Read Tangkhul Naga JEREMIAH 51 Bible Online

JEREMIAH 51 - Tangkhul Naga bible

JEREMIAH 51

¹PROHOna hithāda hānga: “Yanglu, Babylon kala Chaldeawui mibingli mamayākhangaiwui vang sākashimāna manglā akha mathuk ngasakra.

²Kakhanang atamli ari-arāp kachiva̱wui eina athumna ali mamayāngaimada kharā tharan, Ina Babylonli mā kahambing chihovāra, kala athumna ali hamra, kala athumna awui ram masaimihaora.

³Malā kasingana awui malā mahunaranu, raisāri shaksādala manganingaranu. Awui yaronaobing akhala mashākhailu; saikora kupmihaolu.

⁴Athumna Chaldea ngaleili pitāra, chānreili khamā za̱ra.

⁵Kaja Israel eina Judahli aniwui Vare saikorawui PROHOna mahorhairanga; kha Chaldeawui ngalei, Israelwui Katharawui mangāli makhayāna pemtinghaira.

⁶ “Babylonwui eina yāmulu, mi kachiva̱ ichichāwui manglā huikhuiranu! Ali tandi khamilungli mazangrumalu, kaja PROHOwui athut hāngkasang atamna, ali mikhangayi tandi khami tharan.

⁷ PROHOwui pāngli Babylon hi sināwui tengkot sāsai, okathui saikorali marip ngasaka; yurbingna awui zam manga, chiwui vang eina yurbingna pāhaowa.

⁸Kashuirak eina Babylon kongluida kaihaira, awui vang chapngachālu! Awui khangasheiwui vang teikhavai ari khuilu, ali china railapai.

⁹ ‘Ithumna Babylon raikhavai sai, kha a marairarthuwa; ali nothāhaolu, ithum zatusa ichichā ramwui vang; kaja awui bichar kazing kāshunghaira; khamasai eina tangdala kāpeihaira.’”

¹⁰“PROHOna ithumwui vang angathut hāngsangmihaira, ithumwui PROHO Varena sāmi kahai otsak Zionli aphongshoksa.”

¹¹Malā kharākhariklu! Chāngvei phungkhuilu! khikhalajila Babylonli sāshimānmi khavai khangarān pongli Medeswui awungabingwui ningli PROHOna mathuk ngasakhaira. Kaja, PROHOna athut khuira, athut kakhui chi PROHOwui shimwui vangna.

¹²Babylonwui phākholi philān khāngkālu! Khamayon ngazip ngasaklu; raikān kapambing phāsanglu; ngathirai ngarānlu; Babylonli khaleibingwui pongli, PROHOna hāng kahai horzakta ngarānhaira kala sāhaira.

¹³ O tara̱ kachungkha khaleipamli okthuida kashāngabing, nathumwui khangachang atam ungshunghaira, nathumwui mirin khara̱ chathaira.

¹⁴Ashangva̱wui PROHO akhalattana ngashithaira: Kachangkhat ina nali mi, khaohli ngayāda chipemra, kala athumna nawuitungli raiyot laa sāra.

¹⁵Pangshap eina apuk-apaga kasaa chi ana; thangmei eina okathui sākakāpā chi; awui theishingkakhui eina kazingram phayaishoka.

¹⁶Ana matuikashok tharan kazingramli tara̱ ngarungninghai, kala ana okathui akatangwui eina leijui ngapānkā ngasaka. kazing rokhavai rikhān ngashei ngasaka, kala ana sikhurwui eina masi phanngasaka.

¹⁷Mi kachiva̱ mangkhama̱mānga, thangkhamei maleimana; sinā kasaa ali awui meoma̱bingna maishi ngasaka, kaja awui meoma̱ makhamashungna, athumwui alungli khaksui maleimana.

¹⁸Athum chi makankhanāna, thānkhangui otsakna; athumli tandi khami atamli shimānserra.

¹⁹Kha Jacobwui yarwui vanga hikathā maningmana; kaja saikora hi kasaa chi ana, Israel awui shimluikatwui shangna; saikorawui PROHO chi awui mingna.

²⁰“Na iwui yāmkārna kala raiwui zeighaina, nathumli ngasoda miyurbingli ina yurbing kala wungrambingli akha̱-akhā sāmi;

²¹nathumli ngasoda ina sigui katongabing akha̱-akhā sāmi; nathumli ngasoda ina siguigari kala siguigari katongbing akha̱-akhā sāmi;

²²nathumli ngasoda ina khararnaosanli akha̱-akhā sāmi; nathumli ngasoda ina yaronnao ngalānaobingli akha̱-akhā sāmi;

²³nathumli ngasoda ina yaokahoma kala awui yaoshangli akha̱-akhā sāmi; nathumli ngasoda ina luikhavānao kala awui yarkongli akha̱-akhā sāmi; nathumli ngasoda ina ngalei khamungabing kala kathānabingli akha̱-akhā sāmi.”

²⁴“Babylon kala Chaldeanaobing, athumna Zionli makaphā ot kasāsā saikora chiwui vang nathumwui miktāli ina athut khuimira da PROHOna hānga.”

²⁵“Yanglu, okathui saikora shimān khangasaka, O phungrei! Ipāng eina nali lungkaiwui eina shireotā ngasakta, mei kachuiya phungrei ngasā ngasakra da PROHOna hānga.

²⁶Achitheknaowui vang nawui eina ngalung akhala makhuimara, shimphungawui vangla makhuimara; kha katang eina tangda masāvaiki kaje sāthuichaohaora da PROHOna hānga.

²⁷“Ngaleitungli philān shunlu, miyurbingwui ngachaili talla̱ khonglu; ali rai ngarar khavai yurbingli khangarān sālu, ali ngasung khavai wungrambing hovālu, Ararat, Minni, Ashkenazli; ali ngasung khavai raithāna akha phāsanglu, mariktik kahai khaohli ngayāda siguibing khuirālu.

²⁸Ali ngarar khavai yurbing ngarānlu, Medeswui awungabing athumwui ngalei khamungbing kala athi kazangbing, kala athumna mungda khalei ngalei kachiva̱.

²⁹Ngaleina nganuka kala ngasheida leolanga, kaja Babylonwuitungli PROHOna ngarān kahai chi mangacheimana; Babylonli ramcho ngasakta mi maokthuilui khavai vang.

³⁰Babylonwui kapingabing rai khangarar ngasāmhaira, athumna raipanlungli pamhaira; athumwui yāng kānhaira, pangshap makathuk sha̱nao thāhaira, athumwui pamkhavai mei chuihaira, veiruithingbingla tekserhaira.

³¹Awungawui keinung apam kachiva̱li khuithuihaira da hāngkhavai mi akhana khangatei akhali paome akhana khangatei paomeli hāngzata.

³²Tara̱ eina maruiphin kahai chila khuihaira, raipanla mei thottāmihaira, kala raimibing ngacheeshunhaira.

³³Kaja Israelwui Vare saikorawui PROHOna hānga: Babylonwui naongalāva̱ mā naikakhui atamwui lanpum kathāna; kasha̱kha leilaga awui mākahāt atam rāura.”

³⁴Babylonwui awunga Nebuchadnezzarna ili mayuisanghaira, ana ili sākazammihaira; ana ili khamasai ham sāngasakhaira, khangayei thāda ana ili mayuisanghaira, iwui zākaphā, mangkaphā eina ana wuk chipemhaira, ana ili pheoshokhaira.

³⁵“Ili kala ichināngarāli sākashi kasā thāda Babylonwuitungli tāranu,” Zionwui mibingna hāngranu. “Iwui ashee Chaldeawui mibingli tāranu” da Jerusalemna hāngranu.

³⁶Chiwui vang PROHOna hithāda hānga: “Yanglu, ina nawui vang phayatmira kala athut hāngsangmira. Awui shamadru ina chithenmira kala ura̱la chithenhaora.

³⁷Babylon sākathānmihaida ja̱tāda khorkazam kahaipam sāra, ramfapam, khipākha maokthuimada khangachee kala kakasipam ngasāra.

³⁸Kazingkha̱ thāda athumna khangangrumra, kazingkha̱nao thāda nirra.

³⁹Athum meiwon thāda sālakha ina athumli phāchizātra ning mashimānranglakha eina tangda marip ngasakra pivāchanghaida mathuiluilakmara da PROHOna hānga.

⁴⁰Sā taikathatpamli yaola mela shimen khavā thāda sāmira.”

⁴¹“Babylon kathāda khuithuihao, okathui katongana masot khami tanghaira! Babylon yurbingwui ngachaili kathada ngachee-ngachā khavai ngasāhao!

⁴²Yireina Babylonli shokkhuihaira; ali tara̱ khangaphaona ngaphumhaira.

⁴³Awui keinungbing khangachee-khangachā ngasāthuihaira, kazing kakāng siwuk, mi khipākha maokathuiya ngalei, kala khipākhawui naona mamakānkhavā ngalei ngasāhaira.

⁴⁴Belli ina Babylonli tandi mira, kala akhamorna mayuisang kahai malatshok ngasakra. Yurbingna awuili malongvalui mara, Babylonwui phākho kongluihaira.

⁴⁵Iwui mibing, awui eina shokulu! PROHOwui malungkhavātwui eina mi saikorana ichichā huikhuiranu.

⁴⁶Ngalei hili raipao kashā atamli nathumwui ning mashimān ngasakalu kala mangacheealu; kumkhawui alungli pao akha kashā tharan, kha-leilaga khangatei kumli kashā tharan, lamli khangashao kashok chitharan, khamunga akhana akhali ngahei khangarok chānpao kashā chitharan.

⁴⁷Chiwui vang eina yanglu, atam chi rārāli, Babylonwui meoma̱li ina tandi khami tharan; awui ngalei katonga maishi ngasakra, kala sāthat kahai awui mi saikora awui chānreili pitāra.

⁴⁸ Chitharan kazingramla okathuilila kala chili khalei saikorana, Babylonwuitungli mathānda laa sāra; kaja, sakakathāna chi atungshongwui eina rārā da PROHOna hānga.

⁴⁹Israelwui mi pitā kahaibingwui vang Babylonla pitāra, kaja okathuili pitā kahai saikora Babylonwui vang einana.”

⁵⁰“Raikhaiwui eina yāmshok kahai nathum, zatlu, manganingpamalu. Katāvawui eina PROHOli phaningunglu, kala nathumwui ningli Jerusalem rāzangranu.

⁵¹‘Ithumli khayak ngasakhaira, kaja khamachin chi ithumna shai; maikashina ithumwui mai farorhaira, kaja yur khangateibingna PROHOwui katharapamli rāzanghaira.’

⁵²Chiwui vang eina yanglu, atam chi rārādalei da PROHOna hānga, apam saikora, kala meoma̱bingwuitungli ina bichar kasā tharan khamā sākaza̱bingna ngahuira.

⁵³Babylonna kazingli yongkālala, ngavei kajuiya ana ngaveilala, iwui eina sākakhayānga chi awuili rāra da PROHOna hānga.”

⁵⁴“Nganālu, Babylonwui kachapkhon! Kachungkha kashimānwuikhon, Chaldea ngaleiwui eina shai!

⁵⁵Kaja PROHOna Babylon shimān ngasakta lei, kala kapingakhon va̱rihai ngasakta lei. Athumwui khangaphaowuikhon kong kachungkhawui thāda shai.

⁵⁶Kaja sākashimāna china Babylonwuitungli rāhaira; awui rai kapingabingli khuithuihaira, awui malāthing akha̱ sāda sātekmiserhaira; kaja, PROHO hi hankhamiya Varena, ana kachangkhatta hanmiluira.

⁵⁷Awui wungnaobing, thangkhamabingli, khamungabingli, raithānabingli, kala rai kapingabingli marip ngasakra; athumna pida petchanghaora, mathuimathukluimara da Awunga, awui ming saikorawui PROHO kahoa china hānga.

⁵⁸Saikorawui PROHOna hithāda hānga: Babylonwui shātho kahai phākho chi ngaleili ngachammira, awui kajujuiya ngavei mei thottāmihaora. Mibingna aremawui vang ngalang zarra, kala yurbingna athum khalatta meiwui vangmāng chotchānga.”

⁵⁹Judahwui awunga Zedekiahna mungda khamate kum, Jeremiah marān eina awunga Babylonli ngasokhava tharan, Mahseiahwui nao Neriahna kapharā Seraiahli Jeremiahna kakaso tui china. Seraiahna lan kasinga sāsai.

⁶⁰Babylonli kalākashi shokki kaji tui saikora chi Jeremiahna lairik akhali kapikhui.

⁶¹Kala Jeremiahna Seraiahli hānga: “Babylonli khavā tharan nana tui saikora hi apāchitheira,

⁶²kala ‘O PROHO, apam hi nana katathaora kajiwui pongli nana hānghaira, chiwui vang apam hili mikumoranu, sayurranu masompamluimara, katangmavaila ngachakyānghaora da nana hānghaida lei’ da hānglu.

⁶³ Lairik hi nana pākup kahai thili ngalung akha hili hokshānlaga Euphrateswui alungthungli horsanghaolu,

⁶⁴kala, ‘Ina kalākashi khuirāki kajiwui vang, Babylon hithāda ngaphumchanghaida mangaphongshokluilakmara’ da hānglu.” Hieina tangda hi Jeremiahwui tuibingna.