Read Tangkhul Naga JEREMIAH 43 Bible Online

JEREMIAH 43 - Tangkhul Naga bible

JEREMIAH 43

¹Athumwui PROHO Varena athumli ahānglu kaji tui saikora Jeremiahna mi saikorali athumwui Vare PROHOwui tui chi hāngser kahai thili,

²Hoshaiahwui naomayara Azariah, Kareahwui naomayara Johanan, kala achei-arei makatheibing china Jeremiahli, “Nana kakapik tui khamatuina, ithumwui PROHO Varena ‘Egyptli mavāpamalu’ da hāngkhavai machihorālakmana;

³Chaldeanaobingwui pāngli horsangmida shaothat khavai kala Babylonli tukvā khavai Neriahwui naomayara Baruchna ithumli mamayāmada nali hāngkhangasakna” da hānga.

⁴Chithāda sāda Kareahwui naomayara Johanan, raimi kathānabing kala mi saikorana Judah ngaleili pamlu da PROHOna kahāng chi manganāthuwa.

⁵Kha Kareahwui naomayara Johananna thānda raimi kathānabing china, miyurbingwui alungli kashamvā kahaibingwui eina Judah ngaleili ungpam khavai houngluishit kaje Judahwui shākkahaibing—

⁶mayarnaobing, sha̱naobing, naoshinaobing philava̱ ngarā, kala Shaphanwui naomayara Ahikamna kapharā Gedaliahwui pāngli khamayonawui kathāna Nebuzaradanna haikhami mi kachiva̱, Jeremiah marān eina Neriahwui naomayara Baruchlila khuithuiserhaowa.

⁷Athumna Egypt ngaleili vai, kaja athumna PROHOwui khon manganāmana. Kala athumna Tahpanhesli vāshunga.

⁸Tahpanhesli Jeremiahli PROHOwui tui china rāhānga;

⁹“Judah mibingwui miktāli, Tahpanhesli khalei Pharaohwui konungli napāngli ngalung kahakabing khuida zangkhavai shongfapheili leikhonlungli yatphumhailu;

¹⁰kala athumli hānglu, saikorawui PROHO, Israelwui Varena hithāda hānga: Yanglu, iwui rao Babylonwui awunga Nebuchadnezzarli hokhuida, ina ngalung yātphum kahai hiwuitungli awui wungpamkhong sakāda awui khaya̱lar runghaira.

¹¹Ana Egypt ngalei rāsākhayāngmihaida, kazātkashili thiki kajibingna kazātkashi eina, tukkakhuili zangki kajibingna tukkakhuili, raighai eina thiki kajibingna raighai eina thiserra.

¹²Egypt khorumshimli ana mei shārkhuida mei thottālaga narkahaibing phungthuihaora; kala yaokahomana awui pha̱honli rik, kashā kaphā thāda Egypt ngalei manākhuihailaga yansāngsa̱ eina thuihaora.

¹³Egyptli khalei Helio-poliswui chikhurbing chila sātekmihaora, Egyptwui varebingwui shimla mei sa̱tāmihaora.”