili machinmihaira; ili khuisangmilui khavai kathānungmilu, kaja na iwui Vare PROHOna.

¹⁹Kaja ina ngareithui kahai thili ina ning ngateiya; ili tamchithei kahaiwui thili iwui khaishangli ngaphita; I khayakhaowa, kala I maphākhuithuwa, khikhalajila ina yaronlakhawui khayākhamalā phungzata.

²⁰Ephraim iwui leikashia naomayarala? A iwui khaluma naola? Kaja ina ali makhamayā tui hangchinglala ali ina phaningungchinga. Chiwui vang iningna ali honchinga, kachangkhatta ina ali lumashanmira da PROHOna hānga.

²¹“Kazazatpamli nakhalattawui vang machut khavai sāhailu, kazatpong theikhavai sāsanghailu; nana vākhavai chanrei apong yangkazakhailu. O kachingva̱ Israel, latunglu; nawui keinungbingli latunglu.

²²O shitkasang makhaleiva̱, karankha ningchungpamfarakhala? Kaja PROHOna okathuili ot kadhar akha sāhaira: sha̱nao akhana mayarnao akhali kanmi.”

²³Israelwui Vare, saikorawui PROHOna hithāda hānga: “Ina athumli shimlui hankhami tharan, Judah ngalei eina keinungbingli athumna, ‘O khangarongwui pamkhavai, O kathara kaphung! PROHOna nathumli somiranu’ da tuibing hi akhashida matuira.

²⁴Kala Judah eina chiwui keinungbing, lui khavābing, kala sha̱kei homphungda kazatbing saikora chili somrumra.

²⁵Kaja ina ningkachotbingli mathān ngasakluira, kala leolangda khalei manglā saikorali ina chipemiluishitra.”

²⁶Chiwui thili ina thuimathukhaowa, kala pikakhui china ili ringphā ngasaklākhaowa.

²⁷“Yanglu, Israelwui shimkhur eina Judahwui shimkhurli ina mi kala sha̱keiwui athā eina ngasoda yaokasang zimiksho chi rārāda lei, da PROHOna hānga.

²⁸Kala ina hekkakhui eina sākatek konglui khavai, sākhayāng khavai, kala makaphā khuikharā khayang thāda, athumwui sakā khavai eina lingsang khavai chila ina yangmira da PROHOna hānga.

²⁹Chitharan athumna, ‘Avāva̱ ngarāna drakathei kathur shaihaira, kala nao ngarāwui ahā shei ngasaka, da mahangluimara.’

³⁰Kha mi kachiva̱ kachichāwui moreiwui vang thira; drakhāthei kathur kashai mi kachiva̱ ahā sheira.

³¹ “Yanglu, chitharan Judahwui shimkhur eina Israelwui shimkhurli ina tuingashit kadhar akha sāki kaji zimiksho chi rārāda lei da PROHOna hānga;

³²chiya ina gahara sāda athumli Egyptwui eina pāng eina tharakashok tharan, athumwui avāva ngarāli tuingashit sāda athumna sakhai kahai chikatha tuingashit mathāmara da PROHOna hānga.

³³Kha chiwui thili Israelwui shimkhurli ina tuingashit sāki kaji chiya hithāra da PROHOna hānga: Iwui ain athumwui ningli sangmira, kala athumwui wuklungli kapisangmira; kala ina athumwui Vare ngasāra, kala athumna iwui mibing ngasāra.

³⁴ Mi kachiva̱na khongnainaoli kala achināli, ‘PROHOli theilu,’ da hānglaga matamchithei ngarokmara, kaja kateola khareila mi kachiva̱na ili theiserra; da PROHOna hānga; kaja athumwui khayon ina pheomira, kala athumwui morei sākahai maphaningungluimara da PROHOna hānga.”

³⁵Ngashun zimikli horkhangasaka, ngayā kahor mikhavai kachāng sira semkharikrikmi kahaia, shamadru ngaphao khangasaka saikorawui PROHO chi awui mingna, da PROHOna hānga.

³⁶“Ina semkharikrik kahaibing hi iwui eina thuihaiakha, Israelwui ara̱-azāla iwui mangāli yur akha khangasā katang mavaila shimānhaora.”

³⁷PROHOna hithāda hānga: “Atungshong kazingramwui kahak onkhuishapakha, kala okathuiwui kathukla phākhuishapakha, athumna sākahahai chiwui vang Israelwui arā-aza̱ saikorali ina katāva̱li horhaora, da PROHOna hānga.”

³⁸“Yanglu, PROHO wui vang Hananelwui ngashān khavai tārong eina thuilaga Achithek Ngavei vāshungda PROHO wui vang keinung sakakā atam rārādalei.

³⁹Kala onkhavai feetā chi Gareb kaphung kanvālaga angatar eina Goahli vāngaheikhuira.

⁴⁰Kathingunpam, hotlāpamwui tampāk katonga, Kidron kongrānaowuili khalei luipam, zingshoshong khalei Sigui Ngavei ungshungda apam saikora hi PROHOwui katharapam ngasāra. Hi phurshok kahaila, sākhayāng kahaila maleiluilakmara.”