Read Tangkhul Naga JEREMIAH 48 Bible Online

JEREMIAH 48 - Tangkhul Naga bible

JEREMIAH 48

¹ Moabwui pongli saikorawui PROHO, Israelwui Varena hānga: “Neboli kakhanang ngasāranu, kaja chi ramcho ngasā ngasakhaira! Kiriathaimli maishi ngasakta khuithuihaira; raipanli maishi ngasakta sākhayāngmihaira;

²Moabwui mingkazat maleithura. Ali makaphā sākhavai Heshbonli athumna machukta: Ralu, ali yur akha khangasāwui eina katathaosa! O kapā, nalila kasaikha pamngasakhaora; raighaina nali yunzatra.

³Nganālu! ‘Ngachakyānghaira kala hakmahālak eina sāshimānhaira!’ da Horonaimwui eina khavao!

⁴“Moab sākhayanghaira; ringkhangā Zoar eina tangdali shāvai.

⁵Kaja, Luhithwui shongshanli athumna chapmamānda kai; kaja sākashimān kachapkhon Hororaimwui shongtunli athumna shai.

⁶‘Yāmulu! Nathum khalatta kankhuilu!’ ‘Siwukwui ram gadha thāda sālu!’

⁷“Kaja, nana nawui khangazipa raipanli kala lanli shitkasangwui vang nalila khuithuihaora; Chemoshla awui pāngmonbing, wungnaobingli ngasoda raikathāli vāhaora,

⁸Sākakathāna china keinung kachiva̱li zangra, kala keinung akhala mayāmshokmara; tampākla shimānra kala leiwukla sākathānhaora, PROHOna hāngkahai thāda.

⁹Moabli angachāng phonmilu, kaja a yongthuihaora; awui keinungbing ngachakyāng kahai ngasāhaora, chibingwui alungli mi maokthuimara.”

¹⁰PROHOwui ot kasāli ngachāngkachata mi chi khonkashi ngasāranu, kala ashee mashok khavai raighai ngaran kahaibing khonkashi ngasāranu.

¹¹Nganuilakhawui eina thuida Moabna yansāngkhok eina okthui, kala zampā thāda ngachingpama; ali ham akhawui eina ham akhali mamasaisangmana, ava raithā kahailila mavāranga; chiwui vang awui khangama̱ awuili leichinga, awui anganamla mangacheimana.

¹²“Chiwui vang eina, yanglu, atam chi rārāli da PROHOna hānga; ina heikatha̱ mi akha chihorāda ana awui ham heitha̱mihaida awui ham masai ngasakhaora kala awui ham akha̱ sāmihaora.

¹³Chieina Israelna shitkasanga Bethelwui vang kakhayak samkaphang thāda Moabla Chemoshwui vang kakhayak samphangra.

¹⁴“Nathumna, ‘Ithumna raikapinga pangshap khalei raiwui mimānga’ da kathāda hāngkhala?

¹⁵Moab kala awui keinungbing sākakhaiya chi rāhaira, kala awui pangmeikap kaje yaronnaobingli sāthatngakanhaira da Awunga, saikorawui PROHO kaho china hānga.

¹⁶Moabwui unshimui rānganaihaira, kala awui chotkachāng atam nganaimeihaira.

¹⁷“Ali kuimarānda khalei nathum saikora, kala aming katheia nathum saikora; ‘Sāshapa khānthing, tekhamatei khāmshui chi, kathāda tekhaokhala?’ da hānglu.

¹⁸Nawui tekhamateipamwui eina, kathenga ngaleili zangpamlu, O Dibonwui mibing! Kaja Moabli sākakhayānga chi nali ngasungkida rāhaira; ana nawui khangazip raipan sākhaimiserhaira.

¹⁹O Aroerwui mibing! Shongfapheili nganingda yanglu. Yāmkazata sha̱nao mayarnaoli khisāthukhala? da athumli ngahānyanglu.

²⁰‘Moabli sākazamhaida maishi ngasakhaira;’ ‘khanangda chapngachālu!’ Moab ramcho sāngasakhaira da Arnon vāshungda hānglu.

²¹“Kaphung khanganili khaleibingwuitungli bichar sāhaira, Holon, Jahzah, Mepha-athwuitungli,

²²Dibon, Nebo, Beth-diblathaim,

²³kala Kiriathaim, Beth-gamul, Bethmeon,

²⁴kala Kerioth, Bozrah, kala khanailila katālila Moab ngaleili khalei saikorawuitungli bichar sāhaira.

²⁵Moabwui angaji katatmihaira, pāngthei sātekmihaira da PROHOna hānga.”

²⁶“Ali malip ngasaklu, khikhalajila ana PROHOli hakmei khavai sai; chithāda Moabna awui malotā kahai chili ngakhorkazamra, miwui zei savairanu.

²⁷Israelli na maningkachaimala? Ali khaleebingwui alungli samphangda awui pongli khangazek tharan nakui kakhayit maningmala?

²⁸“Keinung chihohaida lungkaili apamlu, O Moabli kasombing! Kongrā chāngāmli nāsha̱na athip sākapam thāda.

²⁹Moabwui langkaso ithumna shāhaira— a langsolaka— awui lekkhangasai, langkaso, awui kahik, kala aningli ngamkachola.

³⁰Awui achei makathei ina thei, awui langkaso kakapikna, awui otsak kakapikna, da PROHOna hānga.

³¹Chiwui vang eina Moabwui vang ina sifaya; ina Moab saikorawui vang chapa; Kir-hereswui mibingwui vang ina wukkhananga.

³²Jazerwui vang mataimeida ina nawui vang chapa, O Shibmathwui drakhārong! na aphāng shamadru makānvai, Jazer vāshunga; nawui lumkachāngwui athei kala drakhāthei yangkashebingna sākathānhaira.

³³Ngalei kathuma Moabwui eina ringkaphā kala khamathān khuithuihaira; atheira̱ surkhavaiwui eina ina thengngasakhaira, khipānakha mathānda ngaunlop eina drakhāra̱ masurmana; kha vaoda khalei chi khamathānwui akhon maningmana!

³⁴“Heshbon eina Ele-alehna chapa, Jahaz vāshungda, Zoar vāshungda, Zoar eina thuilaga Horonaim kala Eglath-Shelishiyan vāshungda Nimrimwui tara̱la thenghaowa.

³⁵Kajujuipamli pha̱phayāda kala awui vareli nganamkaphā rik-katā ali Moabli ina shummihaora da PROHOna hānga.

³⁶“Chiwui vang Moabwui vang kala Kir-heres mibingwui vang iningli sipa̱khon thāda ngahuiya; chiwui vang athumna kazipsang kahai lan shimānhaira.

³⁷Kaja kui kala morhā kachiva̱ sihaira; pāng saikorali khamā za̱laga kashānli bora ngavaisera.

³⁸Moabwui shimtung kala kayāng saikorali, chapkhangachā maningla khikha maleimana; kaja mina matheikhame ham thāda ina Moabli sakhaimihaira da PROHOna hānga.

³⁹Kathāda sakhaimihao! Athumna kathāda chapngachāli! Khayaknāhaida Moabna kathāda mai ngareithuihao! Chiwui vang eina Moabna awui khongnainaowui zeinganao khavai kala mana̱shi khavai ngasāthuihaira.”

⁴⁰PROHOna hithāda hānga: Yanglu, Moabwuitungli makhamayā, khalāngna angachāng kaphayai thāda akhana yongzatra.

⁴¹keinungbing khuihaora, khangazip raipanla khuithuihaora. Chithanghon Moabwui raikapingabingwui ning sha̱nao naokhara̱va̱wui ning thāhaora.

⁴²PROHOli mamayāla akhalatta langkasowui vang, Moabli sākhayānghaida yur akha mangasāluimara.

⁴³Khangachee, chom, khalen nathumwui mangāli lei, O Moabwui mibing! da PROHOna hānga.

⁴⁴Ngachee khangachāwui eina khayāmbing chomli tāzangra, chomwui eina ngareikashokbing khalenli manra. Kaja, tandi khami atamli ina hibing hi khuirāra da PROHOna hānga.

⁴⁵Heshbonwui khaya̱li yāmkazatabing china mazat-thukla nganingkhui; kaja Heshbonwui eina mei akha shokhaira, Shihon shimkhurwui eina meiwon shoka; khonkazārwui naongarāwui wungkuihon, Moabwui khavei sākhaimihaira.

⁴⁶O Moab, nali kakhanang ngasāranu! Chemoshwui mibing kānhaira; kaja, naomayara ngarāli tukkhuihaira, naongalāva̱ ngarā tukthuihaira.

⁴⁷Kha naoda Moabwui shimlui ina hanmiluira da PROHOna hānga. Hibing hi Moabwuitungli bichar sākahaina.