Read Tangkhul Naga JEREMIAH 40 Bible Online

JEREMIAH 40 - Tangkhul Naga bible

JEREMIAH 40

¹Jerusalem eina Judahwui eina tukkhuilaga Babylonli raithā kahai narkahaibingli ngasoda mari khānghui eina khalaplaga thānphungda khamayonawui kathāna Nebuzaradanna, Jeremiahli Ramahwui eina chiho kahaiwui thili PROHOwui eina Jeremiahli kharā tuina.

²Shantriwui kathāna china Jeremiahli hokhuida hānga, “Ka̱lākashi chi nawui PROHO Varena apam hiwuitungli hāngtā kahaina;

³PROHOna hi shokngasakhaira, kala hāngkahai athishurda shokhaira. Khikhalajila nathumna PROHOli morei sāda awui kahāng makhanganāwui vang hi nathumwuitungli kashokna.

⁴Ara yanglu, napāng mari khānghui eina khalap kahai hi ina aja khalāmi kahaina. Babylonli ili ngasokhava phāmeira jiakha rālu, ina nali mathālak eina yangmira; kha ili ngasoda Babylonli khavā nawui vang maphāmara jiakha marālu. Yanglu, ngalei hupta nawui mangāli leili, nana hili khavā phāmeira, mashungmeira kaji apamli vālu.”

⁵Nana pamka jiakha, “Babylon awungana Shaphanwui naomayara Ahikamna kaphara Gedaliahli Judah keinungbingwui ngalei mungkhavai sanghaira, ali ngasoda mibingli somngarumlu; maningkha nawui vākhangaili vāpaira.” Kala raikānwui kathāna china ali kashakazā kala otnao milaga chihohaowa.

⁶Chiwui thili Jeremiahna Mizpahli Ahikamwui naomayara Gedaliahwuili vai, kala ali ngasoda chili nothā kahai athumwui mibingli pānrumhaowa.

⁷ Ahikamwui naomayara Gedaliahli ngaleiwui khamunga sāngasakhaira, kala kachāma, khangazan mi, sha̱nao, naoshinaobingli awui pāngli horsangmihaira kaji, kaphungli zatkasa raimi kathānabingna shālaga,

⁸athumna Mizpahli Gedaliahwui pamli asamphanga—Nethaniahwui naomayara Ishmael, Kareahwui naomayara Johanan, Tanhumethwui naomayara Seraiah, Netophahwui Ephaiwui naomayarabing, Ma-acahwui naomayara Jezaniah, athum kala athumwui mibingli ngasoda,

⁹Shaphanwui naomayara Ahikamna kapharā Gedaliahna shākhi sāda hānga, “Chaldeanaobingli otram ngatha̱rada mangacheelu. Ngalei chili pamlaga Babylonwui awungali otram ngatha̱lu, nathum ringphāhaora.

¹⁰Iva Mizpahli pamra, ithumli kharā Chaldeanaobingli nathumwui vang ina nganingmira. Kha nathumna drakhāra̱, lumkachāngwui athei-arai kala thao kazipkhuida nathumwui hamli kazipsanglu, kala nathumna khuikahai keinungli okthuilu.”

¹¹Chi tākam eina Moabli leikasābing, Ammonnaobingli ngasopamkasābing, Edomli kala apam khangatateili leikasā Jehudibing chila, Judahnaobingli shākkahai nothā kahaibingwui vang Shaphanwui naomayara Ahikamna kapharā Gedaliahli Babylon awungana lammunga sanghaira kaji kashā tharan,

¹²athumna leikasā apam athumli kashamkhavāwui eina Jehudinaobingna Judah ngalei, Gedaliahwui Mizpahli latungsera, kala athumna drakhāra̱ eina lumkachāngwui athei-arai khavāt maleila kachungkha kazipkhui.

¹³Chitharan Kareahwui naomayara Johanan kala raimiwui kathānabing kaphungli zatkasā saikora Mizpahli leilakha Gedaliahli vāda asamphanglaga hānga,

¹⁴“Namanglā khuikhavai Ammonwui awunga Baalisna Nethaniahwui naomayara Ishmaelli chiho kahai chi theila?” Kha Ahikamwui naomayara Gedaliahna athumli mashitsangmana.

¹⁵Chieina Kareahwui naomayara Johananna Mizpah apamli Gedaliahli ngathumsāda hānga, “Nethaniahwui naomayara Ishmaelli ina ngathumda ashaothathaoga, khipānakha matheimara. Khiwui vang namanglā ana khuihaida nali kuinamda leida khalei Jehudibing ngapha̱paira kala Judahwui shākkahai shimānpairakhala?”

¹⁶Kha Ahikamwui naomayara Gedaliahna Kareahwui naomayara Johananli hānga, “Na hikathā ot masāpaimara, kaja nana Ishmaelwuitungli makhamashung matuida lei.”