Read Tangkhul Naga JEREMIAH 38 Bible Online

JEREMIAH 38 - Tangkhul Naga bible

JEREMIAH 38

¹Jeremiahna mi saikorali kahāng chi Mattanwui naomayara Shephatiah, Pashhurwui naomayara Gedaliah, Shelemiahwui naomayara Jucal kala Malchiahwui naomayara Pashhur, athumna shāsera,

²chiya, “PROHOna hithāda hānga, keinung hili kapambing raighai eina thira, chāmrei eina, kala kazātkashi eina; kha Chaldeanaobingwuili yāmkasangbing mathimara, awui mirin raimazum sāda athumli masāthatmara, ringra.”

³“PROHOna hithāda hānga, keinung hi Babylon awungawui raimiwui pāngli mashoilakla horsangmida athumna khuihaora.”

⁴Chieina wungnaobingna awungali hānga, “Mipa hili shaothathaolu; kaja ana hikathā tui matuida keinung hili khalei raimibing, kala mi saikorali ningteo ngasakta lei. Kaja mipā hina mibingwui phākhavai maningla kalā shikhavai sāda lei.”

⁵Awunga Zedekiahna hānga, “Yanglu, a nathumwui pāngli khaleina kaja awungana nathumli makhamayā khikha masārarmana.”

⁶Chieina athumna Jeremiahli khuilaga awungawui naomayara Malchiahwui paibung mayon khavai yāngkhupli khalei chili horsanghaowa, paibung chili Jeremiahli seipeng eina hoklaga chihosanghaowa. Paibungli tara̱ mazangsāmana, kha leivatmāng leisai, kala Jeremiah leivatlungli ngaphumhaowa.

⁷Awungawui shimli leikasā Ebed-melech kaho Ethiopiawui ahonga china, Jeremiahli paibungli horsanghaira da kashā tharan awunga Benjamin Ngaveili pamsai.

⁸Ebed-melechna awungawui shim eina shokta awungali ahānga,

⁹“Ishamei awunga, mibingna Jeremiah marānli paibungli horsang kahai hi maphāmeikap kaji ot akhana; a chili kathai eina thihaora, kaja keinungli kashakazāla maleilakthura.”

¹⁰Chieina Ethiopiawui Ebed-melechli awungana kasoda hānga, “Hiwui eina mi kathum khuilaga Jeremiah marān mathiranglakha paibungwui eina khāngshokmihaolu.”

¹¹Chieina Ebed-melechna mi kathum thānphunglaga awungawui shimli kashankachon haikhavaipamli chonshi-chonkāk zangkhui, kala seipeng eina hoklaga Jeremiahli chizana.

¹²Ethiopiawui Ebed-melechna Jeremiahli hānga, “Chonshi-chonkāk chi nawui rikhāli taplaga seipeng chi hoksanglu.” Jeremiahna chithāda sai.

¹³Chieina athumna Jeremiahli seipeng chieina paibungwui eina ngakhunshokhaowa. Kala Jeremiahna raikānwui yāngkhupli pamhaowa.

¹⁴Awunga Zedekiahna Jeremiah marānli ahokhui ngasakta PROHOwui shim zangkhavai kakathuma pam chili samphanga. Awungana Jeremiahli hānga, “Ina nali khangahān akha sāra; ili akhala mathumhaialu.”

¹⁵Jeremiahna Zedekiahli hānga, “Ina nali hāngakha ili masāthatmarala? Ina nali hāngchitheilala nana manganāsangmara.”

¹⁶Chieina awunga Zedekiahna ngathumda shākhi sāda hānga, “Ithumwui manglā sangkhame PROHOwui ming singda kahāngna, ina nali masāthatlakmara, kala nawui manglā khuikida phākazata athumwui pānglila mahorsangmilakmara.”

¹⁷Chiwui thili Jeremiahna Zedekiahli hānga, “Israelwui Vare, saikorawui PROHO Varena hithāda hānga, nana Babylon awungawui wungnaobingli hamsangakha, namanglā huimira, kala keinung hila meina mathottāmara, na kala nawui shimkhurla kharing samphangra.

¹⁸Kha nana Babylonwui awungawui wungnaobingli mahamsangakha, keinung hi Chaldeanaobingwui pāngli horsangmida mei thottāmihaora, kala na athumwui pāng eina mayāmshokrarmara.”

¹⁹Awunga Zedekiahna Jeremiahli hānga, “Chaldeanaobingwuili ayāmsang kahai Jehudibingli I nganglaka, kaja athumwui pāngli horsangmihaiakha athumna ili singkharakpaishina kajina.”

²⁰Jeremiahna hānga, “Athumwui pāngli nali mahorsangmilakmara, PROHOwui tui ina kahāng hi nganakha nali khikha mathālakmara, namangla shākmira.

²¹Kha nana mahamsangakha, shokki kaji mahākhami PROHOna ili chithei khami chi hina:

²²Yanglu, Judah awungawui shimli khalei sha̱nao saikora Babylon wungnaobingwui mangāli thanvāda hithāda hānga, ‘Nana shitkasang ngasotnaobingna minamhaira, nali athumna yuihaira; ara naphei leikhonli ngaphumhaoda nawui eina athum yāmserhaira.’”

²³“Napreiva̱̱ ngarā, nanaomayarabing Chaldeanaobingli thanvāserhaora, kala nakhalatta athum pāngwui eina mayāmshokrarmara, kha Babylon awungana tukkhuihaora, kala keinung hila mei chuitāhaora.”

²⁴Zedekiahna Jeremiahli hānga, “Tui hi khipālikha matheingasakalu chithakha na mathimara.

²⁵Iniwui khangazek hi wungnaobingna shāhaida rāngahānakha, kala ‘Awungana nali khi hāngkhala, nana ali khi hāngkhala kaji tui saikora ithumli mathumhailakla hāngakha nali masāthatmara’ da ngahānakha,

²⁶nana athumli hithāda ngahānkalu: ‘Jonathanwui shimli mathisang khavai ili makachihovāmiphalunglu’ da ina awungali hamsangda kapona da athumli hānglu.”

²⁷Chiwui thili wungnao saikorana Jeremiahli rāngahāna, kala awungana ali hāngkachithei thāda ana ngahānkai. Chiwui vang ali ngazeklaga athumna hanthuihaowa, kaja aniwui khangazek athumna mashāmana.

²⁸Jerusalem makhuiranglakha eina tangda Jeremiahna mayon khavai yāngkhupli pamsai.