Read Tangkhul Naga JEREMIAH 34 Bible Online

JEREMIAH 34 - Tangkhul Naga bible

JEREMIAH 34

¹ Babylonwui awunga Nebuchadnezzar kala awui raimi katongana kala awui azingli khalei wungram saikorana kala mibing saikorana Jerusalem kala chiwui keinung saikorali rai sāda leilakha PROHOwui tui chi rāhānga:

²“Israelwui PROHO Varena hithāda hānga, Judahwui awunga Zedekiahli vāhanglu, ‘PROHOna hithāda hānga: Yanglu, keinung hi ina Babylon awungawui pāngli horsangmira kala ana mei eina thottāhaora.

³Nawui pāngwui eina mayāmshokrarmara, kha tukkhuilākra kala apāngli mihaora; Babylonwui awungali mai eina mai, mik eina mik yangngasungda chān ngazekra; kala na Babylonli vāhaora,’

⁴Chithālala PROHOwui tui nganālu, O Judahwui awunga Zedekiah! Nawui pongli PROHOna hithāda hānga: Na raighai eina mathimara.

⁵Na chingri eina thira. Kala navāngarā nawui mangāli leikasā awunga kharebingwui vang nganamkaphā ot rikkatā thāda nawui vangla nganamkaphā ot riktāda, ‘Iyavo, Amei!’ da nawui vang chapngachāra. Kaja tui hi ina hāngkahaina da PROHOna hānga.”

⁶Chieina tui saikora hi Jeremiah marānna Judahwui awunga Zedekiahli Jerusalemli leilakha hāngsera,

⁷chitharan Babylon awungawui raimina Jerusalemli, kala chiwui ngalemli taikahai keinung khani kaja Lachish eina Azekahli rai ngararmahungsai; kaja Judahwui leikasā keinung ngachaili raipan sākahai keinung khani himāng taimihaisai.

⁸Awunga Zedekiahna Jerusalemwui mi saikorali ningkhān phongkashok tuingashit akha sākhangasakwui thili PROHOna Jeremiahli rakahāng tuina,

⁹chiya, mi kachiva̱, sha̱naoranu, mayarnaoranu, awui Hebrew raonaobingli ningkhān mida chihoserphalungra, chithāda sāda khipānakhala achinā Jehudi akhali raonao sāda manarpaimara.

¹⁰Wungnao saikorana, ayaonao saikorana, raonaobingli sha̱nao, mayarnaola manarhaila ningkhān mida chihoserra da khamayā tuingashitli zangda kahāng nganai, kala chi nganāda chihoserhaowa.

¹¹Kha khaleilaga athumwui ning ngacheiluihaida chiho kahai sha̱nao mayarnao, raonaobing chili raopamli khuiungluishithaowa.

¹²PROHOwui eina PROHOwui tui chi Jeremiahli rāhānga:

¹³“Israelwui PROHO Varena hithāda hānga: Egypt ngaleiwui eina, narkahai shimwui eina navāngarāli thānkashok chitharan ina tuingashit akha sāda hānga,

¹⁴‘Kum tharuk [3] kākapei tharan, nathum kachivana nathumli yorsangda otram ngatha̱mi kahai nachinā Hebrewnaobingli ningkakhān miphalungra; otram ngatha̱khamiwui eina ningkakhān miphalungra.’ Kha navāngarāna ili manganāsangmana, kala manāshungmana.

¹⁵Aya-achonthang nathumna ningngateida iwui miktāli khamashung chi sāda nathum ava̱va̱na khongnainaoli ningkhān khami vaomalānmi, kala iming eina kahoa shimlungli nathumna iwui mangāli tuingashit khuihaira,

¹⁶kha nathumna ning ngacheiluihaida nathum kachiva̱na sha̱nao, mayarnao raonaobingli athumwui ningkachāng athishurda nathumna ningkakhān mihailaga tukkhuiluishitta nathumwui azingli raonao sālui ngasakta iming sāmakhaohaowa.

¹⁷Chiwui vang eina PROHOna hithāda hānga: Nathumna nachinā eina khongnaili ningkhān khami vaomalānhailaga chiwui athishurda iwui kahāng manganāmana; yanglu, nathumlila ina raighaili, chāmreili, kala kazātkashili ningkhān eina chihokasangna da vaokhamalāna da PROHOna hānga, okathuiwui wungram saikorana nathumli theilaga ngachee-ngachā ngasakra.

¹⁸Iwui tuingashit kala athumnala mayāda chiwui alungli hāngkahai tui chi nathumna makhamayonwui vang, seinao ngalākshaklaga chiwui ngachaili kazat thāda,

¹⁹Judahwui wungnaobing, Jerusalemwui wungnaobing, ahongabing, pāngmonbing, kala ngalei hiwui mi saikora seinao ngalākshak kahai angachaili khamakānbing,

²⁰yangkashebing athumwui manglā khuikida phākazatabingwui pāngli ina horsangmihaora. Athumwui angun yongkazat vānao, kala ramsāwui kashakazā sāra.

²¹Judahwui awunga Zedekiah, kala awui wungnaobingli, ina yangkashebing kala athumwui manglā khuikida kasā athumwui pāngli, kaja nathumwui eina hanthui kahaiya Babylon awungawui raimibingwui pāngli horsangmira.

²²Yanglu, ina kasoda keinung hili athumli khuiungluira; athumna keinung hili rāngararda khuira, mei eina thottāmihaora. Judahwui keinungbing mi makapān ngachakyang kahai ngasā ngasakra da PROHOna hānga.”