Read Tangkhul Naga JEREMIAH 37 Bible Online

JEREMIAH 37 - Tangkhul Naga bible

JEREMIAH 37

¹Babylonwui awunga Nebuchadnezzarna Judah ngaleili awunga sākhangasaka Josiahwui naomayara Zedekiahna Jehoiakimwui naomayara Coniahwui mahut munga.

²Kha ala, raobingla, kala awui mibingla Jeremiah marānna hāngkhami PROHOwui tui chi khipākha makhuisangmana.

³Awunga Zedekiahna Shelemiahwui naomayara Jehucal eina Ma-aseiahwui naomayara Zephaniah pāngmonli Jeremiah marānwui ngalemli chihovāda hāngngasaka, “Ithumwui vang ithumwui Vare PROHOli seiha kasāmilu.”

⁴Chitharan Jeremiahli phātop masangrangsāda yarui ngachaili zatung zatvāpaida leisai.

⁵Jerusalemli kuinamkasā Chaldeanaobingna Pharaohwui raimi Egyptwui eina rāhaira da pao kashā tharan athum Jerusalemwui eina hanthuihaowa.

⁶Chiwui thili PROHOwui tui chi Jeremiah marānli rāhānga:

⁷Israelwui PROHO Varena hithāda hānga: Ili ngahānkhui khavai nali iwuili chihokharapa Judah awungali hithāda hānglu, “Yanglu, nali ngachonkida kharā Pharaohwui raimibing Egyptli latungki jihaira.

⁸Kala Chaldeanaobingna keinung hili latrāluida rāngararluira, athumna yuihaida mei eina thottāmihaora.

⁹PROHOna hithāda hānga, Chaldeanaobing ithumwui eina thuilakhaora, da nathum khalatta mangui ngasaklu; kaja athum rāluishitra.

¹⁰Kaja nathumli ngararda khalei Chaldeawui raimi saikorali nathumna yuihailala athumwui ngachaili khamā kaza̱ athumwui kachonshimli khaleibing athummāngnala thuingararkhuilaga keinung hi mei eina thottāra.”

¹¹Pharaohwui raimi rārāli kajiwui vang Chaldeawui raimibingna Jerusalemwui eina thuikahai eina,

¹²Jeremiahna awui yar akhui khavai Jerusalemwui eina Benjamin ngaleili vai.

¹³Ana Benjamin Ngavei vākashung tharan, Hananiahna kaphara Shelemiahwui naomayara raikān kapama Irijahna marān Jeremiahli tukkhuihaowa, kala “Na Chaldeanaobingwuili ayāmsangki kajina” da hānga.

¹⁴Jeremiahna, “Maninglakmana, Chaldeanaobingli mavāzanglakmara” da ngahānkai. Kha Irijahna awui tui makhuisangla tukkhuida wungnaobingwui mangāli khuivāmihaowa.

¹⁵Wungnaobingna Jeremiahli malungvātlākhaida kashaola shaowa, kala kapime Jonathanwui shimli narhaowa, kaja awui shim chi phātopshim sāsai.

¹⁶Jeremiahna tuknar khavaipamli zimiksho kasāngkha pamkahai thili,

¹⁷Awunga Zedekiahna ahokhui ngasakta ali samphanga. Awungana awui shimli ngathumda ngahānda hānga, “PROHOwui eina tui khaleila?” Jeremiahna “Lei” da ngahānkai. Kala ana hānga, “Nali, Babylonwui awungawui pāngli horsangmihaora.”

¹⁸Jeremiahna awunga Zedekiahli hithāda hānglui, “Nali, nawui raobinglila, kala mibinglila ina khi khayon sāhaoda ili phātop sangkahaikhala?

¹⁹‘Babylon awungana rai marāngararlakmara’ da phongkhame nawui marānbing kali vāhaokhala?

²⁰Ara nganāmilu, O ishāmei awunga, iwui kapo hi khanganāmilu, Jonathan kapimewui shimli ili machihoungmiluilu, I chili thikachanghaipaishina.”

²¹Awunga Zedekiahna hukhum mida Jeremiahli khamayonwui yāngkhupli haihaowa; kala keinung chiwui kashakazā makānranglakha eina tangda thangkachida khamuitang ava̱va̱ khamui kasaa chānreiwui eina mizāchinga. Chithāda Jeremiahna khamayonawui yāngkhupli pamsai.