Read Tangkhul Naga JEREMIAH 35 Bible Online

JEREMIAH 35 - Tangkhul Naga bible

JEREMIAH 35

¹ Josiahwui naomayara, Judahwui awunga Jehoiakimwui thotli PROHOwui eina tui chi Jeremiahli rāhānga:

²“Rechabbingwui shimli vāda ahānglu, kala PROHOwui shimli khuirāda kā akhali pamngasaklaga zam shimanlu.”

³Chieina ina, Habazziniahwui naomayara Jeremiahna kapharā naomayara Ja-azaniahli ngasoda achināngarā, anaomayarabing, kala Rechabwui shimkhur katongali thānunga.

⁴Ina athumli PROHOwui shimli khuiunga, Varewui mi Igdaliahwui naomayara Hananwui naomayarabingna pamkhavai kā chili pamngasaka; kā chiya Shallumwui naomayara khāmongli raikān kapama Ma-aseiahwui kā atoli khalei wungnaobingwui kā ngalemlina.

⁵Chiwui thili Rechabbingwui mangāli ina zamshamla kala khorāmla mathunlaga, “Zam manglu” da ina hānga.

⁶Kha athumna ngahānkai, “Ithuma zam mamangmana, kaja ithumwui avā, Rechabwui naomayara Jonadabna, ‘Nathum kala nathumwui naomayarabing zam mamangpailakmara,

⁷nathum shim masāpaimara, nathum lui mavāmara, nathum drakhāthei yāmgui kala luila mavaimara; kha nathumwui kazat lam chili mirin peida okpeimei khavai kachonshimli pamzatlu.’ da hānghaida lei.

⁸Ithumwui avāva̱ Jonadab, Rechabwui naomayarawui tui ithumna nganai, ana ithumli kakaso saikora ithum khalatta, preiva̱ngarā, naomayara kala ithumwui naongalāva̱ ngarāla ithumwui mirin peida drakhāra̱ mamangmana;

⁹kala sompam khavai khipākha shim masāmana. Ithuma lui maleimana, yāmguila, athei-araila mangavāmana.

¹⁰Kha ithumwui avāva̱ Jonadabna kaso kahai saikora nganāda kachonshimli okthuirāshuma.

¹¹Kha Babylonwui awunga Nebuchadnezzarna ngalei hili rai rākatā tharan, ithumna, ‘Ralu, Chaldea kala Syrianaobingwui raimiwui eina ithum Jerusalemli yāmvausa’ da hānga. Chiwui vang ithum Jerusalemli pānda khaleina.”

¹²Chiwui thili PROHOwui tui china Jeremiahli rāhānga;

¹³“Israelwui Vare, saikorawui PROHOna hithāda hānga: Judah kala Jerusalemwui mibingli vāda ahānglu: Iwui tui kala hāngkachithei nathum makhuisangmarala? da PROHOna hāngli.

¹⁴Rechabwui nao Jonadabna drakhāra̱ mamangpaimara kaji mayona, aja eina tangda athumna drakhāra̱ mamangmana, kaja athumna avāva̱wui kahāng nganāchaowa. Ina nathumli hāngchinga, kha nathumna makhuisanglakmana.

¹⁵Iwui rao marānbing kachungkha chihoda athumna, ‘Makhamashung apongwui eina nathum kachiva̱ latungda nathumwui apong mashung ngasaklu, kala khangatei vareli otram ngatha khavai mashurzatalu, chithakha nathumli kala navāngarāli ina mikahai ngalei chili somra’ da hāng ngasakchinga. Kha nathumna ili manganāsangmana, kakhuila makhuisangmana.

¹⁶Rechabwui naomayara Jonadabwui naomayarabingna avāva̱na kahāng khuisangda mayona, kha mibing hina iwui kahāng manganāmana.

¹⁷Chiwui vang eina, Israelwui Vare, saikorawui PROHOna hithāda hānga: Yanglu, ina kalākashi hāngkahai saikora chi Judahwui mibing kala Jerusalemli khaleibingwuitungli khuirāra; khikhalajila ina athumli hāngkahai chi athumna manganāsangmana, ina athumli hohaira kha mangahānkāmana.”

¹⁸Kha Rechabshi shimkhurli Jeremiahna hānga, “Israelwui Vare, saikorawui PROHOna hithāda hānga: Khikhalajila navā Jonadabwui kakaso nganāda, kala awui hāngkachithei mayonda, kala kakaso saikora sāserhaoda,

¹⁹chiwui vang Rechabwui naomayara Jonadabwui mina, iwui mangāli nganing khavai mi mavātlakmara da Israelwui Vare, saikorawui PROHOna hithāda hānga.”