Read Tangkhul Naga JEREMIAH 33 Bible Online

JEREMIAH 33 - Tangkhul Naga bible

JEREMIAH 33

¹Jeremiahli khamayonawui karotli shungnamhaichingda leilakha PROHOwui tui chi kakhane sāda rāhānga:

²Okathui kasema PROHO, semkhuilaga sākakaa PROHO,— PROHO kahoa china hithāda hānga:

³“Ili ngakaolu ina ngahānkāra, nathumna makathei thum kahai kachungkha hāngmira.

⁴Kuinam kahai keinung kala raighai chi ngākkhui khavai keinungwui shimbing kala Judah awungabingwui shimbing pheikaziplaga raipan sāvai kahaiwui pongli Israelwui PROHO Varena hithāda hānga:

⁵Chaldeanaobingna ngarar khavai rārāda lei, iwui malungkhavāt kala malungkathui eina sāthat kahai athumwui kathingun china keinung chipem khavai; kaja athumwui makaphā makhayāwui vang keinung hiwui eina ina iwui mai thumhaira.

⁶Chithālala ina phasākaphā kala raikhami khuirāmira, kala ina raimida makhavāta leikhayā kala ningkhanung phongshokchitheira.

⁷Judah eina Israelwui shimluila hanmiluida kharewui tākam eina sakāluira.

⁸Athumna iwuitungli sāyon kahai saikora tharngasakra, kala ili ngakaishida morei sākahai saikora chi pheomira.

⁹Ina athumli kaphā sākhami chi kathei kashā okathuiwui miyur saikorawui mangāli, keinung hi iwui mingwui khamathān, masot kala tekhamatei ngasāra, ina khamathā sākhami kala mataisang khangasak saikora hiwui vang athumna ngacheeda kathirra.”

¹⁰“PROHOna hithāda hānga: Nathumna ‘Mila, sāyurla makhalei ramchona’ da kahāng Judahwui keinungbing, Jerusalemwui chānreibing ngachakyāng kahai, mi makhalei khikhala maokathuiya, sāla makhalei chili akhon shāluishitra,

¹¹ ringkaphākhon, khamathānkhon, shakazā mayara kala ngalāva̱, laa kasābingwui khon, PROHOwui shimli ningkashi rākachigatwui laa kasākhon shāluira: ‘Ashangva̱wui PROHOli ningshilu, kaja ava kaphā PROHOna. Kaja awui makhangachei leikashi katang mavaimana!’ Kaja kharewui tākam eina ina ngalei chiwui shimlui hanmiluira.”

¹²“Saikorawui PROHOna hithāda hānga: Ramchopam hili, mila lah sāla maokkathui hiwui keinung saikora hili yaokahomabing sompamda athumwui yao ashangva̱bing hompamluishitra.

¹³Kaphungramli khalalei keinungbing, Shephelah eina Negebwui keinungbing, Benjaminwui lamli, Jerusalemli kuimareida khalei ngaleibing, kala Judahwui keinungbingli, yaokahomabingna yao latluida shānda athumwui pāngli makānkā ngasakluira” da PROHOna hānga.

¹⁴ “Yanglu, atam chi rārāli, Israel eina Judahwui shimkhurli ina ngashit kahai chi ungshung khangasak atam rārāda lei, da PROHOna hānga.

¹⁵Chikachāng kala atam chili, Davidwui vang khangaronga Aphang akha shokngasakra; kala ana ngalei chili mashun kala khangarong eina bichar sāmira.

¹⁶Chitharan Judahli kanmira kala Jerusalem tāphup eina sompamra. Kala ‘PROHO hi ithumwui khangarongna’ kaji aming eina hora.

¹⁷ Kaja PROHOna hithāda hānga: Israel shimkhurwui wungpamkhongli chipam khavai Davidna mi akhala mavātmara,

¹⁸ kala ili rikkatā kachigat, tharāzāt kachigat kala pha̱phayāching khavai Leviwui pāngmonbing shimkhurwui mi akhala mavātlakmara.”

¹⁹PROHOwui tui chi Jeremiahli rāhānga:

²⁰“PROHOna hithāda hānga: Iwui tuingashit ngashunlilapai kala ngayālilapai nana sākhaishapta ngashun eina ngayā ngarakzak kahai atamli maraakha,

²¹iwui rao Davidli tuingashit kasā chila kaira, chithāda sāda awui wungpamkhongli mungkhavai awui naomayara akhala maleimara, kala ili otram ngatha̱mi khavai Leviwui pāngmonbingli iwui tuingashit chila kaihaora.

²²Kazingramli khalei chi mashānkhuikharar thāda, kala shamadruwui situi mangatamkhuikharar thāda, iwui rao Davidwui kala ili otram khangatha̱ Leviwui arā-aza̱bing mataisangmira.”

²³PROHOwui tui chi Jeremiahli rāhānga:

²⁴“Mibingna, ‘PROHOna kapangkakhui shimkhur khani chili khalanhaira’ da kahāng chi na mayangkhuirangla? Chithāda athumna chipatlak eina iwui mibingli athumwui mikyanli yur akhana da machāpmimana.

²⁵PROHOna hithāda hānga: Ngashun eina ngayāli ina tuingashit masāhaisāsi kaja, kala okathui eina kazingramli iwui shiya-chikan chi mamihaisāsi kaja,

²⁶Jacobwui kala iwui rao Davidwui arā-aza̱bingli kapangkhuida, Abraham, Isaac, kala Jacobwui atheili mungkhavai makapangkhuimara. Kaja ina athumwui shimlui hanmiluira, kala athumwuitungli lumashanmira.”