Read Tangkhul Naga JEREMIAH 32 Bible Online

JEREMIAH 32 - Tangkhul Naga bible

JEREMIAH 32

¹Judahwui awunga Zedekiahna mungda katharā kum, kaja Nebuchadrezzarwui khamung tharāda kachishata kum, PROHOwui tui Jeremiahli rāhānga.

²Atam chitharan Babylon awungawui raimibingna Jerusalemli kuinamhaida leisai, kala Jeremiah marānli Judah awungawui konungli khalei mayon khavaipamli phātop sānghaisai.

³Kaja Judahwui awunga Zedekiahna ali hithāda hāngda phātopli sanga, “Khiwui vang nana marānda ‘PROHOna hithāda hānga: Yanglu, ina keinung hi Babylon awungawui pāngli mihaira, kala chi ana khuihaora;

⁴Judahwui awunga Zedekiahna Chaldeabingwui pāng eina mayāmshokmara, kha Babylon awungawui pāngli sangmikachanghaora, kala mai eina mai, mik eina mik yangngasungda ali ngazekra;

⁵kala ana Zedekiahli Babylonli khuivāhaora, kala chili ina ali mavāsamphangranglakha eina tangda chili leisara da PROHOna hānga; nana Chaldeanaobingli ngasungda ngararlala mayuirarmara jila’?”

⁶Jeremiahna hānga, PROHOwui tuina ili rāhānga:

⁷Yanglu, navāgato Shallumwui naomayara Hanamelna nali rāda hāngra, ‘Iwui lui Anathothli khalei chi lokhuilu, kaja hi nana lokhuirāna.’

⁸Chieina ichinā Hanamelna mayon khavaipamli, PROHOwui tui athishurda ili rāhānga, Benjamin lamli khalei Anathothli iwui lui chi lokhuilu, hi nana ngatangkhuirāna; chi nawui vang lokhuilu. Chieina tui hi PROHOwui tuilaka da ina theikhui.

⁹Chieina lui chi ina ichina Henamelwui eina lokhui, kala aman lupa tharāda shini shānmihaowa.

¹⁰Mayā khangarok lairik chili ina shoi sāda nāshātbingwui mangāli mahor namshānhailaga pheisa chi onmihaowa.

¹¹Chiwui thili ina luilot, tuingashit lairik, mahor namkahaiya chila makhanampala khuithathuilaga —

¹²Mahseiahwui naomayara Neriahna kapharā naomayara Baruchli mihaowa, chi ichinā Hanamel, mayākhangarok lairikli shoi kasā nāshātbing, kala phatop khamayonawui karotli leikasa Jihudibingwui mangāli khamina.

¹³Athumwui mangāli ina Baruchli kasoda hānga,

¹⁴“Saikorawui PROHO, Israelwui Varena hithāda hānga: Mayā khangarok lairik mahor namshān kahai chila manamkashān chila khanini chi atam kasāngkha haipai khavai ngaleihamli sanghailu.

¹⁵Kaja Israelwui Vare, saikorawui PROHOna hithāda hānga: apam hili shim, lui kala drakhā yāmgui loluishitra.”

¹⁶Khalowui mayā khangarok lairik chi ina Neriahwui naomayara Baruchli mikahaiwui thili PROHOli ina seiha sāda hānga;

¹⁷“Iyavo, Vare PROHO! Okathui eina kazingram nawui hakkhamahā pangshap kala napāng katingkashok eina sākakhuina! Nawui vang sakkhanā maleimana,

¹⁸nava thingthingli nawui makhangachei leikashi chitheimi, kha avāva̱ ngarāwui khayonla naothot eina tangda phāvai, O sāshap-pangshapa Vare, naming saikorawui PROHOna,

¹⁹thangkhamei ngalat kahai sāshap-pangshapana; mibingwui apong saikora theishapser kaje, kala mi kachiva̱li awui apong kala otsakwui athei athishurda nana sāman mi;

²⁰Egyptli leilakha machut khavai kala matakhak kahai kachungkha sāchithei, aja rāshungda Israelwui kala miyur saikorawui alungli chitharanwui thāda naming ngayao khangasakna.

²¹Machut kala matakhak kahai, nawui pāngthei kharei chi katingshokta, khangachee khangachā eina ngasoda nawui Israel mibingli Egyptwui eina khuishokmi;

²²avāva̱ ngarāli ngashitta seina̱ eina khuira̱ khalong ngalei hi athumli mi;

²³kala athumna zangda ngalei chi samphanga. Kha athumna nawui tui manganāmana kala nawui ainwui athishurdala mazatmana; nana athumli sālu kaji akhala masāmana. Chiwui vang eina, kalākashi saikora hi nana athumwuitungli tā khangasakna.

