Read Tangkhul Naga JEREMIAH 42 Bible Online

JEREMIAH 42 - Tangkhul Naga bible

JEREMIAH 42

¹Chiwui thili raithānabing, Kareahwui naomayara Johanan, kala Hoshaiahwui naomayara, kala kharei kateo mateila mi saikora vāda,

²marān Jeremiahli ahānga, “Nawui mangāli ithumwui kapo kakhuisangmida nawui Vare PROHOli ithum kala shākkahai saikorawui vang seiha kasāmilu (nana thei kaja ithum kateokhamāng taikahaina),

³kaja, ithumna vāki kaji apong kala sāki kaji ot chi nawui Varena kachitheimiranu.”

⁴Marān Jeremiahna athumli hānga, “Nathumwui tui ina shāhaira, yanglu, nathumwui kapo athishurda nathumwui Vare PROHOli ina seiha sāmira, kala PROHOna nathumli ngahankakā chi mangathumlakla ina hāngmiserra.”

⁵Chieina athumna Jeremiahli hānga, “Nawui PROHO Varena ithumli hāngkhavai nali kahāng tui chiwui athishurda ithumna manganāsangakha nawui PROHO Varena khamashung kala shitsangkapai shākhi sāmiranu.

⁶Phālala shilala nali ithumna chihokharā ithumwui PROHO Varewui khon ithumna nganāra, kaja ithumna ithumwui Vare PROHOwui akhon khanganā tharan ithumwui vang phākhavai lei.”

⁷Zimiksho katharāthang khangachang atamli PROHOwui tui chi Jeremiahli rāhānga.

⁸Chieina ana Kareahwui naomayara Johanan, ali khangaso shipai kathānabing, chili lāngda kharei kateo mateila mi saikorali hokhuida,

⁹athumli hānga, “Nathumna kapo chiwui vang seihā sāmi khavai ili chihokhavā Israelwui PROHO Varena hithāda hānga:

¹⁰‘Nathumna apam hili pamakha ina nathumli sākāmira, masāshimānmimara; ina nathumli lingsangra, maphākthuihaimara; kaja ina nathumli kalā shikhangasak chiwui eina ining ngacheihaira.

¹¹Nathumna khangachee Babylonwui awungawui vang mangangalu; ali mangacheealu, da PROHOna hānga, kaja awui pāng eina kanmi khavai kala ngatangmi khavai ina nathumli ngasomida lei.

¹²Nathumli ana lumashanmida nathumwui ngalei hili pamngasak khavai, ina nathumli lumashanmira.’

¹³“Kha nathumna nathumwui Vare PROHOwui kahāng mangānamada, ‘Hili mapammara’ jiakha,

¹⁴kala, ‘Ngga, ithumna rai khangarar matheiki kaji, lah raiwui talla̱khon makashāpam, lah kashakazā makhavātpam Egyptli apamura’ jiakha,

¹⁵PROHOwui tui chi nganālu, O Judahwui shākkahaibing. Israelwui Vare, saikorawui PROHOna hithāda hānga: ‘Nathumna Egyptshong ngareithuida chili apamra jiakha,

¹⁶nathumna khangachee raighai china nathumli Egypt ngaleili rāngaphankhuira; kala nathumna khanganga chāmrei china Egypt eina tangda kharomrāra, chili nathum thira.

¹⁷Egyptli apam khavai mai ngareikathuibing chi raighai, chāmrei, kala kazātkashi eina thira; ina khuirāki kaji kalākashi chiwui eina taikashok kala ringkashok masamphangmara.’

¹⁸“Kaja Israelwui Vare, saikorawui PROHOna hithāda hānga: ‘Jerusalemwui mibingli iwui malungkhavāt kala malungkathui heikharor thāda, nathumna Egyptli khavā tharan nathumlila iwui malungkhavāt heirorra. Mina yanglaga ngachee khavai, yangkharing khavai, zeinganao khavai ngasāra; kala nathumwui lam hi maungtheiluilakmara.’”

¹⁹“PROHOna nathumli hānghaida lei O Judahwui shākkahaia, Egyptli mavālu da ina aja nathumli hāngmathinhaira kaji theishingkhuilu,

²⁰kaja nathumwui manglā mashivāmlakla shongfa ma̱thuihaira. Kaja nathumwui Vare PROHOli seihā sāmi khavai nathumna ili chihorāda hānga, ‘Vare PROHOli ithumwui vang seiha sāmilu, ana kahāng saikora chi ithumna sāra’ da nathumna hānga.

²¹Kala ina aja nathumli phongshokmihaira, kha PROHO nathumwui Varena ili hāngkhangasak awui tui chi nathumna akhanida manganāsangmana.

²²Chiwui vang eina hi theishingkhuilu kaja nathumna asompamkhangai lam chili raighai eina, chāmrei eina, kala kazātkashi eina nathum athisangserra.”