Read Tangkhul Naga JEREMIAH 52 Bible Online

JEREMIAH 52 - Tangkhul Naga bible

JEREMIAH 52

¹Zedekiahna awunga kasā tharan kum maga̱da akha kāshunghairasai; kala ana Jerusalemli kum tharāda akha munga. Ava̱va̱li Hamutal hoi, Libnahwui Jeremiahwui naongalāva̱na.

² Jehoiakimna sākahai saikora chithāda anala PROHOwui mangāli makhayā otmāng sai.

³Kachangkhatta PROHOna malungkhavātwui vang, Jerusalem eina Judahli awui eina katāva̱li horkahai otsakbing hi rākashokna. Kala Zedekiahna Babylonwui awungali ngakaishihaowa.

⁴ Ana mungda kachiko kum, kachāng katharāwui zimiksho katharāthang, Babylonwui awunga Nebuchadnezzarna awui raimi saikora thānphungda Jerusalemli shanga, kala athumna kuinamhaida kuimareilaga rairui sai.

⁵Chithāda Awunga Zedekiahna khamung kum tharāda akha kākashung eina tangda kuinama.

⁶Kachāng khamatewui zimiksho kachikothang, zāt saknāhaida, ram chiwui mibingwui vang zāt zākhavai maleithuwa.

⁷ Chieina athumna keinung alungli akhur akha sakhaikhuida; raimi saikora ngayāshong keinung chiwui phākho khaniwui ngachaili khalei awungawui yāmguivāk khalei ngavei eina, Chaldeanaobingna keinung kuimareilakha yāmshokhaowa. Kala Arabahshong yāmvāhaowa.

⁸Kha Chaldeawui raimibingna awungali kharomvai, kala Zedekiahli Jerichowui tampākli angaphankhui; kala awui raimi saikorala kachāyām eina yāmhaowa.

⁹Athumna awungali tukkhuida ali Hamath ngaleiwui Riblahli Babylonwui awungawui pāngli khuiungmi; kala awuitungli tuitak tāmi.

¹⁰Babylonwui awungana Zedekiahwui naomayarabingli awui miktāli shaothathaowa, kala Judahwui wungnao saikorala Riblahli shaothatserhaowa.

¹¹ Ana Zedekiahwui mik latshokmihaowa, kala mari khānghui eina khalaphaowa, kala Babylonwui awungana Babylonli khuiungda awui kathi zimiksho eina tangda phātopli sanghai.

¹²Babylonwui awunga Nebuchadnezzarna mungda tharāda kachiko kum, kaphangā kachāng zimiksho katharāthang, Babylon awungawui otram khangatha̱a shantriwui kathāna Nebuzaradanna Jerusalemli vāzanga.

¹³ Ana PROHOwui shim thottāmihaowa, awungawui shimla, kala Jerusalemwui shim saikora; shim kahahak kachiva̱ ana thottāmiserhaowa.

¹⁴Kala shantri kathānali ngasokhavā Chaldeawui raimibingna Jerusalemwui kuikhamarei ngavei sākhaiserhaowa.

¹⁵Kala shantriwui kathāna Nebuzaradanna chāmmeikap kajibing, keinungli notha kahaibing, kala Babylon awungali ayāmkasangbing kala pāngthem kathembingli tukthuihaowa.

¹⁶Kha Nebuzaradan shantriwui kathānana chāmkhamataia kaikhali drakhā yāmgui kala lui vākhavai haihaowa.

¹⁷ PROHOwui shimli leikasā pithraiwui pakra̱bing, pithraiwui shamadru eina chi khaning khavai, PROHOwui shimli haikasā saikora chi sākhailaga pithraisā saikora Chaldeawui mibingna Babylonli khuiungserhaowa.

¹⁸Kala athumna hambing, belja, mei yaikhavaibing, chichāp khavaibing, khongsaibing, nganamkaphā otyurwui vang akhongbing, kala Khorumshimwui otram khangatha̱li kasinga pithrai eina kasā ot saikora khuithuihaowa.

¹⁹Kala kokluinaobing, meiyaikhongbing, khongsaibing, hamnaobing, thaomei shonbing, nganamkaphā otyur riktā khavai khongpheibing, kala ra̱shakchigatwui vang ra̱kharek kharek khavai kokluibing pongthuiserhaowa. Shantriwui kathāna china sinawui ot sinā eina, lupasāwui ot lupasā eina khuithuiserhaowa.

²⁰Solomon awungana PROHOwui shimwui vang sahaikasā pithrai pakra̱ khani, pithrai khongsai akha eina chi rung khavai mukkā tharāda khani, kala chi khaning khavai pithrai eina kasā ot saikora chi mashānrarmana.

²¹Pakra̱ chi akhana khuining tharāda chishata, kuikhamarei khuining tharāda khani, kala kashā pāngmayapar matina, kala alung choroya.

²²Atungli pithraiwui akui sāsanga, akui akhawui kasāng khuining phangāya, kala chili kuimareida sākasang kabothei chila pithrai eina sāsera. Pakra̱ akhapa chila chi tākam eina kabothei sāsangpapama.

²³Arapli kabothei hangchikoda tharuk kai, kuimareida sākasang shākhaya.

²⁴Shantriwui kathāna china pāngmon kharei Seriah, kala pāngmon kharei kakhaneli kazanga Zephaniah, kala khāmong khamayona shantri kathum, athumli khuithuihaowa;

²⁵kala raili kathāna akha sākasā otva̱ akhalila khui, kala keinungli leikasā awungawui hangva̱ shini, kala ram chiwui mibingli hokakhuiya raithānawui kapime, kala keinung alungli leikasā mi hangtharuklila khuithuiserhaowa.

²⁶Shantriwui kathāna Nebuzaradanna athumli khuiphungda Riblahli Babylonwui awungli khuivāmi.

²⁷Kala Babylonwui awungana Hamathwui ngaleili khalei Riblahli athumli shaothatserhaowa. Chithāda Judahli aramwui eina tukthuiserhaowa.

²⁸Nebuchadnezzarna tukthui kahai mibing chiwui mashing hina: Kashine kum, Jehudi thing kathum maga̱da kathum;

²⁹Nebuchadrezzarwui tharāda kachishata kum ana Jerusalemwui eina shāchishat thumrāda khani;

³⁰Nebuchadrezzarwui maga̱da kakathuma kum shantriwui kathāna Nebuzaradanna Jehudi mi shāshini hangmatida phangā; saikora ngarumda mi thingmati shātharukna.

³¹Judahwui awunga Jehoiakimli tukthuida thumrāda kashine kum, kachāng tharāda kakhaneli, kachāng chiwui zimiksho maga̱da kaphangāthang, Babylonwui awunga Evil-merodakhna Judahwui awunga Jehoiakimli chihomihaida phātopwui eina khuishokmi haowa;

³²kala ali ngahānngailak eina sāda, Babylonwui wungnaobingwuitungli pam khuingasaka.

³³Chithāda Jehoiakimna awui phātopwui kashankachon raihaowa. Kala awui mirin chupta thangkachida awungali ngasoda phazāngarumchinga;

³⁴kala chili lāngda a mathila ringlakha eina tangda, awui thangthangwui sākhavai athishurda talop makaila michinga.