²⁴“Yanglu, keinung khui khavai shairon rānganai mamānhaira; raighai, chāmrei kala kazātkashiwui vang, keinung hi, ngararda khalei Chaldeabingwui pāngli horsangmihaira. Nana hāng kahai chi ungshunghaira, kala yanglu, namik eina chi theihaira.

²⁵Chithālala, O PROHO Vare, nana ili hānghaira, lui chi lokhuilu, kala nāshāt phāsanglu—keinung chi Chaldeanaowui pāngli horsangmi hailala.”

²⁶PROHOwui tui chi Jeremiahli rāhānga:

²⁷“Yanglu, I PROHOna, phasā khavai saikorawui Varena; iwui vang sakkhanā leila?

²⁸ Chiwui vang eina PROHOna hithāda hānga: Yanglu, keinung hi ina Chaldeanaobingwui pāngli kala Nebuchadrezzar, Babylonwui awungawui pāngli horsangmida ana khuihaora.

²⁹Ngararda khalei Chaldeanaobingna keinung hili rāda ili malungvāt khavai, Baalwui vang athumwui shimtungli nganamkaphā otyur rikkatā, vare khangateili ra̱shakchigat heishokta kapha̱ shim saikora mei sa̱da chui ngasakhaora.

³⁰Kaja Israel eina Judahwui naobingna, nganuilakha eina thuida, iwui miktāli zakkashi maningla masālakmana; Israelwui naomayarabingna athumwui pāng eina kasāsā china iwui malungvāt khavai ngasāhaowa da PROHOna hānga.

³¹Keinung hi sākaphok eina thuida aja rāshungda ili malungvāt khavai kala malungkang khavaimāng kasāwui vang iwui eina khuithuiphalungra.

³²Athumwui awungabing, wungnaobing, pāngmonbing, marānbing, Judah eina Jerusalemwui mi zangda, Israel eina Judahwui naobingwui makaphā chiwui vang eina ili malungvāt khangasakwui vangna.

³³Athumna ili mai mangareirāla khana̱thuihaowa; kala ina tamchitheichinglala hāngkachithei makhuisanglakthuwa.

³⁴ Iwui ming eina kahoa shim chi sākhamāng khavai athumna athumwui ningkakachai ot khaningkai.

³⁵ Baalwui vang Hinnomwui naomayarawui tampākli athumwui naomayara kala naongalāva̱bing Molechli chigat khavai kajujuipambing sākai, Judahli morei sākhavai ina hikathā ot makasolākmana, iwui ninglila hirikkha eina tangda maleisāmana.

³⁶“Chiwui vang eina PROHO Israelwui Varena, nana hāngda khalei keinung hiwui pongli hithada hāngda lei, ‘hi raighai eina, chāmrei eina, kala kazātkashi eina Babylon awungawui pāngli horsangmi kahaina’:

³⁷Yanglu, ina malungkhavāt, malungkakang kala ningkatheng eina kashamvā kahaipam kachiva̱wui eina ina athumli kazipkhuira; ina athumli apam hili khuiungluira, kala athumli chingri eina pānngasakra.

³⁸ Kala athum iwui mi ngasāra, I athumwui Vare ngasāra.

³⁹Athumna ili ngacheeching khavai wuklung kala apong akha athumli sangmira, athumwui vangla, naoda shokki kaji anaongarāwui vāngla phākhavaina.

⁴⁰Athumli ina kaphā sāmi khavaiwui eina mangareithui khavai, athumli makhangachei tuingashit akha sāmira; kala athum iwui eina mangareithui khavai ili khangacheewui ning ina athumli sangmira.

⁴¹Athumwui vang kaphā sākhamili ina mathānra, kala iwui ningla yāngla tongda ina athumli ngalei hili okthui ngasakra.

⁴²“Kaja PROHOna hithāda hānga; makaphā saikora hi ina mibing hiwuitungli khuirākhami thāda, athumli ina ngashit kahai kaphā saikora chila athumli khuirāmira.

⁴³Kala athumna, ‘Chaldeanaobingwui pāngli horsangmi kahai sāla, mila maokkathui ramchona’ da kahāng apam hili pheisā eina lui longarokluira.

⁴⁴Benjaminwui ngaleili, Jerusalemwui kuikhamareili, Judahwui keinungli, kaphungli khalei keinungbingli, Shephelahwui keinungli, Negebwui keinung kachiva̱li aman mida lui longarokra, kala tuingashit lairikli mahor namshāda nāshāt phāsangra; kaja athumwui shimlui ina hanmiluira da PROHOna hānga.”