Read Tangkhul Naga JEREMIAH 46 Bible Online

JEREMIAH 46 - Tangkhul Naga bible

JEREMIAH 46

¹ Yurbingwui pongli PROHOwui tui chi Jeremiah marānli rāhānga.

² Egyptwui pongli: Judahwui awunga Josiahwui naomayara Jehoiakimwui khamate kum Babylonwui awunga Nebuchadnezzarna Euphrates kongwui Carchemishli Egyptwui awunga Pharaoh Necowui raimili rai khayuiwui apongli;

³“Changvei eina talla̱ ngarānlu, raiwui vang muivālu!

⁴Siguibingli yāchan sanglu, kātonglu, O sigui raimibing! Mari kuihon ngahonda nathumwui pam khuilu, kazei kharākhariklu; raisāri shaksālu!

⁵ “Ina chi khiwui vang theihaokhala?” “Athumna ngacheehaida latunghaira. Athumwu rai kapingabingli ngawuttāhaida athumna khanuk makapeila katotsisi yāmhaira; uishong yāshong khangachee khangachāna pemhaira da PROHOna hānga.

⁶Kathākala mayāmthukmara, kapingala mayāmshokrarmara; atungshong Euphrates kong ngalemli athumwui phei ngaphokta konglui.

⁷Nile thāda kathui chi khipākhala?

⁸Egyptna Nile thāda thuiya, tara̱ kathui kong thāda. Ana hānga, ina thuida okathui peida, athumwui keinungbing eina mibing sāshimānmihaora.

⁹Muivālu, O siguibing, ngaheirorlu, O siguigaribing! Rai kapingbing mangāli vāngasaklu: Ethiopia eina Putwui chāngvei kaphungbing; malā singkathei Ludwui mibing.”

¹⁰Zimiksho chi ashangva̱wui Vare PROHOwui zimikshona, angathut hāngkasang zimikshona, akhalatta yangkashebingli athut khuikhavaina. Raighaina shaisangra kala ningyāng ungra kala athumwui ashee kapen eina mangkhuira. Kaja Euphrates kong ngalemwui atungshongwui ngaleili saikorawui Proho VAREna pha̱kaphayā sai,

¹¹Gileadli teikhavai ari akhuilu, O Egyptwui kachinga naongalāva̱! aremali nana ari kachungkha singhaira, nawui vang raikhavai maleimana!

¹²Nawui maikashi yurbingna shāserhaira; kala nawui kachapkhon okathui pemhaira; kaja raikapingbing akha eina akha ngahui ngarokta khanini pitāngarumhaira.

¹³ Egypt ngaleili Babylonwui awunga Nebuchadnezzarna sākathān khavai rārāda khaleiwui pongli PROHOwui tui chi marān Jeremiahli rākahāng:

¹⁴“Egyptli chishātlu, Migtolli vaomalānlu; Memphis eina Tahpanhesli vaomalānlu; Hānglu, ‘Khangarān sāda ningkharikta nganinglu, kaja raighaina nathumli kuimareida shāttāra.’

¹⁵Khiwui vang Apisna yāmhao? Khisāthuda nathumwui mukkāna manganingthu? khikhalajila PROHOna ali rungsang kahaina.

¹⁶Nathumwui mi kachungkha ngaphokta pitai, kala athum akha eina akha hāngngaroka, ‘Ngakarthuilu, ithum kachichā khalattawui mibingli, kala ithumli pharāsang khavai ramli latungusa, rekakharekawui raighaiwui vang eina.’

¹⁷“Egyptwui awunga Pharaohli ngakaolu, ‘Atam shimān khangasaka, khonzara’

¹⁸Ina katheina, da saikorawui PROHO kaho awungana hānga; phungreitungli Tabor kathā, shamadrupheili Carmel kathā, akha rāra.

¹⁹Raithāhaoki kajiwui vang shaksākhuilu, O Egyptli kapamabing! Kaja Memphis ramcho ngasakhaora, ngayānghaora, khipākha maokthuimara.

²⁰Egypt khamathā seilānaona, kha atungshongwui eina ali hāpa̱ akha apa̱haira.

²¹Ana masākakhui raimibing eina tangdala, keimathao kahai seinaobing thāhaira, mha, athum ngareithuida yāmrumserhaira, athum manganingrarthuwa, kaja athumwui unshimui atam athumwuitungli rāhaira, athumwui tandi atam rāshunghaira.

²²Ra̱rei ngamenthui kahaiwui khon thāda ana khonga; kaja awui yangkashebingna pangshap eina, thing ta̱katekbing thāda ngahā ngava̱riplaga kharomrai.

²³Mazangpailala awui ngahongli yangkashibingna yaiphekmihaora da PROHOna hānga; khikhalajila athum khaohbingli chungmei, athum mashānrarmana.

²⁴Egyptwui naongalāva̱li maishi ngasakra, ali atungshongwui miyur akhawui pāngli horsangmihaora.”

²⁵Ashangva̱wui PROHO, Israelwui Varena hānga: “Yanglu, Thebeswui Amonwuitungli, Pharaohli, Egyptli kala awui varebing kala awungabingli, Pharaoh kala ali ning horkasangbingwuitungli ina tandi mira.

²⁶Athumwui manglā khuikida khangarānabing, Babylonwui awunga Nebuchadrezzar kala awui otva̱bingwui pāngli ina athumli horsangmira. Naoda, khare kachāngwui thāda Egyptli mi somluinaora, da PROHOna hānga.”

²⁷ “Kha iwui rao, O Jacob, mangacheealu, kakhanangla makhanangalu, O Israel; kaja yanglu, katāva̱wui eina nali kala nawui arā-aza̱ raithā kahaipamwui eina ina kanmira, Jacobna latungda chingri-vari eina okthuiluira; kala khipānakha ali mangachee ngasakmara.

²⁸Mangacheealu, O iwui rao Jacob, kaja ina nali ngasomida lei da PROHOna hānga. Ina nali kashamvā kahai apam saikora shimānchao khavai ina sāra, kha nale mashimānchao ngasakmara. Ina nali ngarakzak eina machinra kala ina nali tandi mamila machihomara.”