Read Tangkhul Naga JEREMIAH 44 Bible Online

JEREMIAH 44 - Tangkhul Naga bible

JEREMIAH 44

¹Egypt ngaleiwui Migtolli, Tahpanhesli, Memphis kala Pathros lamli khalei Jehudibingwui pongli Jeremiahli rakahāng tuina,

²“Saikorawui PROHO, Israelwui Varena hithāda hānga: Jerusalemwuitungli kala Judahwui keinung saikorali ina kalākashi khuikharā chi nathumna theiserhaira. Yanglu, chibing chi ngachakyānghaida aja khipākha masompamana,

³khikhalajila athumnala, nathumnala, nashāvā ngarānala makathei, athumna varebingli shitsangda nganamkaphā otyur riktāda makhayā ot sālaga ili malungvāt khangasakwui vangna.

⁴Chithālala iwui rao marānbingli chihorāda, ‘Iyavo, ina ningkakachai ot hi masaalu’ da rāhang ngasakchinga.

⁵Kha athumnna makhamashung apongwui kala vare khangateibingli nganamkaphā otyur mariktālu kaji iwui tui makhuisangmana, khanganāla manganāsangmana.

⁶Chiwui vang eina iwui malungkathui kala lungvāt chi Judah keinungbing kala Jerusalemwui chānreitungli heitāda hithāda aja ramcho kala ngachakyāng ngasak kahaina.

⁷“Saikorawui PROHO, Israelwui Varena hithāda hānga: Khiwui vang nathum khalatta hiyākha zakkashi morei sāda, mayarnao, sha̱nao, naoshinao eina angāngnao, Judahwui eina kasham kahaikhala?

⁸Khiwui vang nathumna pāng eina sākakhui ot china ili malung thuikhavai, nathumna vāpam khavai Egypt ngaleiwui alungli vare khangateibingli nganamkaphā otyur riktākhala, kashamhaida okathuiwui miyurbingwui alungli khonkashi kala mana̱shi ngasak khavai kasāla?

⁹Judah ngaleili, Jerusalemwui chānreili, nashāvā ngarāwui makhayā otsak, Judah awungabingwui makhayā otsak, apreiva̱ ngarāwui, nathum khalattawui makhayā, napreiva̱ ngarāwui makhayā otsak chi malaihairala?

¹⁰Athumna aja eina tangda athum khalatta mahamsangmana, khangacheela mangachee, kala nashāvāngarā kala nathumli mikahai iwui ain kala shiyan chikan mamayonlākmana.

¹¹“Chiwui vang eina saikorawui PROHO, Israelwui Varena hithāda hānga: Yanglu, Judahli kashamchaohai khavai ina imai ngarei ngasungda nathumli kalāshi khavai sāra.

¹²Judahwui shākkahaibing, Egyptli vāpān khavai mai ngareithui kahaibing chili ina khuira, kala athumli yummihaora; Egypt ngaleili athum kongluida raighai eina kala chāmrei eina thira; kharei kateo mateila raighai kala chāmrei eina thiserra; athum thuikhanam, khangachee, khonkashi, zeinganao khavai ngasāra.

¹³Jerusalemli ina raighai, chāmrei kala kazātkashi eina tandi khami thāda Egyptli kapamabingli ina tandi mira,

¹⁴chithāda sāda Egypt ngaleili somkida khavā Judahwui shākkahai akhala maringmara, Judahli unglui khavai akhala mangathishokmara; yāmkazat khani akha maningla khipākha maungrarluimara.”

¹⁵Chiwui thili mi saikora athumwui preiva̱̱ ngarāna vare kateili nganamkaphā otyur chigathairada katheibing, kala chiwui ngalemli leikasā sha̱naobing, yarui kachungkha kakazip, kala Egyptwui Pathros ngaleili kapam saikorana Jeremiahli ngahānkai:

¹⁶“PROHOwui ming singda nana ithumli kahāng tui chi, ithumna makhuisangmara.

¹⁷Kha ithumna khangashit sākahai chiwui athishurda sāra, kazing philava̱li awui vang nganamkaphā otyur riktāra, rashakchigat pha̱ra, ishāvā ngarāna kala ithumna, ithumwui awungabing eina wungnaobingna Judahwui keinungli, Jerusalemwui chānreili sākasā chithāda kasawui vang kashakazāla kachungkha leida mataisanga, kalākashila khikha matheimana.

¹⁸Kha kazing philāva̱li awui vang nganamkaphā otyur rikkatā, ra̱shakchigat kapha̱ chiho kahai eina ithum ot kachiva̱ vātserhaira, ithum raighai kala chāmrei eina thingakanhaira.”

¹⁹Sha̱naobing china hānga, “Ithumna kazing philāvawui vang nganamkaphā otyur rikkatā, ra̱shakchigat kapha̱, kala awui meoma phungkazatwui vang khamui kasā hi igahara ngarāwui khamayā makhuila kasāna da phaningla?”

²⁰Chieina mi saikora, sha̱naobing, mayarnaobing, ali rākahāngbing saikorali Jeremiahna hānga,

²¹“Nathumna, nashāvā ngarāna, nathumwui awungabing, wungnaobingna kala ngalei chiwui mi saikorana Judahwui keinungli, Jerusalemwui chānreili nganamkaphā ot rikkatā chi PROHOna maphaningungmala? Chi PROHOna matheimala?

²²Nathumwui makhayā otsak kala ningkakachai otsak chi PROHOna makhāngrarthura chiwui vang nathumwui ram ngachakyāng kahai ramcho kala khonkashi ngasāhaida aja eina tangda mi maokthuimana.

²³Hi nathumwui nganamkaphā otyur rikkatāwui vang, PROHO mangāli morei sāda kahāng makhanganāwui vang, awui ain, shiyan, kakaso makashurwui vang aja eina tangda kalākashi hi tākhangasakna.”

²⁴Mi saikorali kala sha̱nao saikorali Jeremiahna hānga, “Egyptli khalei Judahwui mi saikora PROHOwui tui nganālu;

²⁵Saikorawui PROHO, Israelwui Varena hithāda hānga: Nathum kala napreiva̱̱ ngarāna nathumwui khamor eina phongshokta kala nathumwui pāng eina sāda, ‘Ithuma khangashit sākahaiwui athishurda kazing philāva̱wui vang nganamkaphā otyur riktāra, kala ra̱shakchigat pha̱ra’ da hangtāhaira. Chiwui vang eina nathumna ngashit kahai athishurda sālu!

²⁶Chiwui vang Egyptli kapama Judahnaobing saikora, PROHOwui tui nganālu: Yanglu, reikhamatai iwui ming singda ina ngashithaira, da PROHOna hānga, kaja Egyptli khalei Judahwui mi akhanala imingli ‘PROHOna theiranu’ da khamor eina mahāngranu.

²⁷Yanglu, kaphāwui vang maningla makaphāwui vang ina athumwuitungli yangda lei; Egypt ngaleili khalei Judahwui mi saikora raighai eina, kala chāmreina chithitra.

²⁸Raikhai eina makathi Egyptwui eina Judah ngaleili hankhaungbing kateokha china; kala Judahwui shākkahai Egyptli pamkida kharābing china, athumwui tui mashungmeikā, iwui tui mashungmeikhala kaji theira.

²⁹Hi eina nathumna machutkhuipaira kaja, apam hili ina tandi mira, chieina nathumli makhamayā kalākashi khuirāra da ina hāngkahai chi kachangkhata da nathumna theikhuipaira:

³⁰ PROHOna hithāda hānga, Yanglu, Judah awunga Zedekiahli ina awui yangkashe awui manglā phākazat Babylonwui awunga Nebuchadrezzarwui pāngli horsangkhami thāda, Egyptwui awunga Pharaoh Hophrali awui yangkashebing kala amanglā khuikida phākazat athumwui pāngli horsangmira.”