Read Tangkhul Naga JEREMIAH 50 Bible Online

JEREMIAH 50 - Tangkhul Naga bible

JEREMIAH 50

¹ Babylonwui pongli, Chaldeanaobingwui ngaleiwui pongli PROHOwui tui chi marān Jeremiahna kahāng:

²“Okathui yurbingwui alungli chishātta vaomalānlu, philān khāngkāda vaomalānlu: mathumhaila hānglu: ‘Babylon khuihaira, Belli maishi ngasakhaira, Merodachli wukkhanang ngasakhaira. Awui meoma̱bingli maishi ngasakhaira, awui meomabing wukkhananghaira.’”

³“Atungshongwui eina ali ngasung khavai yur akha shokhaira, china awui ngalei chi ngachakyāng ngasakhaora, kala chili khipākha maokthuiluimara, mila sāla yāmserhaora.”

⁴“Chitharan, atam chili, Israel eina Judahwui mibingna rāngarumda chapsasui hanungra, kala athumwui Vare PROHOli phāra, da PROHOna hānga.

⁵Athumna Zionshong mai ngareivāda shongfa ngathingda hāngra, rālu, mamalaiki kaji PROHOli katang makhavai tuingashit kasā chili ithum khalattana vāzangsa.”

⁶“Iwui mibing shimān kahaia yaobing ngasāsai; athumwui yaokahomabingna thannguihaida athumli phungreibingli kashamvāhaowa; phungrānaowui eina phungreili thuihaoda athumwui yaoshangli malaihaowa.

⁷Athumli samkaphangbingna tukshaiya, kala athumwui yangkashebingna hānga, ‘Ithum mayonmana, kha athumna athumwui akachangaram PROHO, avāva̱ ngarāwui kachihāna PROHOli mamayāmada morei kasāwui vangna.’”

⁸ “Babylonwui eina yāmhaolu, kala Chaldeanaobingwui ngaleiwui eina thuihaolu, laga ashangva̱wui mevā kathā ngasālu.

⁹Kaja yanglu, ina atungshong khalei kahaka yur akhali ngatha̱ ngasakta athumna Babylonli rāngararra, kala ali khuimarānda ngasungra, kala chili ali tukkhuihaora. Athumwui malāva rai kathembingna rai vālaga khamasai eina makhaunga kapinga athum kathāna.

¹⁰Chaldea ngaponthuihaora, khangaponbing saikora penlakhaora da PROHOna hānga.”

¹¹“O iwui shimluikatli ngapon kazābing nathumna ringphālala kala mathānlala, seilānao khawo karāmsisi phākashai thālala, sigui avā thāda kaheklala,

¹²nava̱ khayaklakhaora, kala nali pharākakhuiva̱ chi maishihaora. Yanglu, yurwui ngachaili naomeikap kaje siwuk, kala lamhāng chi ana.

¹³Khikhalajila PROHOwui malungkhavātwui vang, awuili mi maokthuiluimara, kha ramcho ngasakchaohaora. Babylonli kānkhava kachiva̱na ngacheera, kala awui khamāwui vang kasirorra.

¹⁴“Babylonli nathum khalatta kuimarānlu, nathum malā kahunbing saikora; ali kāplu, malāthing akhala mataihaialu, kaja PROHOwui mangāli ana morei sāhaira.

¹⁵Ali kuimareida makhamayā vaolu, a hamsanghaira; awui raipan kongluihaira, awui phākhola minhaira. Kaja hi PROHOwui athut kakhuina, ali athut khuilu, ana sākahai thāda alila sāmilu.

¹⁶Athā khayaoa kala māhāli chāngkui kasinga chili Babylonwui eina tang ngasakhaolu; kaja rekakharekawui raighaiwui vang mi kachiva̱ awui mibingli hanungra, kala mi saikorana awui ramli yāmungra.”

¹⁷“Israel hiya kazingkha̱na kharomkazat yaonaona. Khareli Assyriawui awungana shai, ara naomeikapta Babylonwui awunga Nebuchadnezzarna ara̱kui maziya.

¹⁸Chiwui vang, saikorawui PROHO, Israelwui Varena hithāda hānga: Yanglu, ina Assyriawui awungali tandi khami thāda Babylonwui awungalila ina tandi khuirārāda lei.

¹⁹Israelli ina awui seihomphungli latluida hanung ngasakra, kala ana Carmelli kala Bashanli phāshak-phazāpamra, kala awui ningkachāng chi Ephraim eina Gileadwui phungrābingli ungshungra.

²⁰Chitharan, atam chili, Israelwui alungli khayon phāra, kala khikhala masamphangmara; Judahwui alungli morei phāra kala akhala masamphangmara; kaja shāk kahai sāda ina haikahaibing chili pheomiserra da PROHOna hānga.”

²¹“Merathaim ngaleili, kala Pekodwui mibingli angararlu. Shaothattuphaolu, kala ina kaso kahai saikora sālu da PROHOna hānga.

²²Raikhon kala hakkhamahā sākashimān ngalei chili lei!

²³Okathui hupva̱wui yāmkār kathāda kaktāhao kala sātekhao! Kathāda Babylon hi yurbingna ngachee-ngachā khavai ngasāhao!

²⁴O Babylon, ina nali khalen sangda nali khuihaira, kha nana chi matheimana; nali samphangda tukkhuihaira, khikhalajila PROHOli nana ngakaishihaowa.

²⁵PROHOna awui khutlaishim shohaira, kala awui malungkhavātwui khutlai khuishokhaira; kaja Chaldea ngaleili saikorawui PROHOna ot sākhavai lei.

²⁶Apam kachiva̱wui eina rālu, awui zātshim rāsholu; mangum khorkachupkālu, kala ali zakshilak eina sāmilu; akhala mataimihaialu.

²⁷Awui seivā saikora sāthatserhaolu, athumli sā sāthat khavaipamli khuitālu. Athumli kakhanang ngasāranu, kaja athumwui zimiksho rāhaira, tandi khami atam.”

²⁸Nganālu! ithumwui PROHO Varena awui Khorumshimwui vang athut khuikhavai kasā hi Zionli phongkhavai athumna Babylonwui eina yāmhaira.

²⁹“Babylonli ngasung khavai malā singkathei, malā kahun saikorali hokhuilu. Kuimareida ali rairui sālu, akhala machakshokaranu. Ana sākahai athishurda athut hāngsanglu, ana kasā thāda alila sāmilu; kaja ana Israelwui Kathara PROHO chili nganura.

³⁰Chiwui vang eina awui yaronnaobing kayāngli pitāra, kala chithang awui raimi katonga sāshimānhaora da PROHOna hānga.”

³¹“Yanglu, O khayaning khanganinga! Ina nali mamayāmana da rai saikorawui PROHOna hānga; kaja nali ina tandi khami zimiksho, atam chi ungshunghaira.

³²Langkaso china ngaphokta kongluira, khipākhana makhāngmathotmara; kala awui keinung ina mei thotra, kala china ali kuimareida saikora chuitāserhaora.”

³³“Saikorawui PROHOna hithāda hānga: Israelwui mibingli rekhareka, Judahwui mibingli ngasoda, athumli tukthui kahaibingna nartithaowa, athumli machihomimara jihaowa.

³⁴Athumli Ngatangkhame pangshap khaleia, saikorawui PROHO hi awui mingna. Ana mashoila athumwui vang nganingmida okathuili chingrihai ngasakra, kha Babylonwui mibingli chingri mahai ngasakmara.”

³⁵“Chaldeanaobingwuitungli, Babylonli okkathuibingwuitungli kala awui wungnaobing kala thangkhamabingwuitungli raighai parra da PROHOna hānga.

³⁶Khanongbing mangkhama̱ ngasā khavai athumwuitungli raighai parra! Awui raikapingbingwuitungli sāshimān khavai raighai parra!

³⁷Awui sigui kala siguigariwuitungli, kala awui alungli khalei yur kateiwui raimibing sha̱nao thāser khavai raighai parra! Awui lanshimli raighai parda ngapaithuiserhaora.

³⁸Awui tara̱tungli kazing kāng ngasakta tara̱ thenghaora! Kaja hi meoma̱wui ngaleina, khangacheena pemhaoki kaji meoma̱bingna.”

³⁹ “Chiwui vang eina Babylonli ramsāna hyenabingli pānrumra, kala ostrichnala pānra, mi mapānluilakmara, lah thot kachida mi maokthuiluimara.

⁴⁰ Sodom eina Gomorrahli kala chiwui khongnaiwui keinungbing Varena shimān khangasak thāda, apam chili mi akhanida maokthuiluimara, miwui naomayara akhanala mayaorāluimara da PROHOna hānga.

⁴¹“Yanglu, atungshongwui eina yur akha rārāli; kapanga yur kala awunga kachungkhana okathui akatangawui eina ngatha̱phokhaira.

⁴²Athumna malā, kazei singkhui, athum sāshiya, kala lukhamashan matheimana. Athumwui raivātkhon shamadru kakhangāng thai, athum sigui tongda nali raili ngasung khavai raisāri shakkasā mi thai, O Babylonwui naongalāva̱!

⁴³Babylon awungana pao chi shai, kala apāng khikha masāthukthuwa; ali kachotna yuihaowa, sha̱nao akhana naokhara̱wui kachot thāda.

⁴⁴“Yanglu, khangazipa yaoshimli rāzangkida Jordan ngahongwui eina kazingkha̱ kashok thāda, ina athumli kashuirak eina yām ngasakra; kala awuitungli ina ningkachānga mi akha kapangsangra. Kaja I kathā khipā leikhala? Ili khipāna horānkhala? Yaokahoma khipāna iwui mangāli nganingshaprakhala?

⁴⁵Chiwui vang eina Babylonli mamayā khavai PROHOna ngaranping kahai kala Chaldeawui ngaleili mamayākhangaiwui chithei kahai chi nganākhuilu: Kachangkhat eina athumwui kateowabing chi shimenthuihaora; kachangkhat eina athumwui ashangva̱na athumwui kalākashi chi theida ngacheera.

⁴⁶Babylonli tukkakhuikhon shālaga okathui nganukra, kala awui kachapkhon yurbingwui alungli shāvāra.”