Read Tangkhul Naga JEREMIAH 49 Bible Online

JEREMIAH 49 - Tangkhul Naga bible

JEREMIAH 49

¹ Ammonnaobingwui pongli, PROHOna hithāda hānga: “Israel naomayarabing maleimala? A shimluikat mavaimala? Chithākha khiwui vang eina Milcomna Gad hi khuithuihailaga awui mibing keinungbingli rāpam kahaikhala?

²Chiwui vang eina yanglu, zimiksho chi rārali, chitharan ina Ammonnaobingwui Rabbahli ngasung khavai raivao shāngasakra da PROHOna hānga, Apam hi ngachakyāng kahai kaphung ngasāthuihaora, kala kha̱wung saikora mei thottāmihaora; chitharan Israel ngapaikakhuia athumwui eina ngapaikhuiluira da PROHOna hānga.

³Chapngachālu, O Heshbon! kaja Ai ramcho sāmihaira. Chaplu, O Rabbahwui naongalāva̱bing! Nathum khalatta bora ngavailaga kuikhamarei ngavei ungshung vāshungda chapngachāzatlu! Kaja Malcomli ngasoda awui pāngmonbing, wungnaobing, raikathāli khuithuihaora.

⁴Khiwui vang nawui tampākwui vang langsokhala? O shitkasang makhalei naongalāva̱, nawui lanli ning horsangda ‘Ili khipāna rānganairakhala’ da hānga.

⁵Yanglu, nawuitungli khangachee khangachā ina khuirāra, da rai saikorawui PROHOna hānga; nali kuimareida khaleibingwui eina, nali kashamshokhaora, mi kachiva̱wui mangāli yāmkazatbing chili kazipkhui khavai khipākha maleisāmara.

⁶Kha naoda Ammonbingwui shimlui ina hanmiluishitra da PROHOna hānga.”

⁷ Edomwui pongli saikorawui PROHOna hithāda hānga: “Temanli thangkhamei maleithula? Ningkazanwui eina machinkathei shimānhaola? Athumwui thangmei shimān kahaila?

⁸Yāmlu, latunglu, kathukli sompamlu, O Dedanli kapambing! Kaja ali tandi khami tharān ina awuitungli Esauwui unshimui chi khuirāra.

⁹Drakhāthei kaphābing nali raakha, athumna atham mataimimarala? Khalebingna ngayā raakha, athumwui khuishapmāng makhuimarala?

¹⁰Kha Esauli ina mahongmihaira, awui ngathum khavai apambingla phākhuiserhaida ngazing khavai maleithura. Anaongarā, achināngarā, khongnaibing sākhayānghaoda ala maleithura.

¹¹Nathumwui avāva̱ makhalei naongarābing haihaolu, ina nganaomira, kala nathumwui ra̱meinaobing ili chihamranu.”

¹²Kaja PROHOna hithāda hānga: “Mamangkharānbingna khorām chi mangphalungra jiakha, nathumna tandi masamphangla thuihaipairala? Nathum tandi masamphangla machihohaipaimana, kha nathum mangphalungra.

¹³Kaja Bozrah hi khangachee khangachā, zeikhanganao, chokahai; khonkashi ngasāra; kala awui keinung saikora shimānchao khavai ina ikhalatta ngashithaira da PROHOna hānga.”

¹⁴PROHOwui eina pao kadhar ina shai, kala miyurbingwui alungli paome akha chihovāhaira: “Nathum khalatta kazipkhuingarumda ali rāngasunglu kala rai sākhavai ngakarthuilu.

¹⁵Kaja yanglu, yurbingwui ngachaili ina nali teongasakra, kala yangkakharinga yur akha ngasā ngasakra.

¹⁶Nana ngachee khangasak china, kala nawui langkaso ningna nali minamhaira, lunghārkhurli kala phungrei kajuili khamunga nali. Nana khalāngwui thāda kajuiyali athip sālala, nali ina chiwui eina ngakhuntāra da PROHOna hānga.”

¹⁷“Edom hi khangachee ngasāhaora; khikhalajila chili rākhamakān kachiva̱na awui kalāshāt saikora theilaga hiwui vang kasirora.

¹⁸Sodom eina Gomorrah kala chiwui luinganai keinungbingli shimān khangasak chithāda, chili mi maokthuiluimara, khipākha mayaorāluimara da PROHOna hānga.

¹⁹Yanglu, khangazipa yaoshimli Jordan ngahongwui eina kazingkha̱ kashok thāda, ina athumli awui eina kashuirak eina yāmngasakhaora, kala ali mungkhavai ina khuikhangai mi akha kapangsangra. Kaja I kathā khipā leikhala? Ili yaokahoma khipāna ngasungshaprakhala?

²⁰Chiwui vang eina PROHOna Edomwui vang ngarānping kahai kala Temanli khaleibingwuitungli sāki kaji chi nganākhuilu: Yao ashangva̱wui eina kateteowabing chieina tangda shimenthuihaora; kachangkhat eina athumli kashok hi theida athum ngacheenahaora.

²¹Athumwui kongkhaluikhon chi shālaga okathuina kathirra, athumwui kachapkhon Red Sea shāvara.

²²Yanglu, akhana khalāng thāda thaklāk eina yongkāra, kala Bozrahwuitungli angachāng farorra, kala Moabwui rai kapingabing chi sha̱nao naokhara̱va̱wui ning thāhaora.”

²³ Damascuswui pongli: “Hamath eina Arpad pa̱ngapāhaira, kaja anina makaphā chānpao shāhaowa. Vari machikharar shamadru khangaphao thāda, athum khangacheelungli menghaira.

²⁴Damascus mathukthura, ngareithuida yāmkhavai sai, ali khangacheena pemhaowa; sha̱nao akhawui naokhara̱wui kachot thāda kakhanang kachotna pemhaowa.

²⁵Amingkazata khamathāna keinung chi kathāda horhao?

²⁶Chiwui vang eina chithang awui yaronaobing kayāngli thira, kala awui raimi saikora chithang sāshimānhaora da saikorawui PROHOna hānga.

²⁷Kala Damascuswui phākholi ina mei thotra, kala china Benhadadwui konung saikora chuitāhaora.”

²⁸Babylonwui awunga Nebuchadnezzarna Kedar eina Hazor wungrambing sākathānhaoki kajiwui pongli, PROHOna hithāda hānga: Ngakarthuida Kedarli ngasung khavai muivālu! Zingshoshongwui mi sāshimānhaolu!

²⁹ Athumwui kachonshimla, sha̱kei, chonrān, kala thongthāng saikora khuithuihaora; athumwui utla athumwui eina tongthui ngakānra, kala mibingna kuimareida khangachee! da hāngra.

³⁰“O Hazorwui mibing! Yāmlu, katāva̱li yāmvāhaolu, kathukali ngayinkhuilu, da PROHOna hānga. Kaja Babylonwui awunga Nebuchadnezzarna nali ngasung khavai, khangarān akha sāhaira.

³¹‘Ngakarthuilu, yansāngsa̱ eina khalei yur akhali ngasung khavai muivālu; raipanla, ngaveila makhangavā athumāng somda kapam chili angararlu’ da PROHOna hānga.

³²“Athumwui ut ngapaikhui khavai ngasāhaora athumwui sha̱keila ngaponkakhui ngasāhaora. Kuisam kuimareida kasebingli ina chaiyāngmihaora, Kala apam kachiva̱wui eina athumwui unshimui khuirāmira da PROHOna hānga.

³³Hazor hi ramfapam sāthuira, ramchochaohaida khipākha maokthuiluimara; khipākha mayaorāluimara.”

³⁴Judahwui awunga Zedekiahna mungkhare kachāng, Elamwui pongli Jeremiahli rākahāng PROHOwui tui:

³⁵Saikorawui PROHOna hithāda hānga: “Yanglu, Elamwui akachanga pangshap athumwui kachākthing chi ina sātekmihaora;

³⁶kala kazingram achikun matiwui masi Elamli khuirāda athumli masi saikora chi phanvāra, kala athumli miyur akhawui alunglila maphankhavā apam maleimara.

³⁷Yangkashibingwui mangāli, athumwui manglā khuikida kasābingwui mangāli ina Elamli khangacheea sāngasakra; kala iwui malungkhavāt athishurda kalākashi athumwuitungli tāngasakra da PROHOna hānga. Athum mayumranglakha eina tangda ina athumwui thili raighai chihora;

³⁸kala ina iwui wungpamkhong Elamli haihaida athumwui awunga, wungnaobing shimān ngasakra da PROHOna hānga.

³⁹Kha naoda Elamwui shimlui ina hanmiluira da PROHOna hānga.”