Read Tangkhul Naga JEREMIAH 39 Bible Online

JEREMIAH 39 - Tangkhul Naga bible

JEREMIAH 39

¹Judahwui awunga Zedekiahna mungda kachiko kum, kachāng katharāli, Babylonwui awunga Nebuchadnezzarna awui raimi saikora thānlaga Jerusalemli rākuinamhaowa.

²Zedekiahna khamung zingkum tharāda akhawui kachāng khamatewui zimiksho kachikothang, keinungwui alungli sākhaizanghaowa.

³Jerusalem khuikahai tharan Babylon awungawui wungnao saikora alungthung ngaveili rāpamsera: Nergal-sharezer, Samgar-nebo, Rabsariswui Sarsechim, Rabmagwui Nergal-sharezer, kala otva̱bingla zangsera.

⁴Judahwui awunga Zedekiah eina raimi saikora athumli kathei tharan, athum yāmhaowa, kala awungawui yāmgui phākho khaniwui ngachaili khalei ngavei chieina ngayāshong shoklaga Arabahshong yāmvai.

⁵Kha Chaldeawui raimibingna athumli kharomvāda Jerichowui tampākli Zedekiahli angaphankhui; kala athumna ali tukkhui kahai thili, Hamathli khalei Riblahli Babylonwui awunga Nebuchadrezzarwui mangāli khuiungmi; kala awuitungli tui tāhaowa.

⁶Riblahli leilakha Babylonwui awungana Zedekiahwui naomayarabingli awui miktāli shaothat ngasaka, Judahwui khangam khareibinglila shaothatserhaowa.

⁷Ana Zedekiahwui mik latshokmihaowa, kala Babylonli shimenvā khavai mari khanghui eina pheipāng khalaphaowa.

⁸Chaldeanaobingna awungawui shim kala mibingwui shim mei thottāmiserhaowa, Jerusalemwui phākhola pheimiserhaowa.

⁹Chiwui thili khamayonbingwui kathāna Nebuzaradanna, keinung lungli mathikhangakanbing, awui eina khayāmbing eina leikasābing chi Babylonli tukvāserhaowa.

¹⁰Nebuzaradan, raikānbingwui kathāna china Judah ngaleili khangazana khikha makhaleibingli drakhā yāmgui kala lui vāzā khavai mi.

¹¹Jeremiahwui pongli Babylonwui awunga Nebuchadnezzarna khamayonawui akhavā Nebuzaradanli kasoda hānga,

¹²“Ali khuilaga mathālak eina yangmilu, zakkashi masālu, kha awui kahāng athishurda sāmilu.”

¹³Chieina raikānwui akhavā Nebuzaradan, Rabsariswui Nebushazban, Rabmagwui Nergal-sharezer kala Babylonwui khamataiya otva̱bingna chihovāda,

¹⁴Jeremiahli khamayonawui yāngkhupwui eina ahokhui ngasaka. Kala Shaphanwui naomayara Ahikamna kaphara Gedaliahwui pāngli horsangmida awui shimli khuiung ngasakhaowa. Chithāda mibingwui alungli somkapam samphanga.

¹⁵Khamayonawui yāngkhupli leilakha PROHOwui tui chi Jeremiahli rāhānga:

¹⁶“Vada, Ethiopiawui Ebed-melechli ahānglu, ‘Israelwui Vare, saikorawui PROHOna hithāda hānga: Yanglu, keinung hili makhamayāwui vang kaphā masāmimara, kha kalākashi ngasā ngasakra, kala hi chithang nawui mangāli ungshung ngasakra.

¹⁷Kha ina nali chithang kanmira, nana khangacheea athumwui pāngli mahorsangmimara da hānga.

¹⁸Kaja ina nali huimilākra, kala na raighai eina mathimara, kha nana ili chikahamwui vang, raimazum sāda na kharing samphangra’ da PROHOna hānga.”