Read Tangkhul Naga JEREMIAH 36 Bible Online

JEREMIAH 36 - Tangkhul Naga bible

JEREMIAH 36

¹Josiahwui naomayara Judahwui awunga Jehoiakimna mungda khamate kum PROHOwui eina tui hi Jeremiahli rāhānga.

²“Lairik akhalui akha khuilaga, Israel, Judah kala miyur saikorawui pongli ina hāngkahahai saikora chi, Josiahwui atam eina thuida aja rāshungda ina hāngkahai saikora chi kapikhuilu.

³Ka̱lākashi rākhavai ina ngarān kahai hi Judahwui shimkhurna shālaga ning ngateida makaphāwui eina latunglapai; chithakha athum ava̱va̱na latungda inala athumwui khayon kala morei pheomi paira.”

⁴Chieina Neriahwui naomayara Baruchli Jeremiahna hokhui, kala ali PROHOna kahāng tui saikora chi Jeremiahna Baruchli hāngtāmilaga kapikhui ngasaksera.

⁵Jeremiahna Baruchli kasoda hānga, “PROHOwui shimli vākhavai ili mamayāthura;

⁶chiwui vang eina nana vālaga, kakhum eina pamthang, ina hāngtālaga nana kapikhui kahai lairik akhalui hiwui eina PROHOwui tui hi PROHOwui shimli khalei mi saikorana shākhavai pāmilu. Keinungwui eina kharā Judahwui mi saikoranala shāser khavai nana pāchitheilu.

⁷Mi kachiva̱na awui makaphā apongwui eina latungda athumna kapo PROHOwui mangāli vāshunglapai, kaja mibingli PROHOwui malungkhavāt hakmahālaka.”

⁸PROHOwui shimlungli lairik akhaluiwui eina PROHOwui tui pāmi khavaiwui pongli Jeremiah marānna Neriahwui naomayara Baruchli kakaso saikora chi ana sai.

⁹Josiahwui naomayara Judahwui awunga Jehoiakimna mungda kaphangā kum, kachāng kachikoli, Jerusalemwui mi saikora kala Judahwui keinungwui eina Jerusalemli khavābing saikorana PROHOwui mingli kakhum eina pama.

¹⁰Kala mi saikorana shākhavai, Jeremiahwui tui, lairik akhaluili kapi kahaibing chi Baruchna PROHOwui shimli zangkhavai Kadhara Ngavei chiwui atoli khalei Shaphan kapimewui naomayara Gemariahwui kāwui eina pāchithei.

¹¹Shaphanwui nao Gemariahna kapharā Micaiahna PROHOwui tui saikora lairik akhalui chiwui eina kashā tharan,

¹²ana awungawui shimli, kapimewui kāli kazang eina wungnao saikora chiya: Elishama kapime, Shemaiahwui naomayara Delaiah, Achborwui naomayara Elnathan, Shaphanwui naomayara Gemariah, Hananiahwui naomayara Zedekiah kala wungnao saikora pamsai.

¹³Kala Baruchna mibingwui mangāli pākachithei lairik akhaluili kapi kahai tui ana shākhui kahai saikora chi Micaiahna athumli ahāngsera.

¹⁴Chieina wungnao saikorana Cushwui naomayara Shelemiahna kapharā Nethaniahwui naomayara Jehudili chihovāda Baruchli hithāda ahāng ngasaka, “Mibingwui miktāli nana pākachithei lairik akhalui chi khuilaga hili rālu.” Chieina Neriahwui naomayara Baruchna lairik akhalui chi apāngli khuiphungda athumwuili vai.

¹⁵Athumna, “Pamlaga pāyanglu” da kasoi. Chieina Baruchna chi pāchithei.

¹⁶Athumna tui chi shālaga khangachee eina akha eina akha yangngarokta Baruchli hānga, “Awungali tui saikora hi chishātphalungrali.”

¹⁷Kala Baruchli, “Hānglu, nana kathāda kapikhui kajikhala? Jeremiahna hangtāmilaga kapikakhuila?” da ngahāna.

¹⁸Ana ngahānkai, “Ana hāngtāmamānlaga ina muk eina lairik akhalui hili kapisang kajina.”

¹⁹Wungnaobingna Baruchli hānga, “Nala, Jeremiahla ngathumthathuihaolu, nani kali leilikhala da khipālikha mathei ngasaklu.”

²⁰Chieina athumna awungawui konungli vai kala Elishama kapimewui kāli akhalui chi haihailaga awungali tui saikora chi achishāta.

²¹Chieina awungana Jehudili chiholaga Elishama kapimewui kāli kahai lairik akhalui chi akhui ngasaka, kala Jehudina awungawui mangāli nganingda khalei wungnao saikorawui mangāli awungali pāchithei.

²²Hi kachāng kachiko atamlina, kala awungana sikachāng shimli pamda awui mangāli meiphu sāpamsai.

²³Jehudina tuikhum kathum mati pākatā eina awungana akhalui chi ghainao eina kakshokmamān meiphuli horsangmamānda meina lairik akhalui chi chuitup tāhaowa.

²⁴Chithālala awungala, awui raobingla, tui chi shāshālaga khipākha mangacheemana, wukhanangda kachonla maserkhākmana.

²⁵Elnathan, Delaiah kala Gemariahna lairik akhalui chi mariktā khavai awungali hānglala manganāsangthuwa.

²⁶Kala awungana awui naomayara Jerahmeel, Azri-elwui naomayara Seraiah kala Abdeelwui naomayara Shelemiah athumli kapime Baruch eina Jeremiahli atukkhui khavai kasoi; kha PROHOna anili thummihaowa.

²⁷Jeremiahna hāngtāmamānlaga Baruchna kapikakhui lairik akhalui chi riktā kahaiwui thili, PROHOwui tui Jeremiahli rāhānga:

²⁸“Lairik akhalui khangatei akha khuiluilaga Judahwui awunga Jehoiakimna riktā kahai lairik akhalui kharepali kapihaikasā tui chi tākam eina kapikhuiluilu.

²⁹Kala Judahwui awunga Jehoiakimwui pongli nana hithāda hānglu, ‘PROHOna hithāda hānga: Nana “Khiwui vang eina Babylon awungana ngalei hi rākaida mila sha̱keila shimānserhaora da kapisangkhala?” da lairik akhalui chi riktāmihaira.’

³⁰Chiwui vang eina Judahwui awunga Jehoiakimwui pongli PROHOna hithāda hānga: Davidwui wungpamkhongli pamkhavai mi akhala masamphangmara, kala awui kathi angun ngashun kasāli pahanghaira, ngayā ikra̱ matakpira.

³¹Ali, awui naotunbingli, kala raobingli, athumwui khayonwui vang tandi mira; Jerusalemli kapambinglila, Judah mibinglila, athumwuitungli makhamayā ina hāngtā kahai kalākashi saikora chi tāngasakra, chithālala athumna manganāsangmana.”

³²Chieina Jeremiahna lairik akhalui khangatei akha khuilaga Neriahwui naomayara Baruch kapimeli kharewui Judah awunga Jehoiakimna meili riktā kahai tākam eina hāngtāmimamānlaga tui saikora chi kapikhui ngasaka; kala ngaraichānanai kaji tui kachungkhala ngarumsanga.