Read Tangkhul Naga JEREMIAH 8 Bible Online

JEREMIAH 8 - Tangkhul Naga bible

JEREMIAH 8

¹“PROHOna hānga, atam chitharan Judahwui awungabing, wungnaobingwui ara̱kui, pāngmonbingwui ara̱kui, marānbingwui ara̱kui, kala Jerusalemli khalei mi saikorawui ara̱kui chikhurwui eina khuishokserra;

²kala athumna leishida otram khangatha̱, athishurda khorumkasā zimik, kachāng, kala kazingramli khalei saikorawui mangāli phayaira; athumli makazipkhuiluimara, kaphumla maphumluimara; kha leimaiwui paih thāhaora.

³Ina kashamvā kahai apam kachida khalei makaphā shimkhurwui shāk kahai saikorana kharingliva kathi ningchangmeihaora da saikorawui PROHOna hānga.

⁴“PROHOna hithāda hānga, da nana athumli hāngra: Mibingna kongkhalui tharan, athumna mangakarthuiluimala? Akhana zatphāphāsālala, malatungluimala?

⁵Chithākha mibing hina khisāda khangui pongli sa̱na̱ungchinghaokhala? Kakapikli akachanga sāda athumna malatungngaiki jihao.

⁶Athumli ina theimida shāmihaira, kha athumna khamashungtui mahāngmana; athum khipānakha makhayāwui eina ning mangateimana, ‘Ina khi sāhaoda?’ da ngahāna. Siguina raiphungli angatar eina yongkhava thāda, kachichāwui ningkachāngli thuiserhaowa.

⁷Kazingramli yongkazat vārokla awui atam thei; nāsha̱la, yāngyaola, vārokla latkhaungwui atam thei; kha iwui mibingna PROHOwui shiyan-chikan matheithuwa.

⁸“‘Ithum thangmeiya, PROHOwui ainla ithumna mayondalei’ da kathāda nathumna hāngshapkhala? Kha yanglu, kapikatheiawui khangui kolomna kapik ngasak kahaina.

⁹Thangkhamabingli maishi ngasakra, athum ngacheehaora kala tukkhuihaora; yanglu, PROHOwui tui chi athumna khalanhaira, athumwuili thangmei khi leikhala?

¹⁰Chiwui vang apreiva̱ ngarā kateili mihaora, luila yuikakhuibingli mihaora; khikhalajila teomeithui kaji eina thuida reimeikap kaje kāshungda makhamashungwui tongkazāli kārama; marān eina thuida pāngmon kāshungda mamashunglakla sai.

¹¹Athumna iwui mibingwui khama raimida, chingri kahai makhalei tharan, ‘Chingrihailu, chingrihailu’ da pailatsor eina hānga.

¹²Ningkakachai ot kasā tharan athum khayakla? Maningmana, athumna makhayakphaphutmana; kathāda mai hungra̱khala dala matheimana. Chiwui vang kongluikasangbingwui alungli athumla kongluisangra; ina athumli tandi khami atamli athumlila maikashi mira” da PROHOna hānga.

¹³“Ina athumli kazipkhuiki kaji atamli, drakhātheila aphāngbingli makāsāmara, khaorātheila khaorārongli mamatheisāmara; anahbing eina tangda pa̱tāhaora, kala ina athumli mikahai chi athumwui eina thuiserhaira.”

¹⁴Khiwui vang ithum kasaikha pamhaokhala? Kazipkhuilu, ngaveikharik kahai keinungbing chili zangsa kala chili thisangsa; kaja ithumwui PROHO Varena chili thikhavai retsangmihaira, kala ithumli mang khavai hu sangkahai tara̱ mi, khikhalajila ithumna PROHOli morei sāhaowa.

¹⁵Ithumna chingri kahai phai, kha khamathā akhala maleimana; khamā raikhavai atam phai, kha yanglu, khangacheemānga.

¹⁶“Athumwui siguiwui khaksui Danwui eina shārai; athumwui siguwui kakahek shālaga ngalei katonga nganuka. Athumna rāda, ngalei chiwui alungli chipem kahai keinungla, chili somkapambingla sākhayāngmiserhaora.

¹⁷Kaja yanglu, ina nathumwui alungli hu kaphunga phara̱ chihorārāda lei, athumli masuiphaneprarmara, kala nathumli chibingna mara̱ra” da PROHOna hānga.

¹⁸Iwui kakhanang hi maraipailuimara; ining thenghaira.

¹⁹Nganālu, apam huptawui eina iwui khangazana yurwui naongalava̱wui ringkhangā, PROHO Zionli maleimala? Awui Awunga awuili maleimala? “Khisāthuda athumna sākakhui meoma̱, kala yur khangateiwui meoma̱ eina ili malung thuikhavai sākhala?”

²⁰“Mahā kānthuihaira, lumkachāng peihaira; kha ithumli mahuimithura!”

²¹Kaja iwui mibing kachot chi theilaga ining sāza̱laka, Ina chapngachai; I khananglākhaira.

²²Teikhavai ari Gileadli maleithula? Chili khanongla mangavāmala? Chithākha kathāda iwui mibingwui naongalava̱wui phasā maphā ngasakluithukhala?