Read Tangkhul Naga JEREMIAH 4 Bible Online

JEREMIAH 4 - Tangkhul Naga bible

JEREMIAH 4

¹“Nana latungakha, O Israel, da PROHOna hānga, na ili latungphalungra. Nawui ningkakachai otsak hupta iwui mangāwui eina horserhaida ning mayaoyaakha

²kala ‘PROHOna theira’ da awui mingli mingzaida akachang eina, mashun eina, kala angatar eina ngashitshapakha, yurbing awui lungli sokhami samphangra, kala awuili athumna tekmateira.”

³ Kaja Judahwui mibing eina Jerusalemnaobingli PROHOna hithāda hānga: “Nathumwui rampho kahai lui rākkhuilu; kala ka̱shātlungli athā mayaosangalu.

⁴PROHO mingli nathum khalatta ahui rimshoklu, kala nathum wuklungwui ahuila rimshoklu, O Judahwui mibing kala Jerusalemnaobing; Iwui malungkathui mei thāda shokpaishina, kala chuida khipānakha mashimitrarpaishina, nathumwui makaphā kasāwui vang.”

⁵Judahli hānglu, kala Jerusalemli vaomalānlu, “Ngalei saikora vāshungda talla̱ khonglu, panglāk eina vaoda hānglu, ‘Kazipkhuilu, ithum khangazipa keinungbing chili ungusa!’

⁶Zionshong philān khāngkālu, kalāmashi khavai yāmlu, mapamnganaolu, kaja ina hakkhamahā sākashimān atungshongwui eina khuirāra.

⁷Kazingkha̱ akha akhur eina shokhaira; yurbingli sākakhayanga akha shokhaira, awui pamwui eina zathaira, nathumwui ngalei sāshimān khavai; nathumwui keinungbing sākhayanghaida mila mapamara.

⁸Hiwui vang bora ngavaida pangda chapngachālu, kaja ithumwui eina PROHOwui malungkhavāt mangareithuiranga.”

⁹“Chithanghon awunga eina wungnaobing khanini mapingrarmara, da PROHOna hānga, pāngmonbingla ning thenghaora kala marānbingla ning maphākhuimara.”

¹⁰Chieina ina hānga, “Iyāvo, Proho VARE, mibing kala Jerusalemli nana minamchaohaira; nathumli khikha mathāmara da nana hānghailaga ara athumwuitungli raighai rāparhaira.”

¹¹Atam chitharan, mibing eina Jerusalemli hithāda hāngra, siwukwui kajuia khangaiwui eina kasā masi iwui mibingwui nao ngalāva̱wuishong phanrāhaira; hamkhavai lah sāmathā khavai riri kaphan maningmana,

¹²pangkhanā masi iwui vang eina phankharāna. Ara athumwuitungli bicharli khamatuia chi ina.

¹³Yanglu, ana muiyā khangakhui thāda rārāli, awui siguigāri surkakhaning thai; awui siguibingna khalāngli thākmei; ithum kalākashi, kaja ithum kuphaira!

¹⁴O Jerusalem, nali huimi khavai makhayāwui eina wuklung pheomathālu. Karankha makaphā ning nawui wuklungli leifarakhala?

¹⁵Kaja Danwui eina akhon akha phongshoka, kala Ephraim Kaphungwui eina makaphā phongchithei.

¹⁶A rārāli da miyurbingli hāngmathinlu; Jerusalemli chishātmihaolu, “Kuikhanamabing katāva̱wui eina rāhaira; Judahwui keinungbingli athumna horairora.

¹⁷Lui kahon thāda ali kuimareikhamhaira, khikhalajila ana ili ngakaishihaowa, da PROHOna hānga.

¹⁸Nathumwui apongna kala kasākhavāna nathumwuitungli hikathā rākhangasakna. Hi nathumwui ngachang khavaina, kala hi khāshuna; hina nathumwui wuklung vāshunglakhaira.”

¹⁹Iwui kachot, iwui kachot! I kachotlungli ngaleokazama! Iyavo, imalungwui phākho! I malung panglāk eina katuka; I kasaikha mapampaithura; kaja ina talla̱khon shai, raiwui akhon chi.

²⁰Kalāshātwuitungli kalāshāt, ngalei katonga shimānhaira. Kashuirak iwui kachonshim sāshimānhaira, chonrānla mik khayipkhali sākazamihaira.

²¹Karankha philān chi ina yangpamra, raiwui talla̱khon karankha shāpamra?

²²“Kaja iwui mibing mangma̱haoda athumna ili matheithuwa; athum mangkhama̱ naomayarana, athum theishingkakhui maleimana. Makaphā kasāli athum themlaka, kha kathāda kaphā sara̱khala da matheimana”

²³Ina okathuili yanga, kala yanglu, amei amā maleimana; kazingramla kahor maleimana.

²⁴Ina phungreitungli yanga, kala yanglu, athum nganukyik eina leisai, kala phungrābingla yuishang yuitāsai.

²⁵Ina yanga, kala yanglu mi akhala maleisāmana, kala khamasaili yongkazata vānaola yāmserhairasai.

²⁶Ina yanga, kala yanglu, ngalei katuma lam saikora siwuk ngasāsai; kala chiwui keinung saikorala PROHOwui malungkhavātwui mangāli sākathānserhairasai.

²⁷Kaja PROHOna hithāda hānga, “Ngalei katonga ngachakyānghaora, chithālala ina chi matangchao ngasakmara.

²⁸Hiwui vang okathuina sifara, kazingram atungna zikra; kaja ina hāngkahaina, ina ngarān kahaina; ining mangacheiranga, chili lāngda I mangalanluimara.”

²⁹Siguiraimi kala malā kasingbingwui akhon shālaga, keinung kachiva̱wui mi yāma; athumna khararli zanga; athumna lunghārbingli yākkai; keinung saikora horserhaira, kala chili mi khipākha mapānluimana.

³⁰Kala, O ngachakyang kahaiva̱, hungping kahai sāri ngavaida, sinā eina sāri nakhalatta sāsangda, namik hakmei khavai khaneo hiwui kakhalat khikhala? Aremali nakhalatta sakhamathāna. Nawui leikashebingna nali yangkharinga; athumna nali sāthat khavai phai.

³¹Kaja naokhara̱va̱na khangahui thāda ina ringkhangā shai, naochizai kapharāva̱wui ringkhangā thāda, Zionwui naongalāva̱na khaksui khavai katinga, pāng tarāmlaga ngahuida lei; “I kalākashi! mi khayumbingwui mangāli ning shimānhaira!”