Read Tangkhul Naga JEREMIAH 6 Bible Online

JEREMIAH 6 - Tangkhul Naga bible

JEREMIAH 6

¹O Benjaminwui mibing, kalāmashi khavai Jerusalemwui eina yāmulu! Tekoali talla̱ khonglu, Beth-haccheremli khamachut akha khāngkālu; kaja atungshongwui eina makaphā shimān khangasak akha rapurhaira.

²Sophayolak eina kala ngahuiri eina nganaokakhui Zionwui naongalāva̱li, ina sāshimānhaora.

³Yaokahomabing kala athumwui ashangva̱na ali kuimareida kachonshim rāsākāra, ichichāwui pamli rāhompamra.

⁴“Ali rai sākhavai ngarānlu; thuilu, ngashun angararsa!” “Ithum kalākashi, kaja kazing yinghaira, ngazin khaya̱la sāngsang mamānhaira!”

⁵“Thuilu, ithumna ngayā angararsa kala awungawui dolanbing sāshimānmiserhaosa!”

⁶Kaja, saikorawui PROHOna hithāda hānga: “Awui thingrongbing ta̱tekmiserhaolu; Jerusalem kuinam khavai pan sakālu. Tandi miki kaji keinung chi hina; awui alungli rekakharek maningla khangatei maleimana.

⁷Ura̱na tara̱ tharda kahai thāda awui makhayāla nganaozao eina haipama, khangashao kala sākashimānla awuili shāshon shāthai; kakazā, khamākaza̱ imangāli theichinga.

⁸O Jerusalem, ningngasharlu, I nawui eina latthuihaipaishina, maningakha ina nathumli masaimihaida ngalei hi ramcho ngasakhaipaishina”.

⁹Saikorawui PROHOna hithāda hānga: “Israelwui shāk kahai drakhāthei atham kaphā thāda manākazakkhuilu; drakhāthei kaphā mi thāda napāng aphāngbingli latluida phāvālu.”

¹⁰“Athumna shākhavai ina khipāli ngazekta hāngmathinrakhala? Yanglu, athum khanā kafahaida khipākha manganākhuirarmana; yanglu, PROHOwui tui chi athumwui vang mana̱shi khavai ngasāhaowa, chili ringkaphā khikhala maleimana.

¹¹Chiwui vang PROHOwui malungkhavāt chi ili pemhaira; ina chi singpamda chothaira.” “Chānreilungli chi naoshinaobingwuitungli, kala kazipkapama yaronnaobingwuitungli, kala gahara eina preiva̱ khaninili khuithuihaora, kasarnaobing kala rarlak kahaibingla.

¹²Athumwui shimla, luila, preiva̱ ngarāla ngarumda khangateili mihaora. Kaja ngalei hiwui mibingli ina makhamayāwui vang ipāng katingshokra da PROHOna hānga.

¹³Kaja teomeithui kaje eina thuida reimeithui kaje eina tangda athumna makhamashunga tongzā khavai kāramsera; marān eina thuida pāngmon kāshungda, mamashungla sai.

¹⁴Athumna iwui mibingwui khamā raimida, chingri kahai makhalei tharan, ‘Chingrihailu, chingrihailu’ da pailatsor eina hānga.

¹⁵Ningkakachai ot kasā tharan athum khayakla? Maningmana, athumna makhayakphaphutmana; kathāda mai hungra̱khala dala matheimana. Chiwui vang konglui kasangbingwui alungli athumla kongluisangra; ina athumli tandi khami atamli athumlila mai shingasakra” da PROHOna hānga.

¹⁶ PROHOna hithāda hānga: “Shongfa ngalemli nganinglu, kala yanglu, kala achālakhawui shongfa khamathā ngahānkhuilu; kala chili zatlu kala namangla khangasām samphang khavai sālu.” Kha athumna, “Ithum chiwui alungli mazatlakmara!” da hānga.

¹⁷Ina nawuitungli mayon khavai haimira, talla̱khon chi shālaga ning ngasharlu! da hānga. Kha athumna, “Manganāsangmara” da hānga.

¹⁸Chiwui vang, “Nganālu, O yurbing, kala theilu O kazip kahaibing, athumli khi shokrakhala da.

¹⁹Nganālu, O okathui; yanglu, mibing hiwuitungli ina makaphā khuirāra, athumna makaphā khangarān athei, khikhalajila athumna iwui tui makhuimana; kala iwui ain athumna khalanhaira.

²⁰Shebawui eina frankincense, lah katāramwui eina kashima ja̱hei ili khuikharā khi ningrinwui vang khala? Nathumwui rikkatā kachigat makhuisangpaimana, kala nathumwui pha̱kaphayāla ili ningyāng maungngasakmana.

²¹Chiwui vang PROHOna hithāda hānga: yanglu, mibing hiwui vang pheingaphok khavai haimida, athumna chili ngaphokra; vānaongarā ngarumda, khongnainaola, ngasotnaola thitkha sāra.”

²²PROHOna hithāda hānga: “Yanglu, atungshongwui ngaleiwui eina miyur akha rārāli, kahaka yur akha okathuiwui tameikap kaje pam eina ngatha̱phokhaira.

²³Athumna kazeila malāla singkhuihaira; athum sakashe, lukhamashan makatha yurna, athumwui khon shamadru kakhangang thai, athumna sigui tonga, mayarnao akhana raiwui vang shakkasā thāda, nali ngasung khavai vang, O Zionwui naongalāva̱.”

²⁴“Ithumna chiwui pao shāhaira,” da Jerusalemwui mibingna hānga, “kala ithum pāng mangatha̱thukmana; kakhanangna ithumli yuihaira, sha̱naona naokhara̱wui khangashei thāda.

²⁵ Luili mavālu, shongfalila mazatlu; kaja yangkashewuili raighai akha lei, khangachee achikun kachida lei.”

²⁶“O iwui yurwui naongalāva̱, bora ngavaida, hotlātungli ngaleolu; naomayara akhamāngwui vang chapkhangachā thāda, ningchotlak eina chapngachālu; kaja sākashimāna chi kashuirak eina ithumwuitungli rara.

²⁷Iwui mibingwui alungli athumwui apongbing tamyang khavai ina nali tamkhayanga sangkahaina.

²⁸Athum saikora ngakaishitingtinghai, kuimareida mashāt kazatabingna, athum pithrai kala marina; athum saikora khamakhao otsakmāng sai.

²⁹Sharkha̱ panglāk eina hurda mari chi meina kānmihaowa; aremali tharkhavai kasāmana, kaja makhayābing chi makhuishokkhuimana.

³⁰Athum chi khalan kahaiya lupasā da hoi, kaja PROHOna athumli khalanhaira.